Праўда, абодва пластычныя спектаклі ідуць пад агульнай назвай «Ці свяшчэнная вясна», а пра «Вяселейка» ў афішы нават не згадваецца. Уласную інтэрпрэтацыю знакавых партытур ХХ стагоддзя рызыкнула ўвасобіць Вольга Скварцова, мастацкая кіраўніца SKVO’s Dance Company, якая ўжо даўно выношвала задуму пастаноўкі на музыку Стравінскага. Дастаткова згадаць перформанс «Ідэальнае цела — жывое цела» (2015), дзе ўпершыню ўзнікла тэма ахвяры і ў якасці музычнага лейтсімвала была выкарыстана пачатковая рытмаформула з «Вясны свяшчэннай».
Для многіх харэографаў зварот да найскладанейшай партытуры Стравінскага зрабіўся своеасаблівым «момантам ісціны», пачаткам творчага ўзлёту (як, напрыклад, у Марыса Бежара і Піны Бауш) ці выпрабаваннем на сталасць (у выпадку Джона Наймаера і Сашы Вальц). Менавіта з гэтага — агляду папярэдніх сцэнічных увасабленняў «Вясны» — варта пачаць размову пра прэм’еру SKVO’s Dance Company.
Opus magnum
Дату першага паказу «Вясны свяшчэннай» — 29 мая 1913 года — можна назваць адлікам новай эры ў балеце. Славуты Леанард Бернстайн падчас візіту ў СССР адзначыў, што, хоць там і адбылася нейкая рэвалюцыя ў 1917-м, рэвалюцыя ў сусветнай музыцы здарылася на чатыры гады раней. Як у музыцы, так і ў харэаграфіі, прыдуманай Вацлавам Ніжынскім, «Вясна» парвала з Belle Epoque і ўпершыню прадэманстравала абсалютна новую, авангардную стылістыку на балетнай сцэне. Архаічная вуглаватасць рухаў, кубістычная дыскрэтнасць сцэнічнага малюнка, «скасавураная пластыка, поўная душэўнага жаху і цялеснага болю» (выказванне вядомага балетазнаўцы Вадзіма Гаеўскага), стваралі вобраз чалавека, які яшчэ не ўсвядоміў сябе асобай.
Ніводны балет Стравінскага не ведаў такой колькасці розных, часта ўзаемавыключальных інтэрпрэтацый. Адна з галоўных прычын гэтага феномену бачыцца ва ўніверсалізме музыкі «Вясны», унікальным сімбіёзе архаічнага, варварскага, першабытнага з мадэрнісцкім, механічным, індустрыяльным. На думку балетнага крытыка Паўла Гершанзона, «у гісторыі балета няма другой партытуры, з нагоды якой мастацтва выказалася б з такой вычарпальнай і палохаючай паўнатой». Паказальна, што да оpus magnum Стравінскага ў роўнай ступені звярталіся прадстаўнікі як балетнага тэатра, так і contemporary dance, сярод іх Леанід Мясін, Мэры Вігман, Марта Грэм, Кенет Макмілан, Наталля Касаткіна і Уладзімір Васілёў, Матс Эк, Мары Шуінар, Яўген Панфілаў, Анжэлен Прэльжакаж, Ксаўе Ле Руа і інш. Пры гэтым этапнымі для харэаграфічнага мастацтва сталі ўсяго некалькі спектакляў: згаданая прэм’ера Ніжынскага ды версіі Марыса Бежара (1959) і Піны Бауш (1975). У беларускім балетным тэатры «Вясна» ставілася толькі двойчы і толькі адным харэографам — Валянцінам Елізар’евым (рэдакцыі 1986 і 1997 гадоў), што ў чарговы раз сведчыць пра нешараговасць прэм’еры ў Маладзёжным. Нягледзячы на шырокі дыяпазон інтэрпрэтацый, стрыжнем большасці з іх застаюцца ключавыя матывы, зададзеныя Стравінскім і Ніжынскім: рытуал, ахвяра; супрацьстаянне прыродна-стыхійнага і сацыяльнага, індывідуальнага і масавага; эратычныя імпульсы — таемныя, як у Ніжынскага, відавочныя, як у Бежара, канфліктна-разбуральныя, як у Бауш, скандальна дэманстратыўныя, як у Прэльжакажа.
«...Ужо адхілілася стрэлка сейсмографа»
Створаная ў міжрэвалюцыйны перыяд і за год да Першай сусветнай вайны, «Вясна свяшчэнная» зафіксавала складаны час пералому, прадчуванне эпахальных гісторыка-культурных змен, імкненне да абнаўлення праз разбурэнне старога. Дынамічная інтэнсіўнасць аркестравага гучання, сутаргавыя рытмы, астынатная пульсацыя, памножаныя на дэфармацыю руху і вострыя ракурсы поз, малявалі вобраз апакаліптычнага разгулу стыхіі, «сейсмаграфічнай фіксацыі траўматычных шокаў» (паводле знакамітага выразу Тэадора Адорна). У гэтым сэнсе балет сягаў як у мінулае, так і ў будучыню, пра што вельмі трапна піша гісторык танца Лін Гарафала: «Спектакль прадказваў вайну, у якой вызвалілася зло, назапашанае ў душах людзей, і грамадства, дзе кіруе дзяржаўная машына. “Вясна свяшчэнная” апынулася прадвесніцай сучаснасці, яе канвеераў і мас, яе ваенных машын і знішчаных гарадоў разам з іх нявіннымі жыхарамі».
