Рэпартажы і артыкулы аб месцах зняволення ў нашай краіне перыядычна з’яўляюцца ў сродках масавай інфармацыі. Але на дакументальным экране гэтая тэма ў найноўшыя часы не ўздымалася. І вось шматгадовае табу аказалася парушанае.
У стужцы «Дэбют» Анастасіі Мірашнічэнка (вытворца «Першая КінаВідэаКампанія», прадзюсары Віктар Лабковіч, Дар’я Лабковіч) паказанае жыццё ў папраўчай калоніі №4, якая месціцца наўпрост сярод жылых кварталаў Гомеля. Асаблівасць калоніі ў тым, што ў ёй утрымліваюцца жанчыны, прычым тыя, хто ўпершыню патрапіў за высокі плот з калючым дротам наверсе. Шмат хто з іх і раней меў праблемы з законам. Але для ўсіх насельніц ПК №4 гэта дэбютнае з’яўленне ў месцах зняволення.
«Дэбютам» называецца і стужка Анастасіі Мірашнічэнка. У аснову сюжэта пакладзена праца ўнікальнага праекта «Тэатр у турме». У 2004 годзе Беларусь наведаў шведскі акцёр Ён Ёнсан, які ставіў у турмах Швецыі і Амерыкі спектаклі з удзелам пажыццёва зняволеных і асуджаных на вялікія тэрміны. Праект быў ухвалены Дэпартаментам выканання пакаранняў МУС Беларусі і пачаў жыць і ў беларускіх папраўчых установах. Дарэчы, яго спрабавалі рэалізаваць ва Украіне і Расіі, але там усё скончылася пастаноўкай усяго толькі аднаго твора. У ПК-4 спектаклі ставяць кожны год з новым акцёрскім складам. У якасці рэжысёра-пастаноўшчыка выступае акцёр Гомельскага абласнога драматычнага тэатра Аляксей Бычкоў. Паказы звычайна ладзяць у клубе калоніі, але на гэты раз актрыс чакае сюрпрыз — прэм’ера на вялікай сцэне гарадскога тэатра з удзелам кіраўніцтва МУС і, галоўнае, родных і блізкіх...
Сюжэт «Дэбюту» чапляе гледача сам па сабе. Адзінаццаць асуджаных жанчын на працягу больш чым паўгода рэпеціруюць на сцэне, паступова раскрываючы свае характары перад камерай. У кадр трапляюць амаль што ўсе аспекты жыцця калоніі. Швейная вытворчасць, сталовая з кухняй, жылыя памяшканні. Спецыфічныя дэталі — г.зв. «сушылкі» — адпаведныя месцы для вільготнай бялізны, пастраенні па атрадах, вобшук па чарзе некалькі разоў на дзень...
Глядач, які чакае ад «Дэбюту» нейкіх смажаных фактаў, бадай, будзе расчараваны. Пры ўсёй строгасці і замкнёнасці папраўчай установы, у ёй няма відавочнай суворасці. Няма нават, здавалася б, абавязковых кратаў на вокнах інтэрнатаў, дзе жывуць асуджаныя. І тым не менш «Дэбют» — адна з рэдкіх стужак, дзе вельмі дакладна перадаецца пачуццё няволі.
Сама Анастасія Мірашнічэнка даўно не дэбютантка. Колішняя выпускніца двухгадовых рэжысёрскіх курсаў Беларускай дзяржаўнай акадэміі мастацтваў мае багаты вопыт у тэлевізійнай дакументалістыцы. У 2013 годзе яна зняла нашумелую не ў адной краіне стужку «Перакрыжаванне» аб лёсе гомельскага мастака Валерыя Ляшкевіча, а літаральна месяц таму быў паказаны ігравы альманах «Мы»: навела рэжысёркі «Папутчык» шмат кім прызнаецца ў ім за лепшую.
Як і «Перакрыжаванне», «Дэбют» пачынаўся таксама па ўласнай ініцыятыве, з дапамогай сцэнарысткі Алены Антанішынай, прадзюсары падключыліся крыху пазней. Здымкі праходзілі кожную суботу, дзень рэпетыцыі ў турэмным тэатры, на працягу восені 2015 — зімы-вясны 2016 гадоў. У выніку аператарам Аляксандрам Марозам было адзнята некалькі дзясяткаў гадзін відэаматэрыялу. Спатрэбіўся амаль год працы над ім і тры працоўныя мантажныя версіі, пакуль «Дэбют» у сярэдзіне кастрычніка быў нарэшце прадстаўлены мінскай публіцы. Далей, у лістападзе, былі конкурсныя паказы на IDFA — бадай, самым уплывовым фестывалі дакументальнага кіно ў Амстэрдаме — і кантракт на сусветную дыстрыбуцыю з адной з адпаведных кампаній-лідараў.
Фільм Анастасіі Мірашнічэнка выклікаў вялікую цікаваць фестывальнай публікі і прафесіяналаў не толькі сваёй тэмай і краінай паходжання. Беларускія дакументалісты кожны год бываюць на амстэрдамскім фэсце, але ў конкурсе IDFA нашай стужкі не было даволі даўно. «Дэбют» бярэ гледача не геаграфічнай экзотыкай, а даверлівай інтанацыяй.
