Нескладана ўявіць, як праходзілі візіты выкладчыкаў і студэнтаў Баўхаўза ў СССР да Другой сусветнай вайны і пасля, як адбываўся абмен ідэй на асабістым узроўні. Трохі складаней зразумець, якім чынам іх адаптавалі і выкарыстоўвалі ў зусім розных эканамічных рэаліях і культурных кантэкстах. Адрозненні ва ўспрыманні ідэй і спадчыны Баўхаўза паміж дзвюма сусветнымі войнамі і пасля іх у Германіі і СССР былі відавочнымі, як і асаблівасці іх успрымання ў БССР. Варта ўлічваць, што ў змаганні з фармалізмам з 1930-х рэжым у БССР быў нашмат больш кансерватыўны, чым у СССР (Масква, Ленінград). Магчымасць працаваць у авангардысцкім ключы, змаганне з «фармалізмам», як і рэабілітацыя авангарднага мастацтва, адбываліся са значным спазненнем у параўнанні з умоўным «цэнтрам». Адначасова аддаленасць ад цэнтра прыняцця рашэнняў магла спрыяць пэўным паслабленням.
Гісторыя Баўхаўза поўная супярэчнасцяў і канфліктаў, пра большую частку якіх мы мала што ведаем, і прыйшоў час разабрацца: чаму. Першая сусветная вайна, злучаныя з ёй масавыя забойствы з выкарыстаннем апошніх дасягненняў прамысловай рэвалюцыі і навукі (прыкладам, газ зарын), свабодны капіталізм і інфляцыя, імперская палітыка і нацыяналізм прывялі не толькі да крызісу ў Германіі, але і выклікалі запыт на нешта кардынальна новае для прагрэсіўна настроенай часткі грамадскасці. Стаўленне Баўхаўза да мінулага і традыцыі выявілася ў звароце да базавых формаў, колераў і матэрыялаў, што было раўназначна разрыву з мінулым і абнуленню традыцыі.
У кантэксце нямецкай культуры гэта выглядала досыць адыёзным, нават Ніцшэ быў тут менш радыкальны. Таму адразу па адкрыцці Вальтар Гропіус, заснавальнік і першы дырэктар школы, сутыкнуўся з непрыманнем кансерватыўнай большасці. Крытыкі Баўхаўза ў 1920-я засяродзіліся на тым, што праекты эканамічнага і функцыянальнага жылля для працоўных, для якіх, уласна, і ствараліся праекты, мала каму падабаліся, і менш за ўсё — самім працоўным. Ім трэба было камфортнае жытло (прытулак і сховішча), а не машына, што выконвае пэўныя функцыі. Эрнст Каллай, галоўны рэдактар часопіса «Баўхаўз», так характарызаваў архітэктурныя праекты і функцыянальны падыход да праектавання жытла: «з туалетам, ваннай, святлом і некалькімі дружалюбнымі сценамі (a few friendly wall)». Ці «Жытло, зіхатлівае шклом і сталлю — Баўхаўз стыль; сталёвыя трубкі каркаса крэсла — Баўхаўз стыль; лямпа з нікеляванай падстаўкай і абажурам з матавага шкла — Баўхаўз стыль; адсутнасць карцін на сценах — Баўхаўз стыль». Венскі архітэктар Джозэф Франк у 1931 годзе піша: «Тое, што цяпер уяўляе функцыянальны падыход, — гэта не што іншае, як бедната». Нават Адольф Лоас выказаўся: «Бескарысныя канструкцыі, выкарыстанне ўсяго трох матэрыялаў (бетон, шкло і метал) — рамантызм Баўхаўза нічым не лепшы за арнаменталізм». І гэта піша чалавек, які прыраўняў прыхільнасць да арнаменту да душэўных хвароб. «Шык плоскіх дахаў» выглядае ў чарадзе крытычных