— Кожную ўзнагароду ўспрымаю як падзяку за нашу працу. Безумоўна, радасна, што адзначылі, спадзяюся, што заслужана. Любое званне — гэта рух наперад, творчы рост, своеасаблівы стымул і крыніца натхнення. А народны артыст — высокае прызнанне, да якога можна ставіцца толькі з павагай. І калі за мяне шчыра радуюцца — вельмі прыемна. Наша прафесія патрабуе неверагодных фізічных сіл, канцэнтрацыі ўвагі, эмацыйнай аддачы. Артысты балета выходзяць на сцэну не з думкай пра грошы, а выходзяць — дзеля творчасці. А ў яе я заўсёды ўкладваю душу...
— Дваццаць гадоў працы ў балетнай трупе — гэта той стаж, пасля якога артыст балета мае права па законе аформіць сабе пенсійны адпачынак. Але пашпартны ўзрост для балета не заўсёды паказальны. Для мяне пенсія ў 38 год — гэта такі ж стэрэатып, як: балерына, каб быць паспяховай, нічога не есць і не нараджае дзяцей. У мінулыя стагоддзі і цяпер былі і ёсць артысты, якія здолелі захаваць сябе для сцэны — яны выходзілі танцаваць вядучыя партыі і пасля 40 гадоў. Марго Фантэйн, Алясандра Фэры, Мая Плісецкая... Паглядзіце на Ніну Ананіяшвілі. Ёй далёка за 50, а яна не проста з’яўляецца на сцэне ў тым ці іншым балеце. Яна выконвае вельмі складаныя спектаклі, такія як «Лебядзінае возера» і «Шчаўкунок». І пакуль адчуваю, што годна танцую, я б хацела працягваць гэта рабіць.
— Балетны век нядоўгі, рана ці позна давядзецца вырашаць, што ж рабіць далей. Магчыма, я застануся ў тэатры і буду спрабаваць у іншым артысце раскрываць тое, што аднойчы ўва мне раскрыў педагог. Мне вельмі дапамагала (і працягвае гэта рабіць) Людміла Бржазоўская (народная артыстка Беларусі, цяпер — балетмайстар-рэпетытар Вялікага тэатра. — А.Б.). Але шмат да чаго ты прыходзіш і сам, сваім шляхам, зыходзячы з уласных думак. Часам гляджу на артыста і імкнуся знайсці простыя словы для таго, каб ён сам у сябе паверыў. Няважна, гэта вядучы артыст або саліст балета, тут на першым месцы чалавечыя стасункі. Дапамагчы знайсці дакладны эмацыйны стан, скіраваць у патрэбнае рэчышча, разабрацца з вобразам, падказаць, дзе напоўніць сябе такой неабходнай энергіяй для творчасці, — усё магчыма. Мова — багатая! (Усміхаецца.) Але калі да пачатку спектакля застаецца 5 хвілін, як кажа Людміла Генрыхаўна, не думай ні пра што — ідзі і рабі! Адзінае, што трэба памятаць, — ты танцуеш не для сябе, а для публікі. Табе неабходна зрабіць усё, каб гледачы выйшлі з тэатра эмацыйна і духоўна напоўненымі. І калі ты пры гэтым зробіш 32 фуэтэ, высокі скачок і 10 піруэтаў — будзе выдатна.
— Ніколі не ўзнікала думкі, што педагогіка — гэта не маё. Ведаю, няпроста самасцвердзіцца так, каб вучні маглі давяраць свайму настаўніку. З Людмілай Генрыхаўнай мы, здараецца, спрачаемся, я не згаджаюся, магу запярэчыць, але менавіта яна — мая творчая мама, якая ўсё і заўсёды разумее. Педагог павінен быць у нейкай ступені сябрам. І добрым псіхолагам. Ёсць артысты, якія бясспрэчна будуць выконваць тое, пра што кажа педагог. Але ёсць танцоўшчыкі, якія глядзяць на героя, вобраз, адносіны герояў іначай,
і ім трэба даць магчымасць зрабіць па-свойму. Не выключана, што яны акажуцца бліжэй да ісціны. Усё пакажа сцэна. Бо гэта — творчасць, і яна павінна быць жывой...
