Сяргей, адкуль вынікла думка ставіць спектакль пра мора, якое так далёка ад нас, ды яшчэ ў жанры хронікі катастрофы? Тэатр бярэцца за сапраўдны дакумент, але праз «жыццё чалавечага духу» (якое, у сваю чаргу, зазнае драматургічную апрацоўку), імкнецца да абагульнення і нават метафарычнасці (жыццядайная вада робіцца атрутнай і забівае); маляўнічыя жанравыя сцэны суседзяцца са споведзямі; нарэшце, насуперак «новай драме», класічна вылучаецца герой, які ахвяруе сабой дзеля выратавання свету...
— Я бачыў, як пераканаўча «ратавалі свет» Брус Уіліс, Чарлі Шын, Кіану Рыўз…
І знакаміты галівудскі «К-19» з Харысанам Фордам у ролі капітана? У «Падводніках» ёсць персанажы і сцэны, чый пафас і сэнс наўпрост перагукаюцца з «К-19». Дарэчы, былыя савецкія падводнікі не толькі паставіліся да яго станоўча, але і абаранілі рэжысёрку Кэтрын Бігелоў ад прэтэнзій самых паслядоўных вымагацеляў так званай «праўды жыцця».
— А я паглядзеў гісторыю мічмана Івана Кулакова, выкладзеную рэжысёрам Уладзімірам Бокунам. Наш суайчыннік, беларус тройчы хадзіў у рэактар атамнай падводнай лодкі і застаўся жывым. Мяне кранула і скаланула гісторыя людзей, якія апынуліся ў пастцы пад вадой — як у велізарнай кансервавай бляшанцы — і ўласнымі сіламі, на мяжы немагчымага не далі свету сканаць. У 1960-я. Карыбскі крызіс. Супрацьстаянне палітычных сістэм. Савецкі Саюз ці Злучаныя Штаты? Усё абвастрылася, як сёння! Мяне ўразіла гэтая часавая паралель, я на хвіліну ўявіў вертыкаль падводнай лодкі… Апоўначы тэлефаную Андрэю Курэйчыку і прашу яго напісаць п’есу пра падводнікаў, выкладаю ідэю: гара і дол, верхні і ніжні адсекі, да якіх далучаны рэактарны… Гэта — наша тэма. Мы перажылі Чарнобыль. Мы маем пра што апавесці. Андрэй адгукнуўся адразу, але было шмат варыянтаў, спробаў, перш як матэрыял канчаткова займеў сваю сцэнічную форму.
Такім чынам, вы адштурхнуліся ад дакумента, але новая сцэнічная рэальнасць вынікла па-за «праўдаю жыцця»?
— І ў гэтым — праўда мастацтва. Як у спектаклі «Пане Каханку» — яе таксама «правакаваў» я і яна вымагала працягу ў «Падводніках»: узнікла думка пра сцэнічную трылогію з працоўнай назвай «Шлях беларускі». Я разгледзеў тры моцныя моманты жыцця нашай краіны: страту дзяржаўнасці ў Вялікім Княстве Літоўскім, Беларускую ССР і сённяшнюю Рэспубліку Беларусь. Так што будзе і трэцяя частка, бо хачу прааналізаваць беларускі шлях, высветліць, адкуль ідзём і куды кіруемся. Сёння ў свеце пануе сытасць, а гэта нагадвае паваенную часіну, славутыя шасцідзясятыя, калі свет ачомаўся ад Другой сусветнай вайны, з’явіліся прадукты, рэчы, адзенне, аднавіліся сувязі… Пасля любой перабудовы, любой страты надараюцца такія часы. Які прыярытэт у чалавецтва сёння — наладаваная лядоўня з прадуктовым запасам?
У «Падводніках» сцэна падзелена на гару і дол, вельмі шчыльна выкарыстана авансцэна. Матросы каўтаюць паветра, гуляюць, забаўляюцца, спрачаюцца — масава выходзяць з вертыкалі на гарызанталь і авансцэну, што стварае адметную атмасферу выйсця і вольнасці, кантрастам да якой — змушаная замкнёнасць макетавай падлодкавай прасторы пры задніку сцэны. Вонкава ўсё ўразліва: гарызанталь усёахопнае вольнасці і вызвалення перасякае вертыкаль лодкі — абавязку, прысягі, цвёрдасці; чаргаванне мізансцэн, выбудаваных па гарызанталі і вертыкалі, накрэслівае ў глядацкай свядомасці адзнаку перакрыжавання, а потым метафарычнага ўкрыжавання (матросы, барукаючыся, бавяць час, падтрымліваюць вобраз — вертыкаль як бы «кладзе на крыжы» гарызанталь). Рэактарны адсек, гэткае «жарло драгон» сярэднявечнага міракля, куды кіруюцца ўласнаю воляй і адкуль, насуперак традыцыі, вяртаюцца. Здаецца, на сучаснай сцэне ажываюць старажытныя жахі, але з тою розніцай, што для гледачоў яны — праўда жыцця. Здаецца, канструкцыя сцэны тэатра імя Горкага ўжо не адпавядае сучасным эстэтычным чаканням, бо каробцы-скрынцы перадаецца нерухомасць модулю глядзельні і гэта ўзмацняе агульную заціснутасць тэатральнага памяшкання. Між тым асобныя моманты пастаноўкі скіраваныя рассунуць сцэнічную прастору; яны, здаецца, імкнуць праз рампу, праз залу, праз уваходы-выхады… Старыя сцены і традыцыйная тэатральная пабудова відавочна стрымліваюць дзеянне.
