Як заўсёднікі самай жывой і актыўнай кропкі на арт-мапе Мінска — Мемарыяльнага музея-майстэрні Заіра Азгура, — мы з вядомым айчынным саўнд-артыстам Яўгенам Рагозіным прадчувалі сустрэчу з нечым падобным, пакуючы аўтамабіль (паўнавартасная гукавая студыя, некалькі шкляных нарыхтовак, вуглашліфавальныя машыны, УФ-клей ды іншыя неабходныя гасцям з Беларусі інструменты і матэрыялы) у якасці шчаслівых — свежаадабраных — удзельнікаў Міжнароднай праграмы мастацкіх рэзідэнцый Новых Медыя праекта «Kavaleridze.RE:VISION», які мусіў адбыцца ў кіеўскім Музеі-майстэрні Івана Кавалерыдзэ.
Але нічога такога ў двухпавярховым каменным асабняку на Андрэеўскім спуску, дзе размяшчаецца музей, не выявілася. Статычная экспазіцыя, што шмат чаго пабачыла: пыльныя ч/б фатаграфіі на сценах, тэматычна (але крыху бязладна) — скульптуры розных гадоў на разнастайных фанерных подыумах, перамежаныя мэбляй і асабістымі рэчамі аўтара. З-за «стомленасці» інтэр’ераў і фізічна адчувальнай неабходнасці рамонту ўсё гэта вельмі нагадвала атмасферу Музея Азгура гадоў гэтак …наццаць таму. Побач з невялікай выставачнай прасторай, прыстасаванай для часовых выстаў, чамусьці ў асноўным жывапісу, больш сціплае памяшканне з праектарам: тут, напрыклад, праходзіць філасофскі лекторый. Вакол будпляцоўка — поле бою прайгранай вайны з уладамі супраць будаўніцтва публічнага туалета, там, дзе першапачаткова меркаваўся Парк скульптуры. Адзінае падабенства двух скульптурных музеяў — штат супрацоўнікаў, фанатычна адданых агульнай справе. Аднак іх энергія скіравана ў рэчышча класічна-музейнага «не шумець» і «не чапаць».
Менавіта тут нам належала стаць часткай абнаўлення музея — праграмы, распрацаванай куратарскім тандэмам Міждысцыплінарнага цэнтра развіцця мастацтва і культуры DreamProjects — Вікторыі Данелян і Таццяны Цвеладуб — разам з мастакамі краін Усходняга партнёрства і Польшчы. Паводле ідэі куратарак, рэфармацыйныя змены ў музеі-майстэрні Кавалерыдзэ мусілі быць унесены з дапамогай інавацыйных тэхналогій дзіджыталізацыі і мастацтва новых медыя.
Праект падтрымаў Украінскі культурны фонд — створаная летась у структуры мясцовага Мінкульта інстытуцыя, якая ажыццяўляе размеркаванне рэсурсаў паміж гульцамі ўкраінскай культурнай прасторы, незалежна ад іх прыналежнасці да бюджэтнага / небюджэтнага сектара. Ці, папросту, якая падтрымлівае культурныя праекты на конкурснай аснове на падставе экспертнага адбору. DreamProjects перамаглі ў конкурсе ў партнёрстве з Інстытутам Адама Міцкевіча і, адпаведна, Музеем-майстэрняй Івана Кавалерыдзэ.На працягу дзесяці кастрычніцкіх дзён сямнаццаць мастакоў з шасці краін працавалі разам у Музеі-майстэрні, каб рэканструяваць вобраз творцы, «пазбаўлены ідэалагічных штампаў і рытарычных прабелаў, як савецкіх, так і з боку дыяспары». Перад намі стаяла задача даследаваць і асэнсаваць у кантэксце ўкраінскай гісторыі і культуры яго біяграфію, мемуары, скульптуры і фільмы і прадставіць свае працы ў фінале праекта — у выглядзе выставы.
Забягаючы наперад, выстава сапраўды радыкальна змяніла экспазіцыю музея, дадаўшы ёй глыбіні і сучаснасці. І не толькі за кошт выкарыстання новых медыя. Папрацаваўшы ў фондах і архіве музея, пабываўшы ў Нацыянальнай кінастудыі мастацкіх фільмаў імя Даўжэнкі (і тут неабходна сказаць, што Іван Кавалерыдзэ быў не толькі скульптарам, але таксама і рэжысёрам, драматургам і сцэнарыстам: аўтарам дзесяці фільмаў і некалькіх тэатральных п’ес), запрошаныя мастакі звязалі спадчыну скульптара і рэжысёра з сучаснымі кантэкстамі.