— Пасля некаторых спектакляў здаецца: табе ўжо нічога не хочацца, бо ты цалкам выклаўся на сцэне... Але я ведаю, што за межамі тэатра мяне чакае іншае жыццё. Так, жаданне тварыць дораць кнігі і музыка. Але самыя галоўныя мае натхняльнікі — дзеці...
У вольны час мы з дзяўчынкамі размаўляем, займаемся хатнімі справамі, гуляем, радуемся, смяёмся разам — і гэтая атмасфера дзіцячай наіўнасці і бязмернай любові мяне неверагодна напаўняе. І я гатовая займацца творчасцю і далей!
— Цяпер назіраю за сваімі дочкамі, гляджу, як яны развіваюцца, у чым кожная праяўляе сваю індывідуальнасць, характар, і часам думаю: не патрэбны ім гэты балет! Хоць усе дадзеныя ў дзяўчынак у наяўнасці, і абедзве ў адзін голас заяўляюць, што абавязкова будуць балерынамі. Адна насок цягне, а за ёй — іншая, і абедзве крычаць: «Мама, паглядзі, як мы ножку паднялі!» А я думаю: ці трэба ім гэта?
Напэўна, асцерагаюся, каб у іхніх галовах не засеў стэрэатып аб мадэльнай знешнасці, які цяпер асабліва навязвае грамадства. З дзецьмі пра іх фізічную форму трэба размаўляць вельмі акуратна, каб не траўмаваць іх яшчэ неакрэплую псіхіку і не сфармаваць няправільныя паняцці.
У харэаграфічнай вучэльні я была пухленькай. «Таму што з Пухавічаў», — жартавала настаўніца. Хоць цяпер гляджу на свае фатаграфіі — худзенькая дзяўчынка, па маіх мерках. Але я залішне адказна паставілася да сваёй знешнасці, стала сачыць за фігурай і лічыць калорыі. Быў выпадак, калі мужчына перада мной нёс кардонную скрынку, а я шукала, дзе на ёй напісана каларыйнасць прадукцыі? А гэта аказалася скрынка... з-пад тэлевізара. Не хацелася б, каб гэтым самым шляхам ішлі мае дзеці.
Цяпер у мяне засталася звычка есці мала. У свой час бацькі, бабулі і дзядулі паўтаралі: даядай! Або: трэба ўсё есці з хлебам! Цяпер у нашай сям’і няма забароны на булкі ці макарону. Але мае дочкі ведаюць, што ў мучным шмат калорый, а калі яны не хочуць есці, то запіхваць у сябе ежу не трэба. Магчыма, гэта акажацца для іх толькі плюсам у далейшым жыцці. Мой сын Максім быў у дзяцінстве досыць пульхным дзіцём, а цяпер выцягнуўся, у яго прыгожыя балетныя ногі. Нават жартую часам: «Можа, дарма не аддала цябе ў балет?» (Усміхаецца.) А дочкам кажу: пакуль займайцеся ўсім, што падабаецца, а там будзе відаць.
— Калі нарадзіўся Максім, меркавала, што цяпер буду больш прысвячаць сябе дзіцяці, чым прафесіі. Але ёсць лёсавызначальныя моманты, ад якіх не схаваешся. Балет стаў важнай часткай майго жыцця. Цяпер я гэта разумею... З’явіўся сын — і пачаўся мой творчы ўзлёт, кар’ерны рост, галоўныя партыі. Памятаю, адной з першых сур’ёзных роляў стала Маша ў балеце «Шчаўкунок» Чайкоўскага. На самым пачатку спектакля яна бяжыць насустрач свайму дзядзьку і твар яе літаральна зіхаціць ад радасці, прадчування чарадзейства і цуду. Для таго каб настроіць сябе эмацыйна, заўсёды перад гэтай сцэнай уяўляла, што ў зале сядзіць мой сын і глядзіць на мяне. Менавіта тады ў мяне з’яўлялася тая самая ўсмешка, якая была так неабходная для вобраза Машы... Максім — мой памочнік ва ўсім. Цяпер сын атрымлівае прафесію інжынера ў Беларускім дзяржаўным аграрным тэхнічным універсітэце. Часам гляджу на 19-гадовага сур’ёзнага Максіма і ўспамінаю, як гушкала яго на руках. Цяпер ён носіць на руках мяне...
