На опернай афішы фестывалю — лепшыя, на думку экспертнай рады па музычным тэатры пад старшынствам Марыны Гайковіч, спектаклі расійскіх музычных тэатраў сезона 2016—2017 гадоў. Сама афіша дэманстравала адразу некалькі вельмі выразных трэндаў, якія актыўна падтрымлівае крытычная супольнасць (экспертамі, за рэдкім выключэннем, з’яўляюцца музычныя крытыкі вядучых маскоўскіх і пецярбургскіх выданняў).
Па-першае, гэта антырамантызм: выразная ўстаноўка на тое, што самы папулярны ў публікі оперны рэпертуар — рамантычны — не модны і не прагрэсіўны. З дзясяткі опер, якія трапілі ў лік намінантаў, рамантычныя толькі дзве, прычым адна з іх («Манон Ляско» Пучыні) — гэта ўжо вельмі позні рамантызм, хутчэй адгалоскі рамантызму ў плане музычнай мовы, а сюжэтна гісторыя наўрад ці рамантычная. За оперны мэйнстрым «адказваў» адзін толькі «Фаўст» Гуно, а ў астатнім — у афішы запар оперы ХХ і нават ХХІ стагоддзяў.
Па-другое, гэта арыентацыя на гучныя імёны, незалежна ад рэальнай якасці іх прац. Толькі гэтым і можна растлумачыць наяўнасць сярод намінантаў Ганны Нятрэбка, Кірыла Сярэбранікава і Тэадора Курэнтзіса. Па-трэцяе, імкненне ўсё ж прадставіць у фестывальнай афішы спектаклі з розных эстэтычных гардэробаў.
Па-чацвёртае, сёлета «Залатая маска» як ніколі ўсур’ёз занялася менавіта сучаснай операй. Экспертная рада адабрала для конкурснага паказу рэкордную колькасць такіх твораў. Тут і тыя сачыненні, якія ў масавага слухача ўсё яшчэ праходзіць па катэгорыі «сучасная музыка» (чытай — малазразумелая, складаная для слыхавога ўспрымання абывацеля). У тым ліку брытэнаўскі «Білі Бад» (Вялікі тэатр), адроджаная савецкая класіка — вайнбергаўская «Пасажырка» (Екацярынбург), «Радзіма электрычнасці» Глеба Сядзельнікава (Варонеж) і толькі спечаныя опусы «Cantos» Аляксея Сюмака (Перм), «Чаадскі» Аляксандра Маноцкава («Гелікон») і «Галілеа» — калектыўная праца групы кампазітараў (Электратэатр «Станіслаўскі»). Нястомны пошук «Маскі» шэдэўраў у старамодным жанры, які паступова канае, выклікае шчырую павагу, гэтаксама як энтузіязм і аптымізм экспертаў. Хоць, шчыра кажучы, па-ранейшаму не шмат надзей адшукаць творы — выдатныя мастацкія з’явы.
Вынікі фестывальнага конкурсу ў большасці выпадкаў цяжка назваць сенсацыйнымі. Эстэтычныя ўстаноўкі, якія пануюць у сённяшнім расійскім оперным свеце, даўно і добра вядомыя, таму спіс пераможцаў адгадаць было нескладана. Сёлета на рашэнне журы ў немалой ступені паўплываў палітычны момант: лепшым рэжысёрам у музычным тэатры названы Сярэбранікаў, якога падтрымлівае творчая інтэлігенцыя, што не жадае чакаць канца расследавання ў дачыненні да «Гогаль-цэнтра». Пры гэтым цалкам відавочна: «Чаадскі», пастаўлены Сярэбранікавым, адкрыта прайграе многім працам самога рэжысёра на драматычнай сцэне.
Тое, што падобны выбар мае мала дачыненняў да творчага працэсу і значна больш да палітычнага, асабліва відавочна, калі глядзіш на канкурэнтаў Сярэбранікава — Дзмітрыя Бертмана з дзівосна фантазійнай пастаноўкай «Турандот», Дэвіда Олдэна з пранізлівым экзістэнцыялізмам «Білі Бада», Тадэвуша Штрасбергера з кінематаграфічным рэалізмам ягонай «Пасажыркі».
І сёлета «Маска» засталася верная свайму прынцыпу «кожнай сястрыцы па завушніцы» — менавіта таму практычна ніколі ў рашэннях яе журы лаўрэацтва ў намінацыях «лепшы спектакль» і «лепшы рэжысёр» не супадала. У гэтым годзе лепшым спектаклем прызнана не праца Сярэбранікава, а «Білі Бад» — капрадукцыя Вялікага тэатра і Англійскай нацыянальнай оперы. Твор сапраўды вельмі таленавіты і моцны, перш за ўсё сваімі акцёрскімі работамі. Тры яго артысты — Юрый Самойлаў (Білі), Джон Дашак (Вір) і Гідон Сакс (Клэгарт) — былі намінаваны, і пры тым ніводны з іх у выніку «Маску» не атрымаў: журы аддало прыз за лепшую мужчынскую ролю ў оперы Яўгену Ставінскаму за Мефістофеля ў «Фаўсце» трупы «Новая опера».