—Я не дбаў пра тое, каб пашырыць прастору як мага. Мне куды больш рупіла сціснутая, замкнёная прастора падводных памяшканняў. Ала (Сарокіна — сцэнографка спектакля. — Рэд.) змагалася за кожны сантыметр вышыні макета, бо на сцэне — няпростае інжынернае збудаванне, якое мусіць вытрываць дваццаць чалавек артыстаў у самых розных фізічных задачах. Тры тоны важыць канструкцыя. Не варухнецца.
Але парыпвае драматургічная канструкцыя: прыкладам, дзяўчынка Святлана, дачка героя, якая нарадзілася пасля выпрабаванняў у рэактары, выглядае дэкларатыўна, ці не ўвесь сцэнічны час здае глядзельні справаздачу пра бацьку і наступствы ягонай дзейнасці.
— Я б скінуў гэта на рахунак «новае драмы», дзе можна гаварыць і апавядаць, не клапоцячыся пра матывіроўку альбо мэтазгоднасць. Маналог сёння ў любы момант перапыняе дзеянне, нават імкнецца яго сабою падмяніць. Драматургі вельмі хораша выпісваюць маналогі — часам лепей за адбудову сцэнічнага дзеяння. Я неяк папытаў у аднаго: як ставіць тваю п’есу, калі траціну дзеі займае тэлефонная размова? Як мне, рэжысёру, трэба круціцца, каб утрымаць увагу залы на такім прыёме?! П’еса Курэйчыка мае дэкларатыўныя і нават, як ты кажаш, справаздачныя моманты, але я іх адпусціў за кошт дакументальнасці. У падводнікаў такі парадак — усё па тры разы занатоўваецца па трох журналах (гэта ж не сакрэт, што іх потым вывучалі — так, што службовыя справаздачы зрабіліся падмуркам навуковых прац). Я прасіў артыстаў як мага прыціснуць пафас ды эмоцыі і перамаўляцца — па ўнутранай сувязі падлодкі — як перамаўляецца з імі памочнік рэжысёра, выпускаючы на сцэну. Будзённа. Дзяжурна. Гэтаксама гучаць каманды «асталявацца на верхняй палубе» і «аварыйная трывога». Вызначыцца нам моцна дапамог кансультант Уладзімір Мікалаевіч Варашнін, капітан 1-га рангу, камандзір атамнай падводнай лодкі. Прыкладам, заўважыў на рэпетыцыі, што «так падводнікі не ходзяць». Як «так»?! Ён тлумачыць: метр сюды, метр туды — і мора, які «раўнуй—зважай—крокам руш»?! Не трэба рапартаваць — і, каб выклікаць у гледача адчуванне дакументальнасці, мы не рапартуем. Ніхто з нас не служыў у ваенным флоце, але...
Але ў нас надарыўся Чарнобыль, і там былі свае Кулаковы. У аповедзе пра падлодку 1960-х мірсцяцца чарнобыльскія краявіды: мы не зжылі шок 1986 года, калі мірны атам пастукаўся ў кожны дом.
— Але, я міжволі думаў пра падабенства Чарнобыльскай атамнай станцыі і лодкі, якая ішла на вучэнні з нявыпраўленымі хібамі ў канструкцыі. Як рэжысёр-дакументаліст я добра ведаю чарнобыльскія варункі, некалькі разоў здымаў зону адчужэння, быў за дзесяць кіламетраў ад станцыі, наведваў выселеныя вёскі. І гэтая тэма мяне вельмі хвалюе сёння — чалавецтва мусіць адказваць за свае ўчынкі. Калі мы сядаем у самалёт, дык разлічваем на тое, што канструктары і пілоты ведаюць законы аэрадынамікі. І мы даляцім. У нас будуюць атамныя аб’екты — мы разлічваем на тое, што канструктары і будаўнікі валодаюць адпаведнымі ведамі. Бо калі не навучаныя, не валодаюць — мы самі сябе можам знішчыць.
