Менавіта таму імкненне наблізіцца да таямніцы пазнання «чалавечага» заўсёды прыцягвала многіх творцаў. Аднак сёння на выставах сучаснага мастацтва партрэт стаў нешматлікім. Гэта датычыцца і айчыннай мастацкай сцэны. Тым цікавей перагартаць старонкі гісторыі гэтага жанру, знятага з «архіўнай» паліцы і прадстаўленага на выставе «Сучаснікі ХХ. Стагоддзе беларускага партрэта» ў Нацыянальным мастацкім музеі Рэспублікі Беларусь.
Папярэдняя монажанравая выстава партрэта ў Нацыянальным мастацкім музеі «Беларускі партрэт 1940—1960-х гг.» адбылася ў 1996 годзе, больш за два дзесяцігоддзі таму, і ахоплівала толькі кароткі адрэзак часу. Таму на адкрыцці наступнай партрэтнай выставы доктар гістарычных навук, прафесар Аляксандр Гужалоўскі адзначыў: «Тут можна смела чытаць лекцыю па гісторыі культуры Беларусі, паколькі візуальнае ўяўленне аб гісторыі — адно з самых моцных і запамінальных». Але ці атрымалася ў нас сёння стварыць сапраўдны гістарычны раман у асобах? Прааналізаваць жанр партрэта не толькі ў кантэксце асаблівасцей развіцця выяўленчага мастацтва, але і ў больш шырокіх межах: культурных, палітычных, сацыяльных? Магчыма, так. Сапраўды, з аднаго боку, выстава з дастатковай доляй аб’ектыўнасці праз эвалюцыю партрэтнага жанру адлюстравала змены гістарычнага шляху нашай краіны ў ХХ стагоддзі. Тут ёсць усе: дэкадэнцкія спадары і дамы пачатку стагоддзя і інтэлігенцыя 1920—30-х, ударнікі і калгаснікі савецкага часу, прадстаўнікі андэграўнду 1980-х. Да таго ж гэты маштабны праект аб’яднаў практычна ўсе галоўныя мастацкія калекцыі нашай краіны — Нацыянальнага мастацкага музея, Віцебскага абласнога краязнаўчага музея, фондаў Нацыянальнага цэнтра сучасных мастацтваў, Беларускага саюза мастакоў, а таксама збораў прыватных калекцыянераў Аляксандра і Іны Радаевых, Андрэя Плясанава, персанальных калекцый.
З іншага боку, пра паўнату прадстаўленага матэрыялу тут казаць не выпадае. Ацэнка працэсаў, што адбываліся ў ХХ стагоддзі ў галіне пластычных мастацтваў у нашай краіне, — задача не з простых. Бо, на жаль, паказаць цэласную, інтэгральную карціну развіцця беларускага мастацтва і, у прыватнасці, жанру партрэта першай паловы ХХ стагоддзя немагчыма. Вялікая Айчынная вайна ўнесла сур’ёзныя карэктывы ў захаванасць нашай спадчыны. Фонды Карціннай галерэі былі разрабаваны, вялікая колькасць каштоўнасцей прапала бясследна. Толькі малая частка работ была вернута пасля вайны з Германіі, шматлікія «праграмныя творы» страчаны назаўжды. А некаторыя майстры засталіся ў беларускім мастацтве ўсяго толькі сваімі імёнамі, як захаваны на партрэце Лейбы Альпяровіча Мікалай Бонч-Асмалоўскі, што як дэндзі сядзіць у крэсле. Таму ўбачыць усю карціну развіцця беларускага партрэта складана, мы толькі можам прыадчыніць гэтыя дзверы.
Варта таксама адзначыць і свядомае неўключэнне ў экспазіцыйны шэраг партрэтаў Леніна, Сталіна і іншых людзей улады, таму ХХ стагоддзе было паказана хутчэй у трактоўцы мастацка-эстэтычнай, чым гістарычнай. Задача праекта складалася ў тым, каб апісаць змены, што зведала мастацтва ў выніку карэнных грамадскіх зрухаў, вылучыць знакавых мастакоў і зразумець, у чым былі асаблівасці іх твораў і іх незгасальная каштоўнасць.
