Еленка Данброва: Мы пачалі з шасці чалавек на «Фотакрафце» і сталі думаць: што далей? Будавалі вялікія планы, марылі аб далёкіх маршрутах, а ў выніку выбраліся ў Белую Царкву. Быў студзень, і ўжо тады стала зразумела, што лепшы час для сумесных паездак — вясна, пазней пачынаюцца ўласныя планы. Бо гэта ж не проста travel, у нас дасведчаныя вандроўцы! Кадры з гэтых паездак мы цяпер адабралі для экспазіцыі «Па краінах і кантынентах» — Ісландыя, Італія, Афрыка, Індыя, Манголія. Я рызыкнула выступіць у якасці куратара: разумела агульны план працы і неабходнасць дырэктыўных дзеянняў. У выніку мы сканцэнтраваліся на краінах, а не на аўтарах — гэта было важнае рашэнне. І паказалі розныя жанры з тым, каб убачыць нейкія перасячэнні або, наадварот, кантрасты. Адбор будаваўся на некалькіх крытэрах: жанравая і візуальная разнастайнасць, магчымасць аўтарам праявіць сябе, выключыць дубляванне. А ў цэлым хацелася дамагчыся самай высокай якасці з улікам таго, што ўся гэтая праца вельмі спецыфічная, затратная і не акупаецца.
Пры падрыхтоўцы выставы шмат абмяркоўвалі падыходы да здымкі розных аўтараў: уключэнне людзей у кадр, жаданне «выцягнуць» тое, чаго не відаць большасці, імкненне знайсці водгук гледача праз адчуванне — як гэта ўсё працуе ў travel-фатаграфіі. Для многіх з нас важная прыгажосць прыроды, якая ўзнікае перад вачыма, і яе трэба захаваць, каб хаця б дзеці разумелі, што засталося пад жахлівымі заваламі смецця...
І вядома, мы разбіраем у секцыі тэхнічныя моманты, якія сапраўды вырашаюць многае. Так што «Photo Travel Club» — гэта заўсёды камунікацыя і погляд на «краіны і кантыненты» знутры, з уласнага вопыту, з індывідуальным стаўленнем.
З падарожжа заўсёды вяртаешся абноўленым, з адчуваннем, што вось зараз можна жыць далей... Ды прывозіць хочацца не вычышчаныя карцінкі, не прыемныя ўспаміны. Многае адбываецца на падсвядомым узроўні, хоць першапачаткова ты рыхтуешся, вызначаеш задачы і толькі потым пачынаеш асвойваць прастору. Напрыклад, у Венецыі, назіраючы, як граюць дзецi і развешана бялізна, у мяне ўзнікла адчуванне дома — не майго, але дома. Цікава рознае стаўленне аўтараў да адметнасцей: часам чалавек/мадэль на iх фоне перакрывае сабой усё, а ў іншых выпадках ён становіцца часткай культуры краіны, паўсядзённага жыцця. Вось праз вобразы людзей з афрыканскага племені, якія толькі пазіруюць у традыцыйнай вопратцы, а ў жыцці ходзяць з аўтаматамі, можна шмат чаго зразумець. Гэта ўсё тонкія грані — убачыць прыгажосць ці нешта неістотнае, выпадковасць ці здзіўленне перад вадаспадам, калі фізічна адчуваеш пырскі на твары...
Чым добрыя фотатуры, дык гэта магчымасцю не галопам праскочыць новае месца, а пажыць тыдзень, пранікнуцца, вызваліцца ад таго, што ты чытаў і думаў, і ўбачыць на самай справе. Зусім іншае паветра вакол, калі ты пажыў у гэтым месцы, не выключаўся з яго, адчуў нават на ўзроўні клімату, і цяпер гэта тваё новае веданне. Уражанні не павінны нагрувашчвацца, душыць адно аднаго — гэта культура іншага месца, жыццё іншай краіны. Спадзяюся, і глядач становіцца ўдзельнікам падарожжа.
А ёсць яшчэ феномен вяртанняў: аднаму чалавеку-творцу ўсюды добра і ён не можа нідзе зачапіцца, а другі заточаны на візуальны аповед, на доўгую гісторыю, і гэта тое паглыбленне ў прастору, калі некалькі кадраў цягнуць за сабой некалькі «тамоў». Хоць не заўсёды фатограф можа гэта сфармуляваць вербальна.
Мяркую, у экспазіцыі ўсё ж счытваецца спачатку краіна — не з подпісаў, а затым усё астатняе. Нам пашанцавала: супадаюць хобі і прафесійны інтарэс, а ўжо далей разгортваюцца, раскрываюцца асабістыя пункты гледжання.