выказванняў амаль кампліментам. Але нягледзячы на ўсе супярэчнасці, прадстаўнікі Баўхаўза энергічна працавалі над эстэтыкай для сферы прамысловых тэхналогій, і гэтая эстэтыка не мусіла мець нічога агульнага са стылямі папярэдніх эпох. Не дзіва, што Баўхаўз так хутка і арганічна быў успрыняты ў ЗША, дзе культ будучыні спалучаўся з палітыкай melting pot (плавільны кацёл), пры якой эмігрантам прапаноўвалася забыцца пра мінулае і працаваць на шчаслівую будучыню, увасобленую ў амерыканскай мары. Канфлікт з буржуазным атачэннем школы Баўхаўз суправаджаўся супрацьстаяннем канцэпцый першых двух дырэктараў: Вальтара Гропіуса (кіраваў школай на працягу першых дзевяці гадоў), што стаяў за саюз мастацтва і тэхналогій, і Ханэса Меера (кіраваў два гады), які бачыў у архітэктуры і дызайне прыладу стварэння новага грамадства. Адсутнасць кансэнсусу сярод майстроў школы, пра што вядома па дзённіках Оскара Шлемера, Джозэфа Альберса і іншых, дадавала напружанасці агульнай атмасферы. Тым не менш супрацьстаянне Гропіуса і Меера спрычынілася з’яўленню дзвюх канкурэнтных, а часам узаемавыключальных гісторый установы.
Кантакты савецкіх мастацкіх устаноў са школай Баўхаўз распачаліся ў апошні год дырэктарства Гропіуса, але найбольш інтэнсіўнымі былі ў двухгадовы перыяд дырэктарства Меера, чаму спрыялі яго сацыялістычныя перакананні. Некаторыя студэнты пасля паехалі працаваць у СССР.
У 1930 годзе Ханэс Меер са студэнтамі прыехаў у Маскву з невялікай выставай. Меер прадстаўляў толькі тыя працы, якія былі звязаны з яго канцэпцыяй архітэктуры і дызайну. Ён пакінуў без тлумачэнняў прычыну, чаму не пажадаў застацца ў СССР, хоць пасля эміграцыі ў Мексіку (эміграваць у ЗША не захацеў з-за ідэалагічнай нязгоды з капіталістычным рэжымам) на іспанскай мове напісаў грунтоўны і ў цэлым дадатны артыкул пра архітэктуру і дызайн СССР у святле першай і другой пяцігодак. Калі пры нацызме Баўхаўз трактаваўся як «дэгенератыўнае мастацтва», то пры сталінізме ён крытыкаваўся за «фармалізм», таксама цкаваліся мастакі, якія працавалі ў канструктывісцкай і экспрэсіўнай манеры. Тым не менш уплыў школы і фармальныя пошукі ў архітэктуры і дызайне можна выявіць яшчэ да сярэдзіны 1930-х. Пасля не было ніякай магчымасці адкрыта і афіцыйна цікавіцца Баўхаўзам, як і авангардным мастацтвам. У другі раз ідэі школы Баўхаўз былі імпартаваны ў СССР з нагоды заснавання ВНИИТЭ ў самы разгар халоднай вайны. Тады правадыром ідэй выступіла Ульмская школа дызайну (ФРГ), якая была выдатна інтэгравана ў капіталістычную эканоміку. У кантэксце супрацьстаяння сацыялістычнага і капіталістычнага рэжымаў у ход ішло ўсё, што магло падкрэсліць іх перавагу адзін перад адным, і Баўхаўз прыдаўся вельмі дарэчы. Ён разглядаўся як знак эканамічнага і індустрыяльнага адраджэння ліберальнай Германіі (ФРГ), пры гэтым гісторыя закрыцця школы нацыстамі адыграла немалаважную ролю для рэабілітацыі ФРГ у паваенным свеце. Але, каб нівеляваць сацыялістычныя