Партрэтны жанр першых двух дзесяцігоддзяў ХХ стагоддзя звязаны з творчасцю ў асноўным трох мастакоў — Якава Кругера, Юдаля Пэна і Лейбы Альпяровіча. Гэтыя творцы выступаюць у гісторыі беларускага мастацтва перш за ўсё як партрэтысты. Партрэтысты, якія захавалі індывідуальнасць губернскай эліты, стварылі сентыментальна-паэтычныя вобразы жаночай натуры, перадалі тыпажы старасвецкай мяжы аселасці і пакінулі нам у спадчыну камерныя выявы сваіх родных і блізкіх людзей. Адсюль у асноўным невялікія па фармаце партрэты гэтага перыяду, што спалучаюць у сабе адначасова параднасць, салоннасць і камернасць і ўвасабляюць свет прыватнага чалавека. Такой ролі і такому характару творчасці спрыялі і эстэтычныя ідэалы і патрабаванні заказчыкаў, і ў цэлым правінцыяльная паэтыка.
Пераход ад «класічных» для XIX стагоддзя норм і прыярытэтаў да мадэрнізму і авангарду, якія імкліва адбываліся ў сталічным асяроддзі, у беларускім мастацтве здзейсніўся крыху пазней. У першыя дзесяцігоддзі ХХ стагоддзя ў творчасці беларускіх аўтараў дамінуючымі заставаліся прынцыпы класічнага рэалізму, позняга перадзвіжніцтва, на іх сфармавалася крэда адзначаных мастакоў, што нарадзіліся ў XIX стагоддзі, але ўступілі ў стагоддзе ХХ.
Асобны тып партрэта з відавочна выяўленым жанравым, біяграфічным пачаткам вылучае творчасць Юдаля Пэна. Увасабленне партрэтаваных заўсёды суправаджаецца красамоўным для чалавека светам рэчаў, як у прадстаўленым на выставе партрэце яго вучаніцы Алены Кабішчар-Якерсон, адлюстраванай у інтэр’еры майстэрні.
У партрэтнай творчасці Кругера пераважае цікавасць да інтымнага характару палотнаў, камерных маштабаў. Мастак праявіў сябе не толькі як таленавіты жывапісец, але і як тонкі псіхолаг, здольны пранікнуць ва ўнутраны свет чалавека, як у рабоце «Дзяўчынка ў чырвоным. Партрэт дачкі Сафіі (?)», партрэце мінскай мастачкі-аматаркі і мецэнаткі Пальміры Мрачкоўскай.
Творчасць Лейбы Альпяровіча, самага маладога сярод «класічнай» трыяды беларускіх мастакоў, выходзіць за рамкі натурнага партрэтавання, убіраючы ў сябе «галасы» мастацкіх плыняў мяжы эпохі: сімвалізму, рамантызму, мадэрну. У яго партрэтах узнікае ўласцівы сімвалізму настрой таямніцы, філасафічнасці светаадчування. У іх раскрываюцца тонкія нюансы ў сферы думак і пачуццяў і ясна адчуваецца набліжэнне перамен айчыннай гісторыі, што тоіцца за знешнім, рэпрэзентатыўным абліччам партрэтаваных.
Пачынаючы з 1920-х у беларускім выяўленчым мастацтве назіраецца пэўны адыход ад канонаў акадэмізму і жывапісна-пластычных прынцыпаў позняга перадзвіжніцтва на карысць новай вобразнай мовы, пабудаванай на сінтэзе нацыянальнага каларыту і традыцый мадэрнізму. Гэта стала наступствам працэсу «нацыянальнага адраджэння», калі многія мастакі імкнуліся расшыфраваць самабытныя традыцыі мінулага, «разгаварыць» нацыянальную культуру, пачаць весці з ёй плённы дыялог у межах новых фармальных мастацкіх прыёмаў сімвалізму, постімпрэсіянізму, фавізму, экспрэсіянізму, сезанізму.
Новую старонку ў гісторыю беларускага партрэтнага жывапісу ўпісалі Міхась Філіповіч і Міхась Станюта, якія абапіраліся на народнае мастацтва і арганічна выкарыстоўвалі ў сваёй творчасці выяўленчы фальклор з яго экспрэсіяй, cа звядзеннем індывідуальных рыс да тыпу. Адсюль і выяўленчыя асаблівасці «Партрэта дачкі» Міхася Станюты, «Старога-беларуса з люлькай» і «Старога-пастуха з ражком» Міхася Філіповіча — прыярытэт плямы і плоскасці замест аб’ёму, дэкаратывізм колеру і ў цэлым лінейна-дэкаратыўная сістэма, якая адлюстроўвае нацыянальны каларыт.