Сучасная дакументалістыка даўно перарасла межы тэлевізійнага фармату. Карціны-назіранні, эксперыменты без закадравага тэксту і нават наогул без словаў, нарэзка рэальнасці — звычайныя госці фестывальных праграм. Беларускі «Дэбют» не саромеецца паказваць рэальнасць такой, якой яна ёсць насамрэч, але без залішняй драматызацыі. Яе і не трэба: галоўная эмоцыя ў стужцы — гнятлівае адчуванне няволі, маркотнае цячэнне часу, выражанае гадамі прысуду. Агульны план маркотных, аднолькавых радоў пустых коек у інтэрнаце-казарме або выгляд велізарнай ванны з бульбай, падрыхтаванай на вячэру асуджаным, самі па сабе надзвычай гаваркія, не патрабуюць аніякага закадравага каментарыя.
Большая частка фільма складаецца з назірання за рэпетыцыямі спектакля. П’еса для тэатра за высокім плотам падабрана адмысловая — яе падзеі разгортваюцца ў псіхіятрычнай клініцы. У цэнтры драмы — лёс несправядліва пакрыўджанай жанчыны. Фрагменты рэпетыцыі на сцэне ўдала спалучаюцца з размовамі актрыс, якія чакаюць свайго выхаду ў глядзельнай зале. Так паступова раскрываюцца характары гераінь. Кожная з іх пражывае на экране асабістую драму. Рэжысёрка толькі некалькі разоў карыстаецца прыёмам сінхроннага інтэрв’ю. Лепш за словы гавораць твары жанчын, часцей за ўсё найграна вясёлыя. Сапраўдныя боль і адчай праяўляюцца ў моманты размовы з роднымі па тэлефоне, у неверагодна эмацыйнай сцэне спаткання з сям’ёй і дзецьмі.
Частка эпізодаў стылізавана пад здымкі з камер відэаназірання. Рэжысёрка карысталася камерамі GoPro, але толькі таму, што арыгінальныя запісы маюць надта нізкую якасць для дэманстрацыі на вялікім экране. Але адчуванне няволі даюць не гэтыя кадры, а трапна заўважаныя рысы мясцовага існавання — ногі і абутак асуджаных жанчын, пашыхтаваных па атрадах у калоны, чэргі на абавязковы перыядычны вобшук, бясконцыя пераходы з корпуса ў корпус пад пільным наглядам кантралёраў. Нарэшце, сама прэм’ера ў будынку сапраўднага тэатра і надзея на тварах актрыс-дэбютантак — магчыма, пасля гэтага ў іх жыцці нешта зменіцца.
Аўтарка свядома не распавядае падрабязнасці спраў сваіх гераінь. Аб тэрмінах і крымінальных артыкулах удзельніц турэмнага тэатра мы даведваемся толькі пад самы канец, у кароткіх, трапных кадрах адмысловых картак над койкамі асуджаных. Поўнаметражны (80 хвілін) «Дэбют» дэманструе дэталі функцыянавання беларускай пенітэнцыярнай сістэмы ўскосна. Але драматургія стужкі пабудавана так, што галоўным у ёй становіцца лёс асуджанай беларускай жанчыны І апошняе вельмі ацанілі ўдзельнікі пакуль адзінага публічнага паказу карціны ў Мінску.
У Беларусі ёсць і яшчэ адна папраўчая калонія для жанчын, праўда, ужо для рэцыдывістак. Верагодна, там рэжым утрымання больш строгі. А калонія ў Гомелі знешне нагадвае вялікую фабрыку — працоўныя інтэрнаты з пакоямі на пару дзясяткаў чалавек, швейнае прадпрыемства, дзіцячы садок-яслі... Так, калі жанчына-асуджаная чакае дзіця, то пасля нараджэння яно таксама застаецца за высокім плотам. Як гэта адбылося з 23-гадовай актрысай спектакля Алінай і яе сынам. Зняволеныя маці маюць права двойчы на дзень наведваць сваіх дзяцей. Менавіта кадры наведвання Алінай свайго хлопчыка адны з самых кранальных у «Дэбюце». У першапачатковых мантажных версіях гэтых кадраў было больш. Але Мірашнічэнка свядома пакінула толькі два эпізоды, каб падкрэсліць розніцу ва ўзросце малога, які за паўгода прыкметна вырас за калючым дротам.
Другі эпізод — фінальная сцэна выхаду Аліны з калоніі. Выхавацелька перадае падрослага сына на рукі маці, і тая ставіць яго на зямлю. Пакуль ішлі рэпетыцыі спектакля, малы навучыўся хадзіць. Напужаўшыся незнаёмых людзей на вуліцы, хлопчык раптам скіраваўся да дзвярэй свайго першага дома — ПК №4...
Анастасіі Мірашнічэнка давялося дзясяткі гадзін размаўляць са сваімі гераінямі, каб выклікаць іх давер да аб’ектыва. У выніку — шчырыя слёзы з абодвух бакоў. Праўда, слёзы самой аўтаркі засталіся за кадрам.
P.S. Практычна ніхто з былых асуджаных актрыс у гомельскай ПК № 4 за краты больш не трапляе.