Падчас фэсту «Утопія, Месца, якога няма» я сустрэлася з дырэктаркай Аннай Лок. Каб адчуць характар гэтага месца.
— Я мэтанакіравана шукала новую пляцоўку для рэалізацыі мастацкіх праектаў. Тым часам супрацоўнічала з утрымальнікамі бара, і мы планавалі здымаць агульнае памяшканне, дзе меркаваліся і бар, і дызайнерскія майстэрні, і выставачная прастора. Такія ж платформы працуюць як крэатыўныя хабы: усе падтрымліваюць адзін аднаго. Прыйшла сюды ў пазамінулым жніўні. Тут яшчэ была сталовая, але завод планаваў яе закрываць. Увесь трэці паверх падыходзіў нам паводле ўсіх параметраў. І сёння да нас далучыліся дызайнеры, Бюро «Месяца фатаграфіі» ў Мінску, інтэлектуальныя гурткі і нейкія іншыя праекты. Мы працуем у кааперацыі з «Месяцам фатаграфіі»: адзін месяц у годзе — гэта іх час. Тут некалькі ініцыятыў, але я займаюся пераважна галерэяй.
Прастора з асаблівай аурай і даволі змрочнай спадчынай. Як вы ўвогуле рашыліся на акультурванне такога месца?
— Ідэя сталоўкі — гэта вельмі савецкі праект, з моцнай матывацыяй, за кошт якога, нібыта, грамадзяне вызваляліся ад пабытовага цяжару. Дзеля таго ж і ствараліся месцы агульнага ўжывання таннай ежы. Ідэя гучыць цудоўна. І калі я ўпершыню ўбачыла кухню, была натхнёная гэтымі квадратнымі вокнамі, добрым святлом. Я ўспрыняла гэтую прастору сапраўды як вызвольную. Тут яшчэ ёсць спакуслівыя памяшканні — цэхі, якія хораша перарабляюцца ў крэатыўныя прасторы. Але іх цяжка перапрафіляваць пад месцы, дзе могуць праводзіцца масавыя мерапрыемствы. Гэта дастаткова доўгі, нудны і нецікавы працэс. Мяне не спалохала тут змрочная аура (а яна, безумоўна, тут адчуваецца). Памяшканні насамрэч незычлівыя, і праз год працы магу ўжо сказаць: прастора тут не самая лёгкая — яна задае пэўныя межы. Але іх можна пашыраць ці неяк акрэсліваць, удакладняць.
Ці быў тут нейкі мінімальны рамонт?
— Гэта пасля рамонту ўжо. Тут было нашмат горш. Мы ўсё перафарбавалі — з блякла-зялёнага і вохрыстага ў нейтральны шэры. Аднак завод, у якога мы арандуем памяшканні, не дае нам ніякіх гарантый, таму спыніліся на афарбоўцы. Прыклады вакол не натхняюць…
Дамова ў нас толькі на два гады. Таму я лепш буду ўкладацца ў добрыя выставы ды іх суправаджэнне.
Самая першая экспазіцыя была створана ў лістападзе мінулага года, калі тут яшчэ была сталовая, — фатаграфічны праект Януса Сагмы, удзельніка Венецыянскага біенале ад Эстоніі. Пасля былі выстава Аляксея Талстова «Аскепкі», потым «Месяц фатаграфіі», выстава Сяргея Кірушчанкі «Выхоўваць новыя густы» і некалькі фестываляў.
І як вам сёння гэтая прастора? Абмяжоўвае ці сапраўды разнявольвае? Зразумела, што не кожны мастак можа яе асвоіць...
— Памяшканне вельмі кантэкстуальнае. Гэта не «белы куб». Ды мы й не планавалі яго тут рабіць. Але ў нас ёсць магчымасць раздрабіць канструкцыю — пераладаваць прастору, скарыстоўваючы часовыя сцены (калі гэта патрэбна мастаку і куратарам). Маю досвед куратарскай працы з такімі вялікімі, не белымі, прасторамі. Але ў мяне таксама ўзнікаюць складанасці: я не магу тут рабіць спантанных выстаў — толькі дакладнае планаванне і грунтоўная падрыхтоўка. Хоць зразумела, што падчас мантажу дапушчальныя нейкія змены. Але не глабальныя. На «Месяцы фатаграфіі» памяшканне падзялялі адмысловымі канструкцыямі, і дзеля гэтага рабілі асобныя белыя кубы. Цяпер у нас выстава, у якой дамінуюць відэа-арт і саўнд-арт, і яны тут вельмі арганічныя.
Мастак павінен выразна разумець, чаму яму патрэбна выставіцца менавіта тут, ЯК ягоны праект можа быць звязаны з гэтым месцам. У Мінску ёсць іншыя прасторы, больш дагледжаныя і нейтральныя.
Ці з’явіліся мастакі, якія ўжо выявілі цікавасць да «Сталоўкі»?
— Так, але пакуль мы працуем толькі з тымі аўтарамі, якіх самі запрашаем. Гэта звязана з бюджэтам. Бо мастакі, што сюды просяцца, чакаюць ад нас нейкай дапамогі.
Пасля «Месяца фатаграфіі» ў нас адбылося толькі чатыры выставы, і больш не атрымліваецца — яны вельмі затратныя і працаёмістыя.
