Нам цікавыя як сучасная музыка, так і творы стогадовай даўніны, але малавядомыя, не заіграныя. Ганаруся, што «Санорус» — адзін з нешматлікіх калектываў у Беларусі, які выконвае сучасную польскую музыку. Тамтэйшая кампазітарская школа — адна з самых моцных у свеце, як і інструментальная, дарэчы.
У Польшчы існуюць трывалыя традыцыі ансамблевага музіцыравання. Чаму Нацыянальны аркестр польскага радыё (не сталічны, працуе ў Катавіцах) лічыцца адным з лепшых у краіне? У Сілезіі, дзе развітая вугальная прамысловасць, у асяроддзі гарнякоў было распаўсюджана захапленне духавымі інструментамі. Існавалі самадзейныя ансамблі, агромністыя калектывы, ладзіліся агляды — так узнікалі традыцыі сумеснага выканання. Нездарма сімфанічны аркестр быў створаны тут аж 80 гадоў таму.
Не лічу, што ў мастацтве колькасць заўжды пераходзіць у якасць. Але ў Польшчы шмат Акадэмій музыкі і філіялаў у розных гарадах. У любым выпадку кансерваторыя не адна на ўсю краіну. Наогул адукацыя і музычныя структуры развітыя і разнастайныя. Практычна ў кожным горадзе ёсць уласны аркестр. Ва ўсіх цэнтрах ваяводстваў існуюць філармоніі. Оперныя тэатры — у Варшаве, Познані, Вроцлаве, Кракаве, Бытаме, Гданьску. Дарэчы, нядаўна ў сталіцы адкрылі новы оперны тэатр — Каралеўскі. Музычнае жыццё віруе. Новую філармонію ўзвялі ў Шчэціне, новую залу ў Кельцах, у Вроцлаве з’явіўся Нацыянальны форум музыкі. Яны выглядаюць вельмі эстэтычна. Але галоўны клопат — акустыка, прычым спецыялісты працуюць над ёй ад пачатку будоўлі.
Чаму сучасная музыка ў Польшчы так актыўна развіваецца? Бо калектывы ўвесь час яе выконваць. Сродкі, заробленыя больш папулярнымі праграмамі, выдаткоўваюць на найноўшыя партытуры. Такім чынам выканаўцы выхоўваюць у слухачоў чуласць да новых музычных стыляў, цікавасць да эксперыментаў і пошукаў.
Для мяне як дырыжора важна падтрымліваць творчыя сувязі на Захадзе. Усё-такі я жыў у Галандыі каля пяці гадоў, калі набываў там другую вышэйшую адукацыю — оперна-сімфанічнае дырыжыраванне. Некалькі гадоў працую ў Польшчы з лепшымі тамтэйшымі аркестрамі. У 2014-м, калі быў галоўным дырыжорам у «Санорусе», я выйграў конкурс на пасаду асістэнта дырыжора Нацыянальнага сімфанічнага аркестра Польскага радыё, і пачаліся сумесныя праекты з калектывам. Ён лічыцца адным з лепшых у краіне. Тры гады таму аркестр займеў залу, якая ўваходзіць у дзясятку лепшых канцэртных пляцовак Еўропы.
А што датычыць твораў польскіх аўтараў у праграмах «Саноруса», дык мы — адзіны калектыў, які ўдзельнічаў у 100-гадовым юбілеі Вітальда Лютаслаўскага. Дзякуючы падтрымцы Польскага інстытута ўпершыню выканалі ў вялікай зале Белдзяржфілармоніі яго вельмі вядомы «Ланцуг». У той вечар прагучалі і «Варыяцыі на тэмы Паганіні».
У праграму юбілейнага канцэрта ўваходзіла і надзвычай знакамітая Трэцяя сімфонія Генрыха Гурэцкага. Кампазітар родам з Сілезіі, доўгі час быў рэктарам Катавіцкай кансерваторыі. Існуе дакументальны фільм «Please find Henryk Gorecki», зняты Віялетай Ротэр-Казэра. Стужка — менавіта пра поспех сімфоніі, якая на працягу дзесяцігоддзя займала верхнія радкі чатаў класічных радыёстанцый ЗША і Вялікабрытаніі. Яго Трэцюю сімфонію ўпершыню я выканаў як дырыжор у 2010-м у Ратэрдаме. А ў 2013-м «Санорус» першы раз увасобіў гэтае сачыненне ў Беларусі. З імем Гурэцкага звязана шмат маіх думак і перажыванняў.
У жыцці хапае нечаканага і разам з тым заканамернага. Адно з самых яркіх уражанняў студэнцтва — сачыненні польскага аўтара Паўла Лукашэўскага. Не так даўно мы з ім сустракаліся ў Варшаве. Вандроўка Паўла ў Мінск меркавалася летась, але пакуль не адбылася. Плануем, што здарыцца ў 2018-м. Такім чынам, беларуска-польскія мастацкія стасункі ўмацоўваюцца канкрэтнымі праектамі, сустрэчамі і набліжэннем да слухача лепшых твораў нашых заходніх суседзяў.