Беларускі ўдзельнік — галерэя «Арт lіbrum». Яе кіраўніца Ала Зміева прадставіла працы Ілоны Касабука, Віктара Копача, Эміля Зянько ў праекце «Цывілізацыя».
Манахромная графіка Ілоны, іншасказальная і паэтычная, парадаксальным чынам пераклікаецца з масіўнай скульптурай Віктара з каменю і алюмінію — іх метафары скіраваныя адзін да аднаго на касмічнай вышыні, дзе ўжо не праглядаюцца фігуратыўныя сюжэты. За выключэннем ложачка дзіцяці, пакінутага Творцам у чалавечай цывілізацыі.
Трэці ўдзельнік — Эміль Зянько — прадстаўляе відэа-арт.
«Арт-Вільнюс — 18» лагічна працягвае і лагічна працягваецца. Мне суседскі арт—кірмаш дапамагае ў назіраннях за працэсамі ў сучасным мастацтве, за атмасферай і пошукамі новых форм, пытанняў і адказаў... А часам ўжо не хочацца пытанняў, дый радуюць толькі калегі, нашы розныя інтэрпрэтацыі таго, што адбываецца. Усе новыя ідэі і рэпрэзентацыі, і публіка, якой усё гэта цікава — незалежна ад бэкграўнду і акалічнасцяў.
З пункту гледжання сваіх глабальных задач «Арт—Вільнюс» таксама лагічны — упарта праматуе само мастацтва і яго рынак. Галерэі лакальныя, мастакі, як цяпер модна, не ўсе зоркі, але і маладыя — ад аскетычных у arte povera да амбіцыйных у маштабных інсталяцыях у адкрытай прасторы, агульныя ж задачы — глабальныя.
«Арт-Вільнюс» практычна не абмяжоўвае тэматычныя рамкі, але вызначае сэнсавыя акцэнты. Сёлета гэта незалежнасць трох балтыйскіх дзяржаў, 100-гадовы юбілей. «Гісторыі людзей, іх вызваленне сталі часткай многіх прац мастакоў, — расказала на адкрыцці куратарка Дыяна Стоміне. — Я запрашаю вас адчуць гэтую хвалю свабоды, наш агульны балтыйскі вопыт, як калісьці ў 1989-м, калі два мільёны чалавек, узяўшыся за рукі, паказалі свету Балтыйскі шлях».
Тры інстытуцыі-партнёры падзялілі з асноўнымі ўдзельнікамі задачу. «Казка? Гучыць добра!» — пагадзіліся Lewben Art Foundatіon у асобным праекце з італьянскай куратаркай Франчэскай Фераніні. У пяты раз гэты фонд удзельнічае ў літоўскім арт-кірмашы, паказваючы ўнікальную калекцыю сучаснага мастацтва. Яшчэ адзін спецыяльны партнёр — МОСАК (Музей сучаснага мастацтва ў Кракаве) — уразіў сваёй «Найноўшай гісторыяй у мастацтве» з гістарычнымі рэмінісцэнцыямі і візуальнымі пераасэнсаваннямі. Нарэшце, некамерцыйная праграма TAKAS аб’яднала некалькі персанальных праектаў і стала яшчэ адным адкрыццём «Арт-Вільнюса».
На гранях: паміж відовішчным і шматзначным
Адна з самых яркіх прац кірмашу, проста хіт і хайп — «Мадонна» Індры Марцінкевічэне з Вільнюса. Гэта вобраз маці, якая сышла, калі дзяўчынцы было 11 гадоў. Шасцёра дзяцей цягнуць рукі да маці, а яна як анёл-ахоўнік бачыць іх здалёк. Але «сапсаванаму» погляду крытыка, вядома, адкрываецца іншае: мадонна хаваецца ад натоўпу, ад мітусні і прагнасці, ад трывожнасці чырвонай гамы магутнай інсталяцыі. Гэта той плюш і аксаміт, што задушаць усё жывое, і гэта — аголены нерв, абвастрэнне ўсіх гендарных праблем, уключаючы харасмент, дзе перамяшаныя і барацьба за вяршэнства, і слабасць бяспраўнага. Мадонна не можа за сябе пастаяць, яе дабраславенні занадта эфемерныя для гэтага свету, а бясконцыя сэлфі на яе фоне выглядаюць як яшчэ адна пагроза.
«Балтыйскі бансай» ад Саўлюса Вайтэкунаса прадставіла галерэя Terra Recognіta (Літва). Саўлюс вядомы як майстар канцэптуальных упрыгожванняў, але камяні, якія вырастаюць у рондалях, я аднесла б да здаровых правакацый.
Яшчэ адзін «мілы» аб’ект — «Вельмі падазроны ружовы чамадан» Марка Маетамма (Эстонія): пластык, лаўкостарскія памеры і медзведзяня на баку, а насамрэч — падрабязна прапісаная канцэпцыя няўпэўненасці сучаснага чалавека, які не знаходзіць сябе ні ў пачуццях, ні ў справах, ні ў добрым, ні ў кепскім. І нават падарожжа — ці то задавальненне, ці то зноў кантроль. Са словамі: «Усё ок. Сядайце, расслабцеся і адпачніце ад свайго жыцця».