— У час вучобы ў харэаграфічнай вучэльні мне асабліва падабаліся два спектаклі Вялікага тэатра, у якіх марыла танцаваць, — «Жызэль» і «Шчаўкунок» (у пастаноўцы Елізар’ева). Але ў вучылішчы ў мяне і думкі не было, што змагу калі-небудзь выконваць вядучыя партыі ў гэтых спектаклях. Веры ў сябе не хапала. У той час у кардэбалет Вялікага выбіралі толькі лепшых навучэнак, а тое, што цябе могуць там заўважыць, здавалася неверагодным. Не ведаю чаму, але асабіста я магла ўявіць сябе толькі ў сольных партыях, не больш. Аднак пасля нараджэння сына павінна была вярнуцца да ранейшай формы — і вельмі моцна старалася: каб у кардэбалеце адчуваць сябе ўпэўнена, выкладвалася цалкам. Памятаю, на рэпетыцыі балета «Цені», апошняй дзеі «Баядэркі», Таццяна Яршова (народная артыстка Беларусі, цяпер балетмайстар-рэпетытар Вялікага тэатра. — А.Б.) рабіла мне заўвагі з залы: «Іра! Апусці нагу ніжэй!» А я ўсё роўна імкнулася падняць яе вышэй... І з часам з кардэбалету мяне забралі — мабыць, каб не замінала. (Усміхаецца.)
Спачатку мне далі партыі Анёлкаў у «Стварэнні свету», варыяцыі Фей у «Спячай прыгажуні», вагантаў у «Карміна Бурана». А потым Валянцін Елізар’еў і Юрый Траян мяне паклікалі і сказалі: будзем рыхтаваць Машу ў «Шчаўкунку». Я была на сёмым небе ад шчасця, але ў душы сумнявалася: «Якая Маша?!» Пачалі рэпеціраваць з Людмілай Генрыхаўнай — і паступова ўва мне нараджалася ўпэўненасць: я магу! Мне было 22 гады. Літаральна за адзін сезон увялася на галоўныя ролі ў «Спартаку», «Рамэа і Джульеце», «Карміна Бурана», «Лебядзіным возеры». Аказалася, што я спраўляюся і ў мяне вялікі патэнцыял, пра які нават не здагадвалася.
— У нашым рэпертуары ёсць два спектаклі, у якіх не магу стрымаць слёз наўпрост на сцэне. Першы з іх — балет «Страсці (Рагнеда)». Калі перад маімі вачыма дубцамі б’юць дзіця — кожны раз да горла падступае ком і проста цурком цякуць слёзы. Нічога не магу з сабой зрабіць. І самая першая сцэна балета «Анюта» вельмі цяжкая для мяне — тая, падчас якой хаваюць маці маёй гераіні. Мне здаецца, гэта катастрофа ўсяго жыцця! У апошняй сцэне балета «Рамэа і Джульета» я ўжо не плачу. Увогуле хутка ўваходжу ў гэты вобраз, літаральна за некалькі секунд, усведамляю ўсю трагедыю таго, што адбываецца. Але партыя Джульеты неверагодна складаная — у ёй сабрана мноства адценняў пачуццяў. Як і ў вобразе Кармэн у балеце Бізэ—Шчадрына, дзе ўсе крайнія эмоцыі сканцэнтраваныя ў адной дзеі. Гэтыя 50 хвілін здаюцца паўнавартасным трохактным спектаклем! Пастаноўка Валянціна Елізар’ева спусташае цябе цалкам. Менавіта галоўная жаночая партыя ў «Кармэн-сюіце» вартая ўсіх прэмій і ўзнагарод. Але і пра Анастасію не магу не сказаць.
