«Я ніколі не пішу “з натуры” ці “па памяці”. Усе творы, і графічныя, і жывапісныя, уяўляюць з сябе “карцінкі аб памяці”. Іх змест складана пераказаць і тым больш узнавіць». Гэтыя алегарычныя мініяцюры становяцца водгукам на ўнутраны імпульс, які некалі прыцягнуў увагу творцы. Фігуратыўныя ў сваёй аснове, яны трансфармуюцца ў кардынальна іншыя вобразы, набываюць уласную трактоўку і напаўняюцца адметным сэнсам. Так, за камяком снегу ці выявай пудзіла не абавязкова хаваецца снег ці пудзіла. Тут могуць адкрыта праяўляцца сум, адчай, адзінота, што здараюцца ў жыцці кожнага чалавека.
Творца папярэджвае: у яго працах «не трэба шукаць пэўнага зместу. Усё залежыць ад індывідуальнага кантэксту і жыццёвага досведу. Калі сустракаю чалавека з сугучным адчуваннем рэальнасці, я лішні раз пераконваюся ў невыпадковасці выбранага мною шляху». Яго графіка — заўсёды экспромт, які складаецца з мазаічнасці эмоцый і ўспамінаў. Імі могуць быць самыя звычайныя прадметы: дом, дрэва, крэсла. Аднак усе яны псіхалагічна ўсвядомленыя, прапушчаныя праз прызму ўнутранага бачання. Ёсць асаблівае хараство ў першым імгненні, але асэнсаванне яго каштоўнасці прыходзіць з цягам часу.
Нязменны лейтматыў яго твораў — пустата. На метафізічным узроўні яна раскрывае глыбінную сутнасць Быцця, трагічны аптымізм якога — ва ўзаемасувязі чалавека і навакольнага свету.
«Калі я захоплены графікай, — тлумачыць Балянок, — то імкнуся адасобіцца ад атачальнай рэчаіснасці. Усё павінна быць дакладна. Няма права на няўпэўненасць ці памылку».
Графічныя мініяцюры ствараюцца аўтарам больш за трыццаць гадоў. Далёкія ад класічнага разумення, яны прапануюць новае стаўленне да жыцця, раскрываюць інтуітыўны пачатак, што на бессвядомым узроўні суправаджае існаванне чалавека: «Калі раблю штрыхі на афорце, я проста адгадваю. Ніколі не думаю, якімі яны выйдуць і ў які вобраз увасобяцца. Не баюся, што яны будуць няправільнымі і незразумелымі для іншых. Кожная рысачка — працяг мяне. Таму мне лёгка і свабодна».
У адрозненне ад графічных работ, філасофска-метафарычных па змесце, да свайго жывапісу Сяргей Балянок падыходзіць па-іншаму. Яркія, сакавітыя, напоўненыя энергіяй жыцця, жывапісныя працы выпраменьваюць невычэрпную радасць імгнення, што, як далёкі ўспамін, застаецца ў памяці чалавека. Імпрэсіяністычнасць, адухоўлены фон, звонкасць фарбаў, імправізацыйнасць прыўносяць у жывапіс характар нязменнага абнаўлення. Кожны раз, у залежнасці ад асвятлення, пары года ці ўнутранага стану, яны гучаць па-рознаму, напаўняюцца сэнсам, адпаведным пэўнаму моманту.
У жывапісе спадара Балянка пераважаюць жоўта-аранжавыя тоны. Аднак гэта не проста колер ці мастацкі эфект. Жоўты неабавязкова ўвасабляе сонца, яго значэнне глыбей: ён можа напамінаць пра цеплыню, шчырасць імгнення ці ўяўляць з сябе ўспамін пра радасны дзень («Перасохлае лета», «25-га снежня», «Абрыкосавы эцюд», «Вінны дзень»). Аўтар падкрэслівае, што не прытрымліваецца канкрэтных стылістычных кірункаў. Нашмат важней адчуваць унутраную прыроду фарбаў і пранікацца іх сугучнасцю з элементамі навакольнага свету. Аптымальным часам для жывапісу лічыць першую палову дня, бо менавіта тады востра адчувае мастацкі патэнцыял каларыту.
У творчай спадчыне Сяргея Балянка ёсць шэраг палотнаў, якія выступаюць своеасаблівым варыянтам графічных мініяцюр. Нават назвы іх могуць быць аднолькавымі. Гэтая акалічнасць дае ўнікальную магчымасць рознымі відамі і сродкамі выяўленчага мастацтва максімальна наблізіцца да эмацыйнага фону майстра, убачыць свет яго вачамі.
Усе экспромты ўяўляюць з сябе «карцінкі». Калі ў графіцы на першы план выходзіць канцэнтраваны настраёвы згустак, то ў жывапісе ўражанне становіцца галоўным прынцыпам пабудовы палатна. Такая палярнасць творчасці, безумоўна, зыходзіць з індывідуальных асаблівасцей светаўспрымання, з жыццёвага досведу, якія моцна паўплывалі на фармаванне майстра. Сяргей Балянок кажа: «Я — аптымістычны інтраверт. Мне перыядычна патрэбная адзінота, каб пасля адчуць сапраўдную, непадробную радасць ад камунікавання з людзьмі».
Так і ў мастацтве: каб быць пачутым, трэба на нейкі час адысці ад мітусні, прыслухацца да ўнутранага стану — і з новымі сіламі пачаць тварыць.
Ксенія Сяліцкая-Ткачова