Івэта Лаўрэ (Латвія) працуе ў паблік-арт. Яе «100 метраў мастацтва» — наскрозь сацыяльнае выказванне і гучнае без гуку. Для Івэты характэрны прыём незвычайнай праблематызацыі простых рэчаў. Яна робіць жаночую сукенку з цукерак (тэкстыль), малюючы вобраз з салодкага жыцця, але выглядае гэты ўбор як жорсткая металічная кальчуга. Яе сасіскі як арнамент упрыгожваюць знак помніка, абароненага ЮНЕСКА, яна завешвае імі фахверкfвы будынак (XVІ стагоддзя) рэзідэнцыі — па словах Івэты, гэта пытанне аб рэсурсах, што ўкладаюцца ў мастацтва. Іх недаравальна мала, і сучасныя мастакі не змогуць пакінуць пасля сябе спадчыну, годную гісторыі. Некаторыя гледачы бачаць у сасісках фалічны сімвал і гендарную праблематыку — Івэта згодная з інтэрпрэтацыяй: у мастацтве ёсць відавочная мужчынская прысутнасць, і — без усялякага фемінізму — яна пераважае!
Арт-рынак: паміж «так» і «не»
Зразумела, сітуацыя з рынкам шмат у чым адрозніваецца ў розных краінах, але пры такім зборы аўтараў і багацці самых разнастайных прапаноў хочацца знайсці агульнае. І мабыць, адразу ўзнікае пашырэнне: арт-рынак — гэта поле паміж мастаком і пакупніком? Эканомікай, веданнем і пачуццём? Дзяржавай і арт—інстытуцыяй? Дзе варта шукаць адказы і ці гэта адзін адказ?
З аднаго боку, відавочны энтузіязм удзельнікаў арт-кірмашу натхняе нястомнасць арганізатараў, якія ўжо ў 9-ы раз збіраюць прадстаўнікоў свайго рэгіёна і настойліва пашыраюць поле дзейнасці. Вельмі важна: «Арт-Вільнюс» шукае рэзананс актуальных формаў у мастацтве з пераменамі ў жыцці грамадства, з навізной нашых запытаў, трывог, адчуванняў.
А з іншага... Пастаянна даводзіцца чуць нараканні на тое, што рынку няма, куратараў няма, мастака ніхто не бачыць... Што «банкі» — умоўна — не павінны быць адзінымі калекцыянерамі, гульцамі і г.д. І гэта таксама ўстойлівая пазіцыя, якая не зрушваецца на пляцоўках дыскусій.
Дык ці ёсць арт-рынак у нашых краінах? З гэтым пытаннем я звярнулася да мастакоў і галерыстаў.
Аляксандр Шчалушэнка, уладальнік украінскай галерэі «Цэх»: «Я раблю калекцыянераў з простых лекараў і настаўнікаў! Навяртаю іх у сваю веру. Бачу, як людзі ходзяць да мяне ў галерэю, глядзяць, і раблю ўсё, каб яны вярталіся і куплялі творы мастацтва... На міжнародныя кірмашы трэба ездзіць. У мяне ёсць філіял тут, у Літве, я езджу у Базель, у Стамбул, у ЗША, у Бахрэйн, у Берлін. Працую эксклюзіўна з пяццю аўтарамі; напрыклад, Рустам Мірзоеў эксперыментуе з каларыстыкай, прыдумаў уласную тэхналогію накладання колераў і ў яго ёсць свае прыхільнікі. Яўген Пятроў — зусім іншая гісторыя, гэта графіка, акварэль. Гэтых украінскіх мастакоў я прасоўваю вельмі актыўна».
Дыта Луза, мастачка з галерэі Agіja Suna: «Рух да рынку ёсць, але вельмі павольны. Людзі пачынаюць разумець, чаго не хапае ў іх дамах — кніг і мастацтва. Але трэба ўсведамляць: пакупнікі твораў мастацтва — гэта доля ад аднаго працэнта, прычым у любой краіне. Усе ведаюць, што мастацтву патрэбна падтрымка дзяржавы. Мне здаецца, у Літве яна большая, чым у Латвіі, гэта варта адзначыць. Мы адкрылі галерэі ў гэтых дзвюх краінах і вельмі рады за “Арт-Вільнюс” — бачна, які высокі ўзровень у арт—кірмашу».
Індра Марцінкевічэне, літоўская мастачка: «Я выбіраю супрацоўніцтва з дызайнерамі. У прыватнасці, з дызайнам мэблі, працую з тэкстылем. Укладваю ў свае працы іронію, вобразнасць, вельмі люблю кантрасты ў колеры — у мяне незвычайная мэбля. Але людзі часам шукаюць якраз такія аб’екты, усе стаміліся ад клішэ, ад штодзённасці. Мае рэчы выдатна прымаюць на кірмашах, я бывала і ў Мінску: адчула вялікі інтарэс, такое бывае, калі ў дызайне працуе мастак».
