Яго старэйшы брат, вядомы французскі сацыёлаг Люк Балтанскi, нарадзіўся да гэтых падзей. І зразумела, што ў палітызаваным французскім грамадстве пасляваеннае дзяцінства Крысціяна прайшло ў асяроддзі, дзе хтосьці выжыў, а хтосьці загінуў, адны ратавалі, а іншыя здраджвалі. Загінулыя дзеці, адсутнасць людзей і іх душы сярод нас — прадметная канва многіх праектаў мастака, а метафарычная — страта, непазбежнасць памяці і забыцця, абсурднасць вайны і гвалту. Апошняя акалічнасць дазваляе Крысціяну Балтанскi бачыць рэаліі сучаснага свету сфакусавана, у прыватнасці міграцыйны крызіс, генацыд і лакальныя войны, якiя перарастаюць у рэгіянальныя, уключаючы ў варонку гвалту ўсё новыя краіны і пакаленні.
У 23 гады Балтанскi звяртаецца (1967) да аб’ектаў, фатаграфіі, тэатру марыянетак і кіно, адмовіўшыся ад фігуратыўнага жывапісу. Да 1986-га тое былі маштабныя інсталяцыі. З 1972 года Балтанскi ўдзельнічае ў documenta і Венецыянскiх біенале, але да гэтага часу застаецца працуючым класікам, развівае свае ідэі і формы. Сам сябе Крысціян Балтанскi называе мастаком прасторы, яго апошні фармат — трохканальнае відэа, якое можна ўбачыць і ў «Lifetime»: на беразе акіяна ў паўднёваамерыканскай Патагоніі трохметровыя аб’екты запісваюць выгляд ландшафту, гукі ветру, хваляў, улоўліваючы ў тым ліку восеньскую міграцыю кітоў. Гэта называецца «Містэрыі», паколькі паводле мясцовых звычаяў гаварыць з кітамі не рэкамендуецца. Творца, аднак, тлумачыць, што такім чынам ён шукае сваё месца ў прасторы.
Практычна адразу, у юнацтве, Балтанскi пачынае працаваць са святлом, дакладней, з яго крыніцамі — скіраваныя па-рознаму, яны сінтэзавалі сэнсавыя кропкі канцэптаў.
Адна з самых вядомых прац — інсталяцыя «Шанец», якая прадстаўляла Францыю на Венецыянскім біенале ў 2011 годзе. Мастак адпраўляў фатаграфіі дзяцей на нейкае падабенства вертыкальнага лабірынта-канвеера, усталёўваў лічыльнік нараджэнняў на Зямлі (пакуль інсталяцыя працуе). Велізарная канструкцыя цалкам заняла прастору павільёна, яна была злавесна падсвечана і грукатала, паведамляючы свету пра рызыкоўныя, няроўныя шанцы ўсіх, хто прыйшоў на гэтую планету.
За год да гэтага ў парыжскім Гран Пале Балтанскi прадставіў не менш гнятлівую і маштабную інсталяцыю «Асобы». Гэта была Monumenta. Запіс сэрцабіццяў, металічны скрыгат і гіганцкі экскаватар, які хапаў паношаную вопратку з груды рэчаў (25 тон, 15 м у вышыню) і кідаў іх унiз. Падлога памяшкання (13 500 кв. м) была падзелена на 69 квадратаў і падсветлена так нізка, што яны здаваліся магіламі. У будынку падтрымлівалася тэмпература 6 градусаў па Цэльсіі. Адна са сцен была выкладзеная ржавымі жалезнымі скрынкамі з нумарамі — як быццам скрынямі з прахам.
У гэты раз «Lifetime» перасягнула ўсе чаканні, зрабіўшы крыніцы святла не проста дзейным інструментам, але рукой лёсу, якая падрыхтавала людзям фатальны сыход.
Рэтраспектыва складаецца з некалькіх праектаў, частка якіх — рэплікі больш ранніх, але ўсе яны адрэдагаваныя і аб’яднаныя спецыяльна для Іерусаліма. Такая канцэнтрацыя, разгортванне ранейшых напрацовак і маштабы Музея не пакідаюць сумненняў у тым, што Балтанскi засяроджаны на анталагічнай праблеме быцця і небыцця, асноватворнай у сусветнай філасофіі, пачынаючы з эпохі Старажытнай Грэцыі. Існае, у любой сваёй форме — з аднаго боку. І тое, што сыходзіць у нябыт, валодаючы якасцю адсутнасці, то-бок здольнасцю не існаваць, быць не рэальным, — з другога. У рамках гэтых дзвюх катэгорый Крысціян Балтанскi даследуе эфект знікнення, не-вечнасці, зыходу ад часу. Небыццё яму цікавае як цень быцця, яны непарыўныя. І відавочна, што такi лёс усіх рэчаў, з’яў, людзей. З іншай нагоды сказана, але вельмі дакладна: гэта было назаўсёды, пакуль не скончылася. Любое істотнае прыходзіць з нябыту ў свет рэальнага, нейкі час у ім існуе, а затым пакідае. Драматызм, насычанасць «Lifetime» тлумачацца менавіта ўніверсальнасцю гэтых працэсаў.