памкненні двухгадовага дырэктарства Ханэса Меера, увесь букет ідэй і дзейнасці Баўхаўза быў зведзены да мастацкага стылю, які характарызаваўся выкарыстаннем базавых колераў і простых формаў і пошуку выразных уласцівасцяў матэрыялаў, якія мы дагэтуль успрымаем як асноўную версію гісторыі школы. Палітыка, ідэалогія і праектная дзейнасць ВНИИТЭ шмат у чым была перадвызначана «кухоннымі» дэбатамі Ніксана і Хрушчова, якія адбыліся на выставе «Прамысловая прадукцыя ЗША» ў Маскве, і знакамітай заявай Мікіты Хрушчова пра тое, што, савецкую сям’ю не здзівіш пасудамыйнай машынай. Гэта ў 1959 годзе! Пасля такой заявы нічога не заставалася, апроч як пераарыентаваць савецкую індустрыю з вытворчасці станкоў (сродкаў вытворчасці для вытворчасці — катэгорыя тавараў А) на побытавыя тавары (катэгорыя тавараў Б). Але хуткі аналіз нядаўна знойдзенага архіва беларускага філіяла ВНИИТЭ паказвае, што доля праектаў катэгорыі А ўсё ж была вельмі істотнай, а значыць асобныя савецкія сем’і, насуперак абяцанням Хрушчова, мелі ўсе шанцы толькі з зайздрасцю пазіраць на пасудамыйныя машыны. Публікацыі ў часопісе «Тэхнічная эстэтыка» і спадарожных выданнях ВНИИТЭ, навучальныя праграмы мастацкіх ВНУ сведчаць пра велізарны ўплыў ідэй, прыпісваных школе Баўхаўз. Фактычна мастацкая адукацыя будавалася на падыходах, у якіх афіцыйна прызнавалася пераемнасць з гэтай школай: фармальная кампазіцыя, колеразнаўства па сістэме Ітэна і, вядома, татальны падыход да ператварэння сродкамі дызайну не толькі атачэння, але і тых, хто павінен яго насяляць, у савецкай тэрміналогіі — сістэмны падыход, ці дызайн як прылада сацыяльнай трансфармацыі.
Лічыцца, што менавіта Баўхаўзу трэба дзякаваць за стандартызаванае будаўніцтва, што знайшло ўвасабленне ў панэльнай забудове савецкіх гарадоў. Параўноўваючы панэльныя дамы з архітэктурнымі праектамі Ханэса Меера, сапраўды складана адмаўляць іх сувязь і пераемнасць. Функцыянальны падыход да праектавання прасторы кватэр і грамадскіх памяшканняў, гэтак жа як і ў Германіі, у Саюзе часта ацэньвалі крытычна. Адначасова з інтэнсіўнай праграмай індустрыялізацыі і нарошчваннем вытворчасці тавараў побытавага прызначэння існавалі крамы «Зрабі сам» і рубрыкі пра паляпшэнне спажывецкіх якасцяў тавараў у часопісах «Навука і жыццё», «Работнiца i сялянка»...
Уплыў школы Баўхаўз на індустрыяльную эстэтыку тавараў серыйнай вытворчасці ацэньваецца заўсёды пазітыўна, чаго не сустракалася пры ацэнцы выніку ўкаранення гэтай эстэтыкі ў савецкай прамысловасці.
У Савецкім Саюзе Баўхаўз мог прымацца і з вельмі нечаканых прычын. Адна з іх крыецца ў спосабе легітымацыі савецкага авангарду. Да халоднай вайны захоўванне прац мастакоў-авангардыстаў, іх вывучэнне было справай небяспечнай. Адмова ад гістарычнасці, традыцыяналізму ў імя індустрыяльнай эстэтыкі, абвешчаная Баўхаўзам, цалкам рэзануе са спробай дыстанцыявацца, забыцца ці «забыць» (выцесніць з памяці) і асудзіць сталінскія рэпрэсіі.