Так, напрыклад, тэма бунту, што рэпрэзентавана аднайменнай жаночай скульптурай Кавалерыдзэ, стала асновай прадстаўленага на выставе даследавання ўкраінкі Светы Астроўскай «Формы бунту», у якім яе сучасніцы падзяліліся сваім разуменнем індывідуальнага пратэсту. А відэапраект Эліяс Парвулеска і Станіслава Мензелеўскага з Украіны «Таварыш Кабзар» прасачыў актуальныя тэхналогіі канструявання міфа на прыкладзе канструктывісцкага помніка Тарасу Шаўчэнку, створанага скульптарам Кавалерыдзэ, і «эксперыментальных», «мантажна-асацыятыўных» фільмаў Кавалерыдзэ-рэжысёра.
Зразумела, экспазіцыя змянілася перш за ўсё фізічна, напоўніўшыся інтэрвенцыямі новага мастацтва. Яе істотна ажывілі выдатная люстраная (+ відэа) інсталяцыя Радзівона Чычыка з Малдовы, злабадзённыя рознакаляровыя слоганы Зузаны Хертцберг з Польшчы, святло-аб’ектныя ўварванні яе кампатрыётаў Катаржыны Пірог і Паўла Жукоўскага. Нашы з Яўгенам Рагозіным маніпуляцыі з музейнымі аб’ектамі і прасторамі выявіліся найбольш эфемернымі, на мяжы прадметнасці — з-за асаблівасцяў матэрыялаў: шкла і гуку. Затое аўдыявізуальная інсталяцыя «Галава ў аблоках» нашай суайчынніцы Вольгі Салахеевай стала самай эфектнай візуальнай кропкай выставы. Мастачка зрабіла бачнай звычайна ўтоеную ад вачэй наведвальнікаў мадэль помніка Вользе, усталяванага ў Кіеве на Міхайлаўскай плошчы. Яе гіпсавы двайнік у натуральную сяміметровую велічыню, «схаваны» у праёме лесвічнай пляцоўкі, дынамічна падсветлены і забяспечаны трывожным гукавым калажам аўтарства беларускага электроннага музыканта Паўла Няхаева.
Для нас, мастакоў розных краін, гадзіны нефармальных стасункаў сталі выключна прадуктыўнымі, зрэшты, гэта звычайная справа для ўдалых сімпозіумаў і рэзідэнцый. Больш дзіўным здалося тое, што ў працэсе сумеснай працы па пераўтварэнні экспазіцыі мы ўсе зблізіліся з работнікамі музея, якія дазволілі нам зрабіць вельмі шмат чаго — як я разумею, нават зусім неймаверныя з музейнага пункту гледжання рэчы. Важным камунікатыўным элементам стала безлімітная кава-машына з рознымі кандытарскімі смакоццямі, якая з’явілася ў музеі разам з праектам — як дадатковы фактар сяброўства супольнасцяў сучасных творцаў і традыцыйных музейшчыкаў.
Дадаткова праект прыўнёс у музей лекцыі і прэзентацыі, прысвечаныя сучаснаму мастацтву, а таксама расчышчаны дворык, які быў выкарыстаны для мультымедыйнага перформансу ўкраінскай удзельніцы Таісіі Мельнік «Завяршэнне Значэнняў» і далей паступіў у распараджэнне музея. Зрэшты, частка работ, створаных рэзідэнтамі, засталася ў экспазіцыі пасля завяршэння праекта.
У выніку «скачок у будучыню» атрымаўся. Заяўленыя куратаркамі «пераасэнсаванне і фарміраванне новай інтэрпрэтацыі савецкай культурнай спадчыны, укараненне лічбавых тэхналогій і дзіджыталізацыя экспазіцыі, стварэнне сучаснай камунікацыі для пашырэння музейнай аўдыторыі» сталі рэальнасцю, няхай і на кароткі час рэзідэнцыі і выставы. Да музейных наведвальнікаў і турыстаў далучыліся новыя супольнасці гледачоў, а сам ён атрымаў досвед супрацоўніцтва з іншымі культурнымі ініцыятывамі. «Kavaleridze.RE:VISION» па сутнасці ставіць кіеўскі Музей Кавалерыдзэ на азгураўскія рэйкі — зараз, спадзяемся, яму хопіць волі, сіл і энергіі, каб утрымацца на гэтым шляху.
Павел Вайніцкі