Любоў Гаўрылюк: У спробах разглядзець у travel-фатаграфіі патэнцыял для мастацкіх амбіцый крытыка прыходзіць у канвенцыйнае поле, дзе ў сілу звышпапулярнасці жанру некалькі топікаў абмяркоўваюцца пастаянна. А менавіта: што робіць візуальныя ўражанні ад падарожжа мастацтвам? Экзотыка ці эстэтыка, залежнасць ад тэхналогій або ад бытавой уладкаванасці (а гэта таксама важна!)? Адчуванні новай прасторы? Аўтарскія інтэнцыі? А гэта як дамовімся!
Плюс звыклыя кадры, удала знойдзеныя ў іншым асяроддзі. Гэта яшчэ не кантэкст, які фатограф не паспявае засвоіць у ходзе хуткай паездкі. Але ўжо змененае асяроддзе прырастае характэрнымі асаблівасцямі — партрэты, фактуры, стрыт-назіранні, рамантычныя віды, прыродныя і архітэктурныя адметнасці і, нарэшце, ежа. Што ж лічыць сапраўднай travel-фатаграфіяй?
Прафесійныя фотатуры, з усёй неабходнай інфраструктурнай падтрымкай, збольшага адказваюць на пытанне. Калі графік у іх не хуткасны, цалкам можна «распавесці гісторыю». Тады дасягнуць навізны сюжэта, у той жа час пазнавальнасці месца, і нават рэалізаваць аўтарскі пасыл значна прасцей.
Справа за аўтарам — што ўсё ж ён выбірае ў якасці аб’екта і што адрознівае яго выбар ад тысяч іншых рашэнняў? Як і навошта ён гэта робіць? Прадказальнасць так рэдка саступае месца адкрыццям, ажно даводзіцца казаць пра новую банальнасць — трэнд 1980-х, які стварыў Джэф Кунс, а ўсур’ёз зацікавіўся яшчэ Эндзi Уорхал. Абодва атрымалі найвышэйшы поспех, што б мы ні разумелі пад гэтым словам. Але калі карыфеяў сфера кічавага і звычайнага цікавіла канцэптуальна, то цяперашнія фатографы апынуліся ў ёй не наўмысна. Аднак апынуліся, паколькі ў палоне выдатных «відаў» могуць быць умоўныя «ўсе», аддавацца самападману могуць таксама «ўсе», у выніку ад пазіцыі сучаснага мастака мы аддаляемся далей і далей. А там, то-бок у поп-арце, ёсць апрапрыяцыі твораў мастацтва ва ўласную аматарскую практыку і іронія, калі банальнае змяшчаюць у поле мастацтва. У падобных прыкладах мы счытваем няхітры постмадэрнісцкі тэзіс аб адноснасці ўсіх іерархій. Нагадаю, гаворка ідзе пра шматлікія паўторы выяў з арсеналу вандроўцы. І пра няўменне адымаць з іх «знаёмае», пакідаючы сваё. Як жа гэта цяжка — перадаць пераадоленне адлегласці, адметныя рысы іншага дыхання, што не паддаецца апісанню. Вербальнаму — і візуальнаму, на жаль, без сумненняў. Пачуццёвы, інтуітыўны рэгістр таксама павінен быць убудаваны ў мову, візуальную ў нашым выпадку. Як гэта зрабіць? Ці магчыма гэта? І якой можа быць стратэгія: супраціўленне матэрыялу як выкліку або следаванне за ім — у пошуках свайго новага погляду? Мяркую, у любым выпадку варта працягваць гэтую гульню. У лепшым сэнсе слова і дзеяння.
Калі глядзець з гэтай перспектывы, то аўтары «Па краінах і кантынентах» вельмі пастараліся: і Андрэй Дубінін з мараканскім краявідамі, і Наталля Яўмененка з вулічнымі гісторыямі адтуль жа. У Грузіі цікава папрацавалі Лана Красікава і Андрэй Бортнікаў, у Афрыцы — Юрый Бірукоў. Індыя паддалася Галіне Ламака і Змітру Рухленку. Італія выразна трымае ў сваім палоне Еленку Данброву, і як жа гэта зразумела! Краіна як фенаменальнае віруснае паражэнне... Ісландыя Андрэя Дубініна патрабуе асобнай гутаркі: ужо не пра новую банальнасць, а пра новую шчырасць. Працягнем, спадарства, гэтую салодкую ілюзію, гульні, рызыкі і здагадкі.