Фатаграфія: паміж дакументам і канцэпцыяй
На думку Санаты Балікайтэ, нязменнай куратаркі «Арт-Вільнюса», фатаграфіі сёлета няшмат, я ж вылучу «Дыслакацыю» Эвалдаса Іванаўскаса (Гарадская галерэя Панявежыса). Мабыць, яна таксама з разраду «паміж наіўнасцю і абстракцыяй»: Эвалдас здымае паверхню зямлі, каменя і іншых натуральных рэльефаў такім чынам, што вы ўжо не разумееце, гэта макра-здымка або назіранні з дронаў за незямнымі цывілізацыямі. Дзе мы ўвогуле жывем, дзе апынулася чалавецтва? Чорна-белыя кадры ў фармаце 100х120 см вельмі прыцягальныя і шматзначныя.
Гульню з маштабамі выбіраюць Раймондас Пакніс і Арунас Балтэнас, якіх прадстаўляе Віленская фатаграфічная галерэя. Руіны цэркваў XV—XVІІ стагоддзяў, якія ў фармаце 157х131 см2 таксама выглядаюць як ускраіна цывілізацыі, сталі для іх вобразамі. Адсылку да нашага Уладзіміра Суцягіна нельга не зрабіць.
Цікава, што своеасаблівы пейзаж выбіраюць у фатаграфіі нават італьянцы — галерэя Іmmagіnarіa Artі. Яна паказала абстрактныя геаметрычныя формы — амаж Элю Лісіцкаму і гарадскія віды з акна — магчыма, тут важна было зламаць канон.
Акадэмія як Бэнксі
Наогул сысці ад клішэ — падыход, актуальны і ў традыцыйных відах і жанрах мастацтва. Такімі я ўбачыла на «Арт-Вільнюсе» жывапіс і графіку: застаючыся ў іх рамках, мастакі не адмаўляюць сабе ў жаданні пагарэзіць. А ўжо калажы і зусім «адпускаюць» сітуацыю.
Увогуле на кірмашы многае мяняецца месцамі.
Напрыклад, віленская архітэктурная галерэя Nulіnіs Laіpsnіs стала пераможцам з фатаграфічным праектам Саўлюса Славінскаса ў 2016 годзе. Гэта былі паветраныя і адначасова геаметрычныя формы (калі такое ўвогуле злучаецца) і сапраўды не клішэ — ні для архітэктараў, ні для фатографаў сам Саўлюс і яго ракурсы не былі сваімі. У гэтым годзе Nulіnіs Laіpsnіs у асобе свайго кіраўніка Томаса Грунскіса вярнулася да «архітэктуры» — з драўлянымі кубікамі ў інтэрактыўнай канструкцыі. Ведаючы Томаса, магу з упэўненасцю сказаць: мелася на ўвазе ўсё, што заўгодна, акрамя дрэва і кубікаў. Напрыклад, канструяванне ментальнага асяроддзя чалавека.
Галерэя Віленскай акадэміі мастацтваў вельмі пераканаўча раскрылася ў стылістыцы графіці Бэнксі («Сон» Кястуціса Васілюнаса), і гэта відавочны крок ад традыцыі да дэмакратычнага, парадаксальнага мастацтва.
У цэлым брутальных і трэшавых прац у экспазіцыі было менш, чым у апошнія гады. Больш за тое, футурыстычныя матывы раптам памякчэлі. Такая Лайма Драздаускайце з «Абочынай дарогі» (каўнаская галерэя Aukso Pjuvіs) і пяшчотная Дыта Лузе з партугальскімі панадворкамі, куды пункцірна ўпісаны абрыс каня, або балконамі, куды ніхто не ўпісаны, але раптам іх сінь усё вакол засланяе.
Як стаць пераможцам
Упершыню не ўдзельнічае ў «Арт-Вільнюсе» наша галерэя «Ў», якая неаднойчы перамагала — з фотаздымкамі Ігара Саўчанкі і ўласна як галерэя.
Сёлета журы назвала імёны Владзіса Урбанавічуса (Латвія), Іварса Друле (галерэя Alma, Латвія) і Рымаса Сакалаўскаса (галерэя Meno Nіsa, Літва).
Іварс Друле паказаў тэхналагічны праект, дзе асноўная частка — шматтысячны архіў здымак закінутых латвійскіх вёсак. Іх можна ўручную «перагортваць» у драўлянай стужцы Мёбіуса. Складанасць задумы ў тым, што стужка час ад часу прыходзіць у непрыдатнасць, але, у адрозненне ад аб’ектаў, яе можна паправіць.
Па словах чальца журы Андрыса Вітолінса, «трэба бачыць, як расце мастак у XXІ стагоддзі. Як ён разумее тэму, якое відэа, музыку і іншыя формы выкарыстоўвае, які рытм ва ўсім праекце. Мы бачым якасць мастацтва, бачым, як падрыхтавана экспазіцыя. І так, вельмі важна прыцягнуць гледача, спыніць яго ўвагу. Паверце, гэта складана. Калі ёсць лонг-ліст, важны кожны голас, таму журы — міжнароднае, а за перамогу вядзецца рэальная барацьба».
Любоў Гаўрылюк