1908 год. З’яўляецца п’еса Метэрлінка «Сіняя птушка» з персанажам Душа Ночы і яе знакамітым тэкстам пра тое, што не ўсе таямніцы свету можна даверыць чалавеку, а некаторыя дык і схаваць трэба. Мо пакуль таямніца схаваная, чалавек маральна, эмацыйна і як яшчэ саспее «быць смелым, каб бачыць схаванае». Верагодна, сёння «схаванае» можна трактаваць як адказнасць за спазнаную таямніцу і за тое, што з ёю рабіць.
— Таму з’яўленне Русалкі, якая за ўсё чалавецтва выгаворвае Васілю Міцкевічу (артыст Руслан Чарнецкі), — невясёлая нота. Я схіляюся да таго, што Сусвет ставіцца да нас крытычна і… творыць цуды: у мічмана Івана Кулакова нарадзілася двое дзяцей — пасля рэактара! Калі з’явіўся першы драматургічны эскіз з дачкою Міцкевіча, я палічыў гэта ледзь не блюзнерствам, пакуль Андрэй не давёў мне праўду жыцця. Цуд? Магчыма, узнагарода герою за тое, што ён уратаваў свет. 600 рэнтген — пакаранне ад прыроды аднаму за агульнае нядбайства і эгаізм, і гэты, асобны, усвядоміў іх як пакаранне — Руслан Чарнецкі падкрэсліў фінальным маналогам, свайго роду споведдзю. Яна з’явілася падчас рэпетыцый, бо нель-
га было пакінуць спектакль «без маралі», як казалі колісь, — каб з’яўленне дачкі ў апрамененага чалавека ўспрымалася шанцам для чалавецтва. Для мяне гэта пытанне веры: трэба ісці і ратаваць, і, акрамя героя, гэтага не здолее зрабіць ніхто. Магчыма, гэта і з’яўляецца раскаяннем, і самога героя ратуе ягоная дзейснасць.
Антаганісты спектакля — старпом і зампаліт, чый канфлікт прыцягнуў з шасцідзясятых згадку пра фізікаў і лірыкаў...
— Гэта канфлікт практыка і тэарэтыка, які жыве паводле ўстаноўкі, у нашым выпадку — ідэалагічнай. Але часам практыка супраціўляецца. Практык ведае, як рабіць, ідэолаг-тэарэтык замінае. Практык дазваляе сабе кпіць з інструкцыі, дзе напісана, што пры аварыі трэба змагацца за цэльнасць усяе лодкі, але як і чым — не ўдакладнена. Калі браць шырэй, без ідэалогіі нават падводная лодка не выжыве (гаворка ж, натуральна, не пра партыі і з’езды). А гэтыя канфліктныя полюсы патрэбны Камандзіру: артыст Іван Іванавіч Мацкевіч у гэтай ролі выявіў вельмі важную тэму — чалавечае ганарыстасці. Камандзір гатовы на ўсё, каб давесці, што ягоная лодка і экіпаж — найлепшыя, і толькі пасля стратаў і ахвяраў усведамляе цану самаўпэўненасці, з якой пагадзіўся весці нявыпрабаваную лодку на вучэнні. Мацкевіч як артыст вельмі глыбока займаўся роллю і высветліў, што ў камандзіра была думка пра самагубства. Так з’явілася сцэна з пісталетам, які Камандзір зараджае, нейкі час думае і дастае з яго патроны — хвіліна слабасці праз страшэнную стомленасць. Фінал сцэны — усведамленне, у што абышлася чалавецтву і самым дарагім людзям ягоная ганарыстасць. Амбіцыя, вырастаючы да касмічных памераў, ператвараецца ў зло, бо мэта робіцца няважнай — а сёння свет такі, што трэба ўзважваць, як ты яе дамагаешся. Мне здаецца, вяртаецца прыярытэт чалавека адказнага. Сумленнага. «Дрэнна, калі лодку да з’езду робяць, — кажа старпом, — а не за тым, каб яна хадзіла і ворага біла», — і зампаліт парыруе, маўляў, што, нашы з’езды не падабаюцца? На гэта службовец адказвае: рэч у пэўных руках пэўнага чалавека, які можа схібіць… бо ўвечары святкаваў, а сёння рукі калаціліся… Магчыма, мы папросту не ўсведамляем, якую энергію закранулі. Я неяк здымаў мінскую ТЭЦ-5 — энергаўстаноўку на пяць паверхаў, — і мільганула думка:
а калі менавіта зараз з ёй што-небудзь здарыцца? Я, цар прыроды, што я магу зрабіць?! Чалавечае жыццё побач з такімі аб’ектамі, перапрашаю, мізарнее. Змянілася фармулёўка, трэба пераглядаць і стаўленне: чалавек — аніяк не цар прыроды, а ўсё яшчэ яе вучань, складнік, аб’ект…