Нягледзячы на тое што ў БССР яшчэ свежымі былі ўспаміны пра рэпрэсіі сталінскага перыяду, а «нацыяналістычныя справы» ў асяроддзі інтэлігенцыі фабрыкаваліся і ў 1970-я, ідэалогія і эстэтыка мадэрнізму, на прыкладзе Баўхаўза, дазваляла як быццам абнуліць, забыцца пра досвед папярэдніх пакаленняў і пачаць усё з чыстага аркуша: простых геаметрычных формаў, базавых колераў і новых матэрыялаў. З новым стылем звязваліся надзеі на больш справядлівыя ці хоць бы менш крыважэрныя рэжым і атачэнне. Пад эгідай захаплення ідэямі Баўхаўза ў архітэктуры і інтэр’еры рэалізаваўся запыт на адрачэнне ад мінулага, перадусім, мабыць, сталінскага мінулага (зніклых без весткі назаўжды ці надоўга сваякоў, сяброў і калегаў у катавальнях сталінскіх лагераў, паўсюдныя даносы і іншае), увасобленае ў эстэтыцы празмернасці і буржуазнасці. Эстэтыка Баўхаўза ва ўсім супрацьпастаўлена сталінскаму ампіру, гэтак жа як і ў паваеннай Германіі (пасля Першай сусветнай вайны) аскетызм функцыяналістаў не мае нічога агульнага з эстэтыкай мэблі і прадметаў інтэр’ера Германскай імперыі і Веймарскай рэспублікі. Баўхаўз ідэальна пасаваў для ўвасаблення надзей на іншую будучыню, больш справядлівую і, прынамсі, вегетарыянскую ў палітычным дачыненні. А татальны, ці, у савецкай тэрміналогіі, сістэмны падыход толькі ўзмацняў надзеі на абнаўленне ўсяго атачэння, а не толькі кропкавыя паляпшэнні. Парадокс мадэрнісцкага дызайну быў у тым, што ён супярэчыў густам большасці, асабліва пралетарыяту, на каго галоўным чынам і былі скіраваны надзеі на сацыяльную трансфармацыю з дапамогай новага візуальнага асяроддзя. Падчас халоднай вайны, аскетычны, «халодны» мадэрнісцкі дызайн увасабляў спадзевы на новы, больш бяспечны і дэмакратычны свет, пажаданы, але недасяжны для большасці. Па меры ўвасаблення новых прынцыпаў у панэльнай і стандартызаванай забудове гарадоў, у мэблі серыйнай вытворчасці, якімі змушана была карыстацца тая самая большасць, вельмі хутка сталі бачны вартасці і недахопы, што знайшлі сваё адлюстраванне ў «класіцы» савецкага кіно. Адмова ад мінулага назіралася не толькі на ўзроўні палітыкі трансфармацыі савецкай прамысловасці, але ў біяграфіях асобных людзей. Удзел у маштабных савецкіх будоўлях дазваляў мноству маладых прафесіяналаў прыкласці свае сілы ў самых аддаленых кутках краіны. Працоўная міграцыя замацоўвала мадэрнісцкі падыход у фармаванні гарадскога асяроддзя і атачэння: адсутнасць сувязі з лакальнымі традыцыямі і гісторыямі ў імя светлага і лепшага будучага. Прафесійная эміграцыя ажыццяўлялася і ў пэўны перыяд заахвочвалася не толькі ў краіне, але і паміж дружалюбнымі краінамі. Так, біяграфіі Эрвіна Шуберта і Стэфана Себока дэманструюць, наколькі мабільнымі маглі быць маладыя адмыслоўцы і наколькі па-рознаму складаліся іх лёсы. Шуберт і Себок, немцы, актыўна ўцягнутыя ў дзейнасць у вобласці архітэктуры і дызайну, так ці інакш злучаную з Баўхаўзам, у самым пачатку 1930-х па прафесійнай лініі, магчыма, па запрашэнні савецкай дзяржавы, пераехалі ў СССР. Стэфан Себок працаваў у архітэктурным бюро Маскпраекттранс, Саюзтранспраект, дзе праектаваў чыгуначныя станцыі Казанскага і Курскага вакзалаў. У 1936 годзе працаваў у архітэктурнай студыі братоў Весніных, удзельнічаў у праектаванні станцыі метро «Павялецкая». У самым пачатку вайны быў арыштаваны і абвінавачаны ў шпіянажы, загінуў пры нявысветленых акалічнасцях, рэабілітаваны ў 1997 годзе. Эрвін Шуберт, па адных крыніцах, збег у СССР ад нацызму, па іншых — папрасіў праз МОПР атрыманне савецкага грамадзянства. У Маскве працаваў мастаком-канструктарам у мастацкай фабрычна-заводской вучэльні ў Абрамцава і навуковым супрацоўнікам у Кабінеце ўнутранага абсталявання і мастацкай прамысловасці Усесаюзнай акадэміі архітэктуры. З пачаткам вайны быў дэпартаваны ў Татарскую АССР.