Менавіта гэтыя матывы сталі вызначальнымі для Вольгі Скварцовай, што прысвяціла сваю «Вясну» ахвярам генацыду, маштабных рэпрэсій і беспрэцэдэнтнага гвалту, якія адбыліся ў ХХ стагоддзі (падобная тэматыка ўласцівая танцсімфоніі «Le Sacre» па матывах «Вясны свяшчэннай» — аднаму з самых змрочных балетаў Джона Наймаера). Варта падкрэсліць, што гэта першы спектакль з выразна сацыяльным вымярэннем у рэпертуары SKVO’s Dance Company. Бездапаможнасць перад ходам гісторыі і адчайны пошук выйсця, жах перад болем і ўразлівасцю ўласнага цела, крывацечная памяць, якая не можа маўчаць, — гэтымі матывамі напоўнены ўвесь балет. Як і большасць пастаноўшчыкаў, Скварцова не адмаўляецца ад цэнтральнай ідэі ахвярапрынашэння, аднак у яе асэнсаванні знаходзіць новыя канцэптуальныя акцэнты. «У нашай інтэрпрэтацыі ахвярай у рытуале з’яўляецца не адна дзяўчына з племя — ахвярай дзеля абнаўлення становіцца ўсё племя», — распавядае Вольга.
Напачатку мы бачым цьмяную, чорна-белую, няўтульную сцэнічную прастору (мастачкай-пастаноўшчыцай выступіла сама харэографка). На задніку пакрысе пачынае раскручвацца відэавыява пласцінкі, кожны паварот якой асацыюецца з коламі памяці. Паступова сцэну запаўняюць пары, пачынаюць танцаваць пад французскую рэтра-музыку. Аднак страх знешняй пагрозы прымушае іх пакінуць уласныя месцы і дзейнічаць як адзінае цела, непадзельны арганізм. У адрозненне ад шматлікіх версій «Вясны свяшчэннай», у пастаноўцы Скварцовай няма не толькі канфлікту палоў, але нават падзелу на мужчынскую і жаночую групы: героі ўвесь час разам, бо толькі так можна супрацьстаяць варожай стыхіі.
Калі ў ранейшых спектаклях харэографка падкрэслівала індывідуальнасць сваіх артыстаў, то ў «Вясне» ўпершыню звярнулася да канцэпту так званага «калектыўнага цела». Такі падыход перагукаецца са словамі Ніжынскага, які патрабаваў ад выканаўцаў танца «згуртаваных мас, не індывідуальных праяў». Усе восем артыстаў бесперапынна знаходзяцца на сцэне, увасабляючы шырокую, складаную гаму эмацыйных станаў. Танцоўшчыкі то кідаюцца ў пошуках выйсця; то камянеюць, паралізаваныя страхам; то знітоўваюць адзіночныя пластычныя галасы ў калектыўнай малітве; то выстройваюцца ў жывую сцяну з целаў, падаюць і зноў падымаюцца, быццам пад ударамі нябачных стрэлаў. Аднак «адмова ад сябе» пакуль што цяжка даецца артыстам SKVO’s Dance Company, якія вельмі па-рознаму існуюць у межах агульных вобразна-пластычных задач.
Нягледзячы на асобныя вобразныя знаходкі, цікавыя пастановачныя прыёмы, развіццю дзеяння відавочна не хапае драматургічнай і канцэптуальнай цэласнасці. Рух аўтарскай думкі распадаецца на аскепкі асацыяцый, візуальных вобразаў, сэнсавых матываў, пазбаўленых формаўтваральнай логікі. У выніку ўвасабленне цэнтральнай ідэі балета спрацоўвае толькі на ўзроўні задумы, якая ў большасці эпізодаў маецца на ўвазе, а не выходзіць на ўзровень канцэпцыі, што злучае ў адно думку, цела, драматургію і сцэнічныя прыёмы.
І галоўнае — пры наяўнасці асобных семантычных і метрарытмічных супадзенняў, паміж музыкай і харэаграфіяй мала агульнага. Па-першае, гэта не зусім Стравінскі: партытура вельмі скарочаная, яе фрагменты перамяшаныя, нярэдка абрываюцца на паўслове і перамешваюцца з электронным саўндам аўтарства Дзмітрыя Ладзеса. Па-другое, у партытуры прапушчаны вельмі важныя моманты: напрыклад, «Вялікія свяшчэнныя скокі» — кульмінацыя ў развіцці ідэі ахвярапрынашэння. Ствараецца ўражанне выпадковага выкарыстання ўрыўкаў з работы Стравінскага, павярхоўнага асэнсавання. Усё гэта ператварае музыку ў другасны элемент сцэнічнага цэлага.
Разам з тым выказаныя вышэй думкі не адмяняюць вялікай працы і намаганняў усёй каманды, а таксама смеласці харэографкі, якая адважылася асэнсаваць такую няпростую тэму. «Вясна» ў кантэксце папярэдніх работ Скварцовай — крок у невядомае, выхад за межы апрабаванай пастаноўчай эстэтыкі, што заўсёды сілкуе творчы працэс і з’яўляцца індыкатарам «жывога тэатра».
Святлана Уланоўская