Юрый Траян намаляваў тут зусім іншую жанчыну — маці, жонку, абаронцу горада. І сіла гэтага вобраза неверагодная!
— У маладосці я вельмі баялася Елізар’ева, ваганні ці сумневы ў ягоным позірку выклікалі ўва мне літаральна паніку. Пачынаўся мандраж, які не магла перамагчы. Цяпер з Валянцінам Мікалаевічам працуецца зусім інакш: праз столькі гадоў убачыла яго з іншага боку. На апошніх рэпетыцыях балета «Рамэа і Джульета» я адчувала яго падтрымку, якая ўсяляла ў мяне абсалютную ўпэўненасць. Не баялася заўваг, спакойна іх прымала — і праца была неверагодна плённай. Калі ў артыста балета няма сцэнічнага вопыту, узнікае нейкая сарамлівасць, боязь выказаць нешта асабліва эмацыйна. Баішся памыліцца, перажываеш, што пачуцці, якія захлістваюць цябе, могуць няправільна ўспрыняцца, што над табой могуць пасмяяцца. У маладосці са мной здаралася такое. Але цяпер я магу выказваць эмоцыі ў такой ступені моцна, у якой я гэта адчуваю. Нават калі памыляюся — гэтага не баюся, спакойна прымаю крытыку, нешта мяняю і карэктую вынік. Было прыемна, што Елізар’еву спадабалася, як я станцавала яго Джульету, — што рабіла, як жыла, што адчувала і як выказвала эмоцыі. Раней да бязмернай павагі да Елізар’ева дадаваўся... страх. Цяпер гэта — любоў, любоў да Майстра, які маштабна і неардынарна мысліць, развівае балет і дзякуючы якому нараджаюцца гэтыя шэдэўры.
— Раней перад выхадам на сцэнічную пляцоўку адчувала нават не хваляванне, а сапраўдны мандраж — перад сцэнай і з-за вялікай адказнасці перад гледачом. У мяне трэсліся рукі і ногі, знікаў голас... Такога стану даўно няма, успамінаю пра яго з усмешкай. Цяпер прысутнічае прыемнае лёгкае хваляванне, неабходнае для артыста. Каб эмацыйна сябе разгайдаць і завесці свой унутраны рухавічок, трэба пахвалявацца. Каб унутры нешта затрымцела — і на сцэну выбегла б не артыстка, якая механічна ўзнаўляе танцавальныя элементы, а, напрыклад, Джульета-дзяўчынка, якую перапаўняюць мноства розных пачуццяў перад сваім першым балем. Лёгкае хваляванне неабходнае, каб паглыбіцца ў вобраз — і паўстаць перад публікай у той ці іншай ролі.
— У тэатр кожны дзень іду з задавальненнем. Лячу сюды! Адчуваю, што ўрок класікі па раніцах лечыць, ставіць на ногі і настройвае на ўвесь дзень. Сцэна — чароўнае месца, дзе не адчуваеш болю, дзе ў цябе няма тэмпературы, дзе забываеш пра свае жыццёвыя праблемы, дзе адключаюся ад усяго.
Сцэна — гэта неверагодная плынь энергіі, назапашанай за дзесяцігоддзі існавання тэатра. Больш за тое — выходзячы на сцэну, ты нібы адчуваеш дапамогу папярэдніх пакаленняў таленавітых артыстаў.
— Ніводнага разу не была на спектаклях, якія ідуць у кінатэатрах у межах праекта «TheatreHD», але, мяркую, вельмі цікава паглядзець прамую трансляцыю балета з Вялікага тэатра Расіі, бо не заўсёды і не ва ўсіх ёсць магчымасць прыехаць у Маскву. Таму варта вітаць падобныя пачынанні. І ўсё ж такі, знаходзячыся ў Мінску, лепш прыйсці ў сам тэатр. Таму што тут, на сцэне, нараджаецца жывое мастацтва, якое дорыць гледачам сапраўдныя, непадробныя эмоцыі. І проста неабходна хадзіць на балетныя, оперныя спектаклі, у драматычныя тэатры, каб акунуцца ў свет шчырых — жывых! — пачуццяў.
Алена Балабановіч