Асобную старонку гісторыі беларускага мастацтва гэтага перыяду прадстаўляюць мастакі Заходняй Беларусі. Пры захаванні вернасці натурнай перадачы і ў цэлым рэалістычнай асновы працам «Партрэт спявачкі Ганны Вашкель» Язэпа Драздовіча, «Партрэт Станіслава Глякоўскага» Пятра Сергіевіча, «Партрэт дзяўчынкі» Паўла Южыка ўласцівы рамантызацыя і сімвалізацыя ў адлюстраванні выяўленчай формы, пэўная пластычная свабода. Творцы знаходзілі формы і метады паказу нацыянальнага характару, фармуючы так званы стыль «беларускага рамантызму».
На жаль, плённы перыяд асваення нацыянальных традыцый і пластычных эксперыментаў у пачатку 1930-х змяняецца адзіным метадам савецкага мастацтва — «сацыялістычным рэалізмам». Жыццё мастацтва падпарадкоўваецца ідэалогіі, стварэнню партрэта эпохі сацыяльных пераўтварэнняў. Дух і атмасферу 1930-х перадаюць партрэтныя выявы новых герояў часу — камсамольцаў, ударнікаў, калгаснікаў, лётчыкаў, працоўных. Рысы партрэта тыпу перадавых савецкіх людзей захавалі ў сваіх творах Яўген Ціхановіч, Людміла Зданоўская, Юдаль Пэн, Якаў Кругер і інш.
Наступны перыяд развіцця партрэта звязаны са зменамі ўмоў жыцця падчас Вялікай Айчыннай вайны. Цяжкія абставіны гэтага перыяду адбіліся і на характары выяўленчага мастацтва, і на яго відавых і жанравых прыярытэтах. Мастацтва пераносіць акцэнты на графіку, у жанравым рэпертуары з’яўляецца франтавая замалёўка, калі вобразы ваенных ствараліся не пасля бітваў, а непасрэдна на перадавой паміж баямі: у партызанскіх пунктах, медсанбатах і г.д. Такія партрэты-эцюды, дзе чалавек прадстаўлены ў дзейснай узаемасувязі з навакольным яго светам, пакінулі нам беларускія мастакі Сяргей Раманаў, Генрых Бржазоўскі, Сцяпан Андруховіч, Міхаіл Бельскі, Ісаак Давідовіч. Як правіла, гэта паясныя ці пагрудныя выявы з больш старанна выпісанымі галавой і рысамі твару, абагульнена, бегла намечанымі лініямі фігуры. Побач з аўтарскім подпісам змяшчаўся і кароткі тлумачальны тэкст, дзе пазначаліся месца, назва ваеннай аперацыі, фронту, злучэння, часці, а таксама звесткі пра чалавека, з якога пісаўся партрэт.
Новая, дакументалісцкая якасць, яшчэ больш усвядомленае значэнне бягучых падзей шмат у чым вызначылі рысы, уласцівыя стылістыцы гэтых работ, непатрабавальных, лаканічных і праўдзівых. У іх няма нейкіх фармальных адкрыццяў, клопату пра форму і мову, пра пластычную завершанасць, яны пазбаўлены вонкавага глянцу. Часам можа здацца, што мастак адкінуты абставінамі назад — да «азбукі», з якой пачынаў свой шлях у прафесіі. Каштоўнасць іх заключаецца перадусім у смелай сведкавай інтанацыі, жыццёвай дакладнасці.
Жывапісныя партрэты, выкананыя ў ваенны перыяд, можна ўмоўна падзяліць на дзве групы. Першую складаюць так званыя ваенныя партрэты, прычым важна адзначыць, што пераважаюць адлюстраванні не ваеначальнікаў, а партрэты радавых байцоў Чырвонай Арміі. Сапраўды ўсенародная вайна, масавыя подзвігі простых людзей, якія пайшлі на фронт і не трымалі да таго зброі ў руках, абумовілі павышаную цікавасць мастакоў да раскрыцця вобразаў сціплых, але сапраўдных герояў. Адсюль пільны інтарэс да псіхалагічнага складніка, да разнастайных праяў асобаснага пачатку мадэляў, якія знайшлі сваё пераканаўчае ўвасабленне ў партрэтах Яўгена Красоўскага, Яўгена Зайцава, Ісаака Давідовіча і інш.