Сенсацыяй, амаль скандалам зрабілася не прысуджэнне «Маскі» за лепшую жаночую ролю ў оперы Ганне Нятрэбка (яна намінавалася за Манон у спектаклі Вялікага тэатра, упершыню за кар’еру ўдзельнічаючы ў фэсце). Оперную мегазорку абышла салістка з Екацярынбурга Надзея Бабінцава, якая атрымала прэмію за ролю эсэсаўкі Лізы ў «Пасажырцы». Яркая і цікавая актрыса і незвычайная спявачка была намінанткай «Маскі» апошнія гадоў пятнаццаць, але кожны раз прэмія мінала яе. Асабліва гэтая несправядлівасць выглядала відавочная летась, калі яе грандыёзная праца — Іаанна ў «Арлеанскай дзеве» — ніяк не была ацэненая. Прыемна, што нарэшце «ўзнагарода знайшла героя», але, здаецца, у творчай біяграфіі Бабінцавай меліся куды больш цікавыя і значныя працы.
Разам з Нятрэбка намінаваўся і яе муж тэнар Юсіф Эйвазаў (за партыю дэ Грые ў той жа «Манон»). Каб зусім не пакрыўдзіць зорную пару, журы прыдумала для іх спецыяльны прыз (адзін з двух) з крыху двухсэнсоўнай фармулёўкай «За ўнікальны творчы дуэт». Другі спецпрыз журы атрымала пастановачная каманда пермскага «Cantos’a» з фармулёўкай «За мастацкую цэласнасць і стварэнне наватарскай формы музычнага спектакля ансамблем аўтараў і выканаўцаў». Супраць гэтага запярэчыць цяжка — наватарства прадукцыі відавочнае, хоць не відавочная прыналежнасць опуса да опернага жанру. Атрымаў персанальную «Маску» і кампазітар Аляксей Сюмак («Праца кампазітара ў музычным тэатры»), абышоўшы Аляксандра Маноцкава і каманду «Галілеа».
Лёгкае здзіўленне выклікала і прысуджэнне прэміі ў катэгорыі «лепшы дырыжор» Оліверу фон Донаньі (за екацярынбургскую «Пасажырку»): якасць музычнай працы першай у Расіі пастаноўкі лепшай оперы Вайнберга ўвогуле асаблівых пытанняў не выклікае. Але канкурэнты ў славацкага маэстра былі больш чым моцныя — дастаткова назваць Уладзіміра Федасеева з невымоўнай па магутнасці і адначасова тонкасці інтэрпрэтацыі пучыніеўскай «Турандот». Дый сам факт таго, што 85-гадовы сусветна вядомы дырыжор упершыню ў жыцці зрабіў оперную пастаноўку ў сябе на радзіме, напэўна, «Масцы» варта было б адзначыць.
Своеасаблівы перапынак у штогадовым абсыпанні «Маскамі» Тэадора Курэнтзіса, заўсёднага фаварыта фэсту, выклікаў амаль камічны эфект: маэстра атрымаў чарговага «слоніка» — але не за оперу, а за балет («Папялушку» Пермскага тэатра), хоць яго праца ў «Cantos’e» была як мінімум цікавай.
Намінацыі сцэнаграфічнага характару дасталіся Полу Стэйнбергу (за «Білі Бада») і Аляксандру Навумаву (за «Саламею» Марыінскага тэатра). І ў абодвух выпадках гэта ўспрымалася як увасабленне ўсё таго ж прынцыпу даць усім хоць што-небудзь (ва ўмовах, калі многае было ацэнена не па вартасці). Такім чынам, быў зроблены «рэверанс» у бок дзівоснага спектакля Вялікага тэатра, які ўвогуле абдзялілі. А таксама хоць неяк заахвоцілі Марыінку — шматгадовы лідар «Маскі» ў апошнія гады стабільна не атрымлівае нічога альбо толькі свайго роду суцяшальныя прызы.
Здзіўленне выклікала і тое, што ніводнай прэміяй не ўганараваная геліконаўская «Турандот»: крыўдна не толькі за патрыярха Федасеева, але ўвогуле за працу тэатра, на дзіва тонкую і разумную, дарэчную ў кожнай сваёй іпастасі і дэталі. На жаль, засталася незаўважанай журы рэдкая ўдача Дзмітрыя Бертмана, які ўжо даўно не выпускаў такіх гарманічных і цікавых спектакляў (у адрозненне ад 1990—2000-х, калі яны з яго сыпаліся, як багацце з рога).
Затое поўнае задавальненне выклікаў факт, што нічога не атрымалі варонежская «Радзіма электрычнасці» і маскоўская «Манон Ляско»: першы спектакль — вельмі слабы (надзвычай нецікавая праца знакамітага Міхаіла Бычкова), ды, мабыць, не надта пераконвае і сам твор (опера Сядзельнікава), па якім ён пастаўлены; другі — прэтэнцыёзны (і не толькі таму, што запрошаны звышдарагія суперзоркі Нятрэбка і Эйвазаў). Рэжысёр Адольф Шапіра відавочна перагрузіў «Манон» элементамі забаўляльнымі (напрыклад, шоу трансвесцітаў) і асветнымі (на заднік сцэны праектуюцца велізарныя кавалкі тэкстаў абата Прэво і тармозяць дзеянне).
Музычныя навінкі, якія так падтрымлівае «Маска» (оперы Сядзельнікава, Сюмака, Маноцкава і групы «Галілеа»), хутчэй за ўсё, не будуць мець ніякіх наступстваў для расійскага опернага кантэксту, рэпертуару нашых тэатраў не папоўняць і застануцца аднаразовымі праектнымі акцыямі. Галоўная прычына — у недастатковай таленавітасці саміх партытур, што без спецыяльнай «раскруткі» наўрад ці здольныя ў будучыні прыцягнуць чыю-небудзь увагу.
Аляксандр Матусевіч