Экспертная рада па музычным тэатры, у складзе якой давялося папрацаваць і аўтару гэтых радкоў, выбрала трынаццаць твораў. Прычым у гэты лік увайшлі тры цікавыя пары: два спектаклі па оперы Шастаковіча («Кацярына Ізмайлава» Вялікага тэатра Расіі і «Лэдзі Макбет Мцэнскага павета» Самарскага опернага), два — «Асуджэнне Фаўста» Берліёза, кампазітара, які раптам зрабіўся надзвычай папулярным у нашых шыротах (Вялікі тэатр Расіі і Астраханская опера), а таксама дзве пастаноўкі ўсё яшчэ рарытэтнага ў Расіі Гендэля («Геракл» Башкірскага тэатра оперы і балета і «Радэлінда» Вялікага тэатра). Акрамя згаданага паўтузіна, на «Залатую маску» прэтэндавалі «Кармэн» Екацярынбургскага опернага, «Манон» Музычнага тэатра імя Станіслаўскага і Неміровіча-Данчанкі, «Арлеанская дзева» Башкірскага опернага, «Саламея» з «Новай оперы», «Сімон Баканегра» з Марыінкі, «Травіята» Пермскага опернага. І нарэшце адна сучасная назва — камерны твор маладога маскоўскага кампазітара Аляксея Сяргуніна «Доктар Гааз», пастаўлены ў «Гелікон-оперы». Інакш кажучы, у журы магло «разгуляцца» — выбіраць было з чаго.
На жаль, выніковае рашэнне вельмі расчаравала. Апроч намінацый «Лепшая мужчынская роля» (перамог Ліпарыт Авецісян за ролю дэ Грые ў «Манон» Тэатра Станіслаўскага) і «Праца мастака ў музычным тэатры» (лаўрэатка — Этэль Іошпе за «Саламею» ў «Новай оперы»), усе іншыя оперныя «маскі», якіх было дастаткова, улічваючы колькасць вылучаных, атрымалі толькі дзве пастаноўкі — маскоўская «Радэлінда» і пермская «Травіята». Першая прызнаная і лепшым спектаклем, і лепшы рэжысёр адтуль жа (Рычард Джонс), у другой лепшымі названы дырыжор (Тэадор Курэнтзіс), выканаўца жаночай ролі (Надзея Паўлава) і мастак па святле (Роберт Уілсан). Апошняга адзначылі толькі ў такой якасці, хоць, на маю думку, гэта абсурдная ідэя, бо Уілсан — аўтар усяго спектакля.
Атрымліваецца, што ў велізарным опернай Расіі толькі дзве вартыя пастаноўкі, прычым абедзве — не айчыннага паходжання і маюць праектны характар. Журы на поўную катушку прадэманстравала эстэтычнае крэда: еўрапейскае лепш за сваё, незалежна ад рэальнай якасці гэтага еўрапейскага.
Да моманту правядзення фестывалю (люты—красавік 2017 года) «Радэлінда» знікла з рэпертуару Вялікага тэатра: журы паглядзела яе летась у снежні, калі была прадстаўлена апошняя, трэцяя серыя паказаў. Такія ўмовы пракату гэтай прадукцыі, фактычна набытай у Англійскай нацыянальнай оперы (фармальна — капрадукцыі з Вялікім). Роля Вялікага ва ўсёй гэтай гісторыі абмяжоўваецца ўдзелам аркестра, да таго ж напалову ўзмоцненага запрошанымі музыкантамі, спецыялістамі па барока. Пракат спектакля больш падобны да гастроляў Англійскай оперы ў Маскве. У складзе спевакоў — ніводнага саліста трупы, задума твора цалкам нарадзілася на берагах Альбіёна, менавіта там прайшлі першыя паказы, а ўжо потым опера даехала да Масквы. «Радэлінда» не толькі не ўпрыгожыла сабой фестывальную афішу — яе наогул больш немагчыма будзе ўбачыць у Расіі, толькі ў Лондане. Застаецца загадкай, якое дачыненне спектакль мае да Вялікага тэатра і чаму ён — лаўрэат нацыянальнай тэатральнай прэміі. Апраўданне такога рашэння журы можна было б знайсці, каб прадукцыя ўяўляла з сябе шэдэўр. Але ж не: твор Рычарда Джонса — майстравітая актуалізацыя, што змяшчае ўмоўнае каралеўства лангабардаў у эпоху Мусаліні ды інтэрпрэтуе інтрыгі пры варварскім двары праз прызму чорнага гумару ў мафіёзным асяроддзі, а гэта наўрад ці стасуецца з сэнсамі тэатра Гендэля. Такіх пастановак не толькі ў Еўропе, але цяпер ужо і ў Расіі гаць гаці. Сапраўдныя вартасці «Радэлінды» — у гучанні аркестра і працы дырыжора Крыстафера Мулдса, але, на жаль, менавіта яны засталіся незаўважанымі журы.
Зрэшты, незаўважанымі не выпадкова: Тэадор Курэнтзіс — заўсёдны фаварыт «Залатой маскі» і асабліва той часткі крытычнай маскоўскай супольнасці, прадстаўнікі якой увайшлі гэтым разам у склад журы. Безумоўна, яго праца ў «Травіяце» ўражвае. З аркестравай яміны ліліся жывыя, трапяткія, паўнакроўныя гукі, яркія фарбы партытуры. Курэнтзіс прачытаў яе нечакана лірычна, пяшчотна, са спачуваннем. Ніякага сцёбу, ніякай «гульні», ніякага адхілення — усё гранічна шчыра, на тонкіх, але абсалютна вердзіеўскіх дынамічных нюансах і тэмбравых градацыях — яны ні ў чым не грашаць супраць рэмарак чараўніка з Бусета. Але, па-першае, гэтая інтэрпрэтацыя — ашаламляльны кантраст да таго, што адбывалася на сцэне: Роберт Уілсан зрабіў майстэрскі спектакль, але строга ў межах той эстэтыкі, якую вызнае і рэпрадуктуе ва ўсіх сваіх працах. Пустая прастора, прасякнутая незвычайным свячэннем, дзіўныя каларыстычныя кантрасты, скупыя, аднак выразныя сімвалы-маркеры (велізарныя крышталі, ледзяныя стрэлы або кінжалы, што пранізваюць сцэну). Стылёвыя касцюмы, незвычайная пластыка і грым артыстаў. Гісторыя Віялеты Валеры расказана праз паглыбленне ў тэатр марыянетак: усе ўдзельнікі драмы — ад галоўнай гераіні да статыста — увасабляюць лялек, кітайскіх балванчыкаў на шарнірах з характэрнымі схематычнымі рухамі і застылай мімікай выбеленых твараў. Спяваюць пераважна на авансцэне, стоячы шарэнгай і амаль не кантактуючы адно з адным. Дзівакаваты канцэрт — камічны і халодны адначасова — нагадваў нейкі эстэцкі рытуал, у якім мастацтва ў сэнсе штучнасці даведзена да максімуму.
Па-другое, усіх гэтых цудаў Масква не ўбачыла і не ўбачыць наогул — ні на фестывалі, ні па-за ім. Стваральнікі абвясцілі спектакль непрыдатным для транспарціроўкі, таму журы выправілася глядзець яго ў Перм. Хто можа ў гэта паверыць, калі прадукцыя з’яўляецца сумеснай працай некалькі еўрапейскіх інстытуцый (акрамя Пярмі, тэатраў і фестываляў Лінца, Люксембурга і Капенгагена) і да Пярмі ўжо паказвалася на іншых сцэнах? Гэта значыць, ад самага пачатку ўмовы канкурэнцыі былі няроўнымі: пермякі паказвалі сваю работу на ўласнай пляцоўцы, а спектакль не прайшоў выпрабаванне гастрольным пракатам у сталіцы.
Нарэшце, па-трэцяе, сёлета ўзнікла рэальна жорсткая канкурэнцыя паміж дырыжорамі (Аляксандр Анісімаў, Валерый Платонаў, Валерый Варонін, Міхаэль Гютлер, Ян Латам-Кёніг, згаданы Мулдс, Арцём Макараў, Туган Сахіеў), шматлікія працы ўспрымаліся як сталыя і высакакласныя, таму выбар Курэнтзіса з усёй процьмы гучных імёнаў — відавочная густаўшчына.
Кампрамісам, каб не зусім крыўдна было, выглядаў спецпрыз журы, атрыманы