Аднак яму ўдалося выжыць, і ў 1960-я (у верасні 1960 ці 1963 года, у розных крыніцах розныя дадзеныя) Шуберт запрошаны на пасаду галоўнага Архітэктара праектаў інстытута «Мінскпраект», дзе распрацоўваў серыю корпуснай мэблі ўніверсальнай зборна-разборнай канструкцыі. Дзякуючы каталогу БСД «Тутэйшы дызайн. Асобы. Рэчы» вядома яго крэсла з плоскаклеенага дрэва, спраектаванага ў 1960-я, і дагэтуль яно знаходзіцца ў вытворчасці. Яму належаць распрацоўкі выставачных кампазіцый павільёна БССР на ВДНГ СССР, на міжнародных кірмашах у Лейпцыгу, Дзюсельдорфе, Маскве. Ён аўтар інтэр’ераў для такіх аб’ектаў, як аэрапорт «Мінск-1», агенцтва Аэрафлота, Вярхоўны Савет БССР і інш. Мабільнасць шмат у чым спрыяла замацаванню мадэрнісцкага падыходу ў савецкім дызайне — малады адмысловец з іншай краіны і рэгіёна рэдка задумваўся пра карані і традыцыі месца, дзе даводзілася працаваць, у той жа час гатовы быў ствараць праекты, скіраваныя ў будучыню, што злучалася з індустрыйнай вытворчасцю, серыйнымі таварамі. Такі падыход рыфмуецца з ідэямі Баўхаўза — адной з першых і даволі радыкальных школ, што заявілі пра адмову ад гістарычнасці ў архітэктуры і дызайне. Савецкая кан’юнктура ўзмацняе мадэрнісцкія памкненні адрачыся ад нейкіх сувязяў, алюзій з лакальным кантэкстам, што знаходзіць водгук нават у постсавецкі час. Праўда, за савецкім часам мадэрнізм сцвярджаўся не як адмова ад прытрымлівання і прайгравання мясцовых традыцый, а, па дакладнай заўвазе Барыса Гройса, як іх выцясненне, бо дарэвалюцыйнае мастацтва і тое, што злучана з нацыянальнымі адмысловасцямі, усяляк канфіскавалася з музеяў на карысць важнага з пазіцый класавай ідэалогіі (у музейных прасторах засталіся толькі творы, у якіх прасочваўся прыгнечаны стан пралетарыяту да рэвалюцыі). У беларуска- і рускамоўных публікацыях нярэдка апускаецца момант супрацьстаяння прадстаўнікоў Баўхаўза з буржуазным атачэннем Веймарскай рэспублікі, як і незадаволенасць савецкіх спажыўцоў таварамі масавай вытворчасці. Але з вялікім запалам паўтараецца гісторыя пра тое, як Баўхаўз інтэграваўся ў адукацыйную, будаўнічую і выдавецкую індустрыі ЗША, дзякуючы чаму і стаў адной з самых уплывовых школ у свеце. Менавіта таму важна зразумець гісторыю нашага засваення ідэй Баўхаўза, што спрычынілася да іх папулярнасці.
Ала Пігальская