Цяпер у нас няма задачы разважаць, наколькі адрозніваюцца заходняя і ўсходняя філасофія ў разуменні небыцця. Наколькі рэфлексуе з нагоды напоўненасці быцця-небыцця экзістэнцыйная думка, а Балтанскi і яго брат Люк акурат уваходзяць у круг французскіх інтэлектуалаў, якім блізкi гэты кірунак. Мы спынімся на ўпартасці: многія гады мастак павышае планку, распавядаючы пра двуадзіную карціну свету.
Усяго ў «Lifetime» 17 праектаў, сярод іх — «Апошняя секунда», «Аўтапартрэты», «Паміж часамi», «Вяртанне». Самы знакаміты, напэўна, «Алтар ліцэя Чэйза ў Вене», чый правобраз з’явіўся ў 1987 годзе, і Балтанскі развівае яго ўсё далей. Чатыры фатаграфіі вучняў 1931 года мікшыраваныя, але першапачаткова ўсё ж маюць ідэнтыфікацыю, а лямпы і святло накшталт кулявых адтулін ператвараюць твары дзяцей у сімвалы небыцця. Знікае ўнікальнасць, застаецца трагедыя, феномен адсутнасці — іншая прастора і іншы час. «Вочы» надрукаваныя на празрыстым тэкстылі, свабодна замацаваныя і падзяляюць драпіроўкамі ўмоўныя пакоi. Вочы дзяцей і дарослых, мужчын і жанчын адрозніваюцца няўлоўна, яны абагульненыя да той ступені, калі вы яшчэ памятаеце каментар, што яны родам з грэчаскіх пашпартоў. А потым, праходзячы з пакоя ў пакой, забываеце — гэта агульначалавечы погляд, з усіх бакоў і толькі на вас.
На 1-м Маскоўскім біенале сучаснага мастацтва ў 2005 годзе ў праекце «Прывіды Адэсы» і ў 2012 годзе ў «Мігрантах» у Буэнас-Айрэсе Балтанскi паказаў паношаныя паліто, вобраз адсутнага чалавека. Тады гэта былі людзi, якія пайшлі, загінулі, да іх заклікала памяць. Цяпер, у разгорнутай рэтраспектыве, гэта тыя, хто не адбыліся, і да іх заклікае мастацтва. Прыкладна так прачытваюцца «Speaking up» у «Lifetime». Тут рэальныя паліто надзетыя на дошкі, яны нахіленыя — нібы чалавек, які ідзе супраць ветру. Як толькі вы набліжаецеся да такога аб’екта, гучаць словы — і гэта ўспрымаецца як размова. Але нават і сентэнцыі трапляюць у тэму, у абвостранае хваляванне гледача. У нейкі момант вы страчваеце грань паміж рэальнасцю і выдумкай.
З відэа-арту «Маленькія душы» «Animitas (small souls)» — самы таямнічы. На беразе Мёртвага мора, а раней (2014) у чылійскай пустыні Атакама, у канадскіх снягах і японскім лесе, але заўсёды ў адкрытых прасторах, Балтанскi ўстанаўлівае высокiя металічныя загваздкі з лямпамі — яны суаднесены з зорнай картай і таксама гучаць на ветры.
«Сэрца» — чорнае люстэрка з тэхналагічнай магчымасцю для гледача запісаць свой пульс і стаць часткай новага праекта мастака. У яго «Архіве сэрцаў» ужо больш за 15 000 запісаў. Сэрцабіцці людзей будуць захоўвацца на востраве Ташыма ў Японіі, у спецыяльна пабудаваным будынку.
...Для мяне Балтанскi — міф і чалавек. Міф дзякуючы кіно: вядомы французскі рэжысёр Ален Флешэр паказваў у Мінску сваю стужку «Пошукі Крысціяна Б.» (1990), якая атрымала Гран-пры Міжнароднага фестывалю фільмаў пра мастацтва ў Манрэалі.
Я марыла ўбачыць Балтанскi ў рэальных галерэйных залах або ў гарадскiм ці прыродным атачэнні, ён ператварае, перапiсвае любое асяроддзе — індывідуальнае, гістарычнае, геаграфічнае. Балтанскi прыўносіць у яго яшчэ адно вымярэнне: у гэтай субстанцыі ўсе эпохі з мінулага і будучыні існуюць адначасова. Нельга казаць, што вучні чацвёртага класа з венскага ліцэя «сышлі з жыцця», або без эўфемізмаў — забітыя. Яны тут, побач.
Любоў ГАЎРЫЛЮК