Адзін з такіх аўтараў — Сяргей Кірушчанка...
— Ён прыйшоў год таму і натхніўся гэтай сталовай. Сказаў, што будзе рабіць творы адмыслова для нашага памяшкання. Мы з ім спрацаваліся, і ён сапраўды год ствараў палотны. Мы папрасілі Аляксея Талстова напісаць крытычны тэкст. І запрасілі Канстанціна Дарашэнку з Украіны — у якасці эксперта.
Я не ведаю, ці можна ў гэтай прасторы рабіць выставу «прыгожага мастацтва» — больш мэтазгодна знайсці іншую пляцоўку ў Мінску. Мы яшчэ не працавалі з малымі формамі.
Наступная выстава будзе ў сакавіку, а пасля Сяргей Шабохін пакажа праект «Практыкі падпарадкавання». З лета хацелі б запусціць рэзідэнцыі з нямецкімі і аўстрыйскімі мастакамі. Гэтыя памяшканні будуць здавацца пад майстэрні, і ў іх жа будуць наладжвацца адукацыйныя мерапрыемствы.
Сённяшні праект, «Утопія, Месца, якога няма», натхнёны атмасферай савецкай сталоўкі?
— Не, работай Алесі Жыткевіч са словамі «Часовая ўтопія», прэзентаванай тут падчас фестывалю. Я падумала, што гэтую ідэю можна разгарнуць. Мой запыт да мастакоў быў наступны: існуе канцэпцыя ідэальнага ўтапічнага чалавека, які ўступае ў канфлікт з чалавекам рэальным, з ягонымі праблемамі, ідэнтычнасцямі, комплексамі, адукацыяй. Папрасіла раскрыць гэты канфлікт. Пасля сустрэчы з Аляксеем Братачкіным, які напісаў тэкст, мы акрэслілі канцэпт «страчанай утопіі». Пры гэтым мне хацелася размаўляць не на глабальным, а на лакальным узроўні. Таму мы выбралі некалькі сацыяльных груп, і я прапанавала мастакам з імі папрацаваць. Хацелі ўлучыць і людзей з інваліднасцю, але мы знаходзімся на трэцім паверсе, то, відавочна, гэтая акалічнасць скасоўвае магчымасць такой супрацы. І як бы я ні хацела зрабіць галерэю інклюзіўнай і антыдыскрымінацыйнай, нейкая група застаецца па-за ўвагай. Прастора не прыстасавана для ўсіх. Тут ёсць ліфты, але яны не працуюць — такая вось частка антыўтопіі. Падчас фестывалю адбываецца шмат адукацыйных імпрэз — іх праводзяць розныя грамадскія ініцыятывы. Быў вечар перформансаў. Вольга Сасноўская паказала праект, прысвечаны культуры савецкіх свят — даволі ўтапічнай практыцы, а Дзіна Даніловіч і Горан разглядалі тэму людскіх узаемаадносін. Гэта самая рамантычная наша частка. Усе астатнія работы больш крытычныя. Для выставы мы вырашылі скарыстаць «гарлавіну» шэрага калідора: перад дзвярыма размясцілі міжнародны праект групы NON UNO DI MENO, якая выступае супраць гвалту з жанчыны. Мне яны цікавыя тым, што выраслі з арт-ініцыятывы, стварыўшы затым палітычны маніфест, — на іх дэманстрацыі ходзіць да трохсот тысяч чалавек.
У зале размешчаны тэкст Аляксея Братачкіна пра канцэпцыі страчанай утопіі і ідэальнага чалавека, пра паняцці глабальнага і лакальнага. І тут пытанне: калі «спускаешся» да маленькіх праблем, ці не перастае гэта быць утопіяй... Жанна Гладко паказала тры работы — квінтэсэнцыю яе трох тэм: адносіны з бацькам (тэма гендарная), адносіны з рэлігіяй і тэма, што тычыцца межаў перамя-
шчэння. Сяргей Шабохін працуе з тэмай утапічных гарадоў: ён стварыў праект, прысвечаны роднаму гораду, якому сёлета спаўняецца 60 гадоў. На карце горада відаць літары «ССС», але «Р» — няма: краіна развалілася, і апошняга дома не збудавалі. Замест «Р» на макеце гэтых дамоў аўтар змяшчае відэа, у якім ягоная прывідная выява рухаецца ў канкрэтным ландшафце. Мастак турбуецца пра будучыню, пра тое, што здарыцца з горадам. Ці дабудуюць літару «Р»? Ці нешта іншае з’явіцца на гэтым месцы?
Праект Алесі Жыткевіч — своеасаблівы аналіз руху і памежжа. Яна задае дакладныя пытанні: якія прывілеі даюць магчымасць перасоўвацца, куды ты хочаш; якія нябачныя бар’еры паўстаюць на тваім шляху. Інсталяцыя Глеба Кавальскага — пра стэрэатыпы. Гэта пакой, у якім можна развітацца з уласнымі стэрэатыпамі, пакінуўшы іх... надпісамі на пластыкавых целах. І цяпер ужо можна пабачыць: месца там не засталося.
Мастакі адказалі на мой запыт. Нехта наўпрост, нехта выбраў больш складаны варыянт. Будзем доўжыць і пашыраць гэты праект. А час працы выставы таксама вырашылі падоўжыць — да 3-га сакавіка.