Асалода духоўнага саўдзелу

Калісьці, у даўнейшым традыцыйным грамадстве, далучыцца да дэкаратыўна-прыкладнога мастацтва мог практычна любы чалавек. Жанчыны ткалі, вышывалі, шылі і ляпілі, мужчыны габлявалі, выпілоўвалі, тачылі і стваралі ганчарныя вырабы. У матэрыяльнай жа культуры сённяшняга дня пануе прафесіяналізм і спецыялізацыя. Месца былых твораў дэкаратыўна-прыкладнога мастацтва часта займаюць гаджаты -- тэхнічныя навінкі, у якіх увасабляецца жаданне чалавека здзіўляцца, захапляцца дзівакаватасцю і неразгаданасцю. Аднак па-ранейшаму кожны хоча адчуваць і асалоду духоўнага саўдзелу, інтуітыўнага пазнавання, што закладзена на генетычным узроўні і перададзена нам у спадчыну продкамі. Гэтую місію і выконваюць творы дэкаратыўна-прыкладнога мастацтва.