Іншая разнавіднасць жывапіснага партрэта ваеннага часу паказана ў працах, дзе адлюстраваны людзі мастацтва. З’яўленне такіх твораў было выклікана тым, што ў трагічныя дні вайны многія прадстаўнікі творчай інтэлігенцыі таксама ваявалі, змагаліся з ворагам сваёй зброяй — зброяй мастацтва. У канцэртных франтавых брыгадах удзельнічалі Аляксандра Мікалаева, Глеб Глебаў, Ларыса Александроўская, Ісідар Балоцін і так далей.
Па меры набліжэння перамогі з’яўляюцца партрэты вайскоўцаў у гераізаваным выглядзе. Перад савецкім мастацтвам была пастаўлена задача стварэння «помніка эпохі», праслаўлення правадыроў і герояў вайны. Узнікае «серыйны» ўзор параднага партрэта героя-ваеннага з усімі звыклымі рысамі: з эпалетамі і ордэнамі, пратакольна-дакладным адлюстраваннем знешняга выгляду мадэлі, стэрэатыпна пластычнай манерай.
Такі рэпрэзентатыўны партрэт панаваў у беларускім мастацтве амаль да сярэдзіны 1950-х. Толькі палітычныя і сацыяльныя змены, звязаныя з развянчаннем культу асобы, унеслі істотныя карэктывы ў бачанне задач, што стаялі перад мастацтвам. На месца празмернай пампезнасці, ідэйнасці, параднасці і пратакольнага пасляваеннага мастацтва прыйшла рамантыка «адлігі» — рамантыка будняў жыцця простага чалавека.
У мастакоў з’яўляюцца новыя інтарэсы — як у тэматычным плане, так і ў падыходзе да пластычнай выразнасці. У тэматычным рэпертуары ствараюцца выявы «героя нашых дзён»: працоўнага і навукоўца, дзеяча культуры і калгасніка, студэнта і ўрача. На выставах узнёслыя вобразы артыстызму ў партрэтах балерын і актрыс суседнічаюць з жыццесцвярджальнымі партрэтамі савецкіх працаўніц, пранікнёныя і гуллівыя дзіцячыя твары — з пагружанымі ў напружаную працу абліччамі навукоўцаў.
Адбываецца абнаўленне і вобразна-пластычных магчымасцей мовы мастацтва. Пераадольваецца пэўная застыласць акадэмічнай вывучкі, мастакі імкнуцца захаваць свежасць уражання, перадаць свабоду жывапіснага дыхання. Павышаецца значнасць колеравага рашэння палатна, дынамічнасці кампазіцыі, экспрэсіі жэсту і эцюднасці.
Істотным укладам у развіццё беларускага партрэтнага жывапісу ў гэты час стала творчасць Івана Ахрэмчыка, Натана Воранава, Яўгена Харытоненкі, Уладзіміра Стэльмашонка, Леаніда Шчамялёва, Аляксандра Кішчанкі ды інш.
У канцы 1960-х — пачатку 1970-х цікавасць да вобраза чалавека набывае новую афарбоўку, мастакі засяроджваюць увагу на асобным чалавеку не як на прадстаўніку якой-небудзь прафесіі або сацыяльнага пласта, а як на індывідуальнасці. У партрэтным жанры ўзмацняюцца суб’ектыўныя, псіхалагічныя аспекты інтэрпрэтацыі вобраза мадэлі, павышаецца роля асацыятыўных, метафарычных, алегарычных і знакава-сімвалічных кампанентаў, ускладняецца пластычная структура партрэта ў цэлым, многія партрэтныя выявы імкнуцца да партрэта-карціны.
Модным становіцца партрэт інтэлектуала — вучонага, філосафа, пісьменніка. Асабліва трэба адзначыць новы жанр партрэта-рэканструкцыі. Папулярнасць творчасці беларускіх пісьменнікаў адбілася на ўзнікненні шматлікіх партрэтаў Алаізы Пашкевіч, Максіма Багдановіча, Янкі Купалы і Якуба Коласа. Характэрным з’яўляецца і інтарэс мастакоў Алеся Марачкіна, Віктара Маркаўца да чалавека ў гадах, што ўвасобілася ў шэрагу выяў. Ледзь ці не ўпершыню за мінулыя некалькі дзесяцігоддзяў узнікае цікавасць да выяўленчых традыцый народнай культуры, мастакі ўводзяць у кампазіцыйную канву партрэтаў уласцівыя традыцыйнай культуры сімвалы і знакі, «апранаюць» партрэтаваных у народны касцюм.
Рэзкія грамадска-палітычныя перамены ў жыцці краіны ў 1980-я адзначылі пачатак новага перыяду ў развіцці мастацкай культуры. Гэта не проста змена пакаленняў, а змена адзінай мастацка-эстэтычнай канцэпцыі сацыялістычнага рэалізму разнастайнасцю ідэй, стыляў і форм.
У адным з самых кансерватыўных жанраў — партрэце — таксама адбываўся актыўны творчы пошук, які адбіўся як у метадах жывапісна-пластычнай інтэрпрэтацыі, так і ў самім падыходзе да раскрыцця маральна-псіхалагічных аспектаў чалавечай індывідуальнасці.
Гэты пошук стаў рэакцыяй на вострыя палітычныя, нацыянальныя, экалагічныя пытанні: прадчуванне непазбежнасці глабальных пераменаў пераносяць мастакоў ад знешняй, апісальнай, абагульненай і тыповай трактоўкі вобразаў да раскрыцця чалавечай індывідуальнасці, даследавання духоўнага свету канкрэтнага чалавека. На першы план выходзіць псіхалагічны пачатак, сімвалічная змястоўнасць, метафарычная іншасказальнасць. К канцу 1980-х разважлівы, дапытлівы чалавек, які зведвае жаданне спазнаць, у чым сэнс яго зямнога існавання, становіцца пераважным сюжэтам беларускага партрэта.
Падобнае ўзмацненне эмацыйна-псіхалагічнага пачатку ў трактоўцы вобразаў абумовіла і ўскладненне мадэлі карціннай прасторы, насычэнне яго мантажна-калажнымі прынцыпамі формаўтварэння, нечаканымі ракурсамі і новымі праекцыямі. На змену пакаленным выявам, адлюстраваным у фас або профіль статычным постацям прыходзяць больш складаныя пластычна-прасторавыя рашэнні. Жывапісцы Уладзімір Тоўсцік, Алег Маціевіч, Мікалай Селяшчук, Алесь Марачкін надаюць значна больш увагі распрацоўцы асяроддзя вакол партрэтаванага, дамагаючыся адчування яго насычанасці і дынамічнасці.
У гэты ж час складваецца і пласт мастакоў, якія ўтвараюць у далейшым так званае «іншае мастацтва», «андэграўнд» або «другі авангард». Фармаванне новага пакалення мастацкай сцэны адбывалася на фоне «перабудовы», калі сама аб’ектыўная рэальнасць была больш ірацыянальнай за любы экспрэсіянісцкі гратэск. Магчыма, таму вынікам разважанняў Людмілы Русавай, Уладзіміра Акулава, Віктара Пятрова, Віталя Чарнабрысава, Артура Клінава, Аляксея Жданава, Віктара Шылко і многіх іншых фігурантаў «новай хвалі» часцей за ўсё становіцца аўтапартрэт, у якім з бязлітаснай праўдзівасцю адбіваюцца сумневы і трывогі, іронія і гратэск, духоўныя шуканні і пакуты мастакоў, пазбаўленых свабоды самавыяўлення.
Прапусціўшы праз сябе свет, час, чалавека, яго канфлікты, яго цяжкасці і шуканні, трывогі і надзеі і ўвасабляючы сваіх сучаснікаў, мастакі пачалі ствараць партрэты, у якіх не было ні спакою, ні радасці. Непрыманне чалавечай сутнасці, людская дэзарыентаванасць выліліся ў цэлы спектр антыгерояў з дэфармаванымі чалавечымі характарыстыкамі.
Яркім увасабленнем прадстаўленай праблематыкі сталі так званыя «мутанты» Аляксея Жданава — палотны з выявай чалавекападобных істот, якія быццам перанеслі ўсе катаклізмы ХХ стагоддзя. Гэта своеасаблівыя ананімныя партрэты паламаных і скалечаных «людзей-манекенаў», раздушаных і дэперсаналізаваных да знака.
Адчуванне драмы быцця, існавання як трывогі, тэмы фатуму, лёсу пранізваюць і партрэтныя выявы Віктара Пятрова. Самабытны экспрэсіянізм яго жывапіснай творчасці 1980-х выявіўся ў серыі работ, названай самім мастаком «Галовы» («Галовы вады» і «Галовы агню і паветра»).
Падкрэслена простыя выяўленчыя матывы гэтай серыі — застылыя ў сінім бязмоўі твары, змешчаныя ў спецыфічнае абстрагуючае асяроддзе знаходжання, маюць асаблівае знакавае гучанне, прадстаўляючы сабой нешта архетыпічнае, нязменна вечнае.
Калі ў творах папярэдне названых мастакоў пераважае сур’ёзны, асацыятыўна напоўнены падтэкст, то другой супрацьлеглай формай гэтага напрамку былі творы, у якіх цалкам адкрыта дамінавалі эмоцыі і формы выражэння, блізкія да карыкатурных.
Своеасаблівы варыянт «народнага партрэта», афарбаваны камічна-сур’ёзнымі і фальклорнымі інтанацыямі, стварыў адзін з самых каларытных персанажаў мінскай мастацкай сцэны 1980-х Віталь Чарнабрысаў. Вітальны тэмперамент і іранічнае светаўспрыманне Чарнабрысава праяўлены як у вобразным, так і ў пластычным аспектах творчасці. Іканаграфію мастака складаюць свабодалюбівыя натуры: цыганы, камедыянты, варажбіткі, музыканты, атаманы і казакі. Прытрымліваючыся традыцыйнай схемы параднага партрэта, ён адлюстроўвае сябе і іншых персанажаў у анфас, з атрыбутамі, якія надаюць арэол значнасці і гераічнасці. Аднак адчуванне ўрачыстай рэпрэзентатыўнасці сумяшчаецца з гратэскам за кошт увядзення ў выяўленчую тканіну наратываў гарадскога фальклору («Не бі птушак у Minsky», «Як люблю я VAS»), магутна вылепленай формы і лепкі колерам, інтэнсіўнасці жывапіснай апрацоўкі паверхні, што ўзмацняюць пластычны прыём камікавання.
Гратэск, іронія, завостранае перабольшанне, у цэлым экспрэсіўны жывапісна-пластычны пачатак характарызуюць таксама творчасць Уладзіміра Акулава. У партрэтах-тыпах мастака персанажы выглядаюць карыкатурна, але іранічнае ў іх вырастае да драматычнасці і нават трагізму.
Агульныя прынцыпы, якія аб’ядноўваюць творчасць усіх беларускіх мастакоў-партрэтыстаў у 1980—1990-я, заключаюцца ў першую чаргу ў выразнай філасофскай і сімвалічнай накіраванасці пошукаў. У партрэт усё больш пранікае экзістэнцыяльнае адчуванне трагізму свету і чалавечага існавання. Падкрэслены інтэлектуалізм, ускладненне ўзаемасувязяў мінулага і сучаснасці, шырокая асацыятыўнасць мыслення, метафарычнасць значна ўзбагацілі партрэтнае мастацтва і спрыялі яго выхаду за межы жанру — у шырокую філасофска-мастацкую форму спасціжэння чалавека ў гісторыі культуры.
Можна падсумаваць, што мастацтва партрэта ва ўсе перыяды ХХ стагоддзя з’яўлялася чулым барометрам стану грамадства і месца чалавека ў ім. Паказаныя на выставе партрэты — гэта дакументы эпохі, сэнс якіх немагчыма пераацаніць.
Выстава з’яўляецца не анталогіяй партрэтнага жанру, а толькі адным з мноства магчымых варыянтаў, індывідуальным куратарскім поглядам, пачынаючы з выбару партрэтаў і заканчваючы «джазавай», сінкапаванай развескай, якая дазволіла аб’яднаць у адной экспазіцыйнай прасторы каля ста пяцідзесяці асоб.
Так, прадстаўленыя раздзелы і іх межы маюць «агульнагістарычны» характар, калькуюць прыняты ў айчынным мастацтвазнаўстве храналагічны падзел. Але тэма адкрываецца для кожнага па-свойму. І мы не хацелі, каб гэтая выстава была напоўнена нейкім залішнім драматызмам або пафасам гістарызму. Абраная арганізатарамі камерная інтанацыя — гэта спроба паказаць жыццё асобнага чалавека на фоне вялікіх падзей і перамен.
Хацелася б верыць, што гэты праект стане толькі пралогам да сапраўднай навуковай працы многіх спецыялістаў, магчымай толькі ва ўзаемадзеянні розных поглядаў і меркаванняў.
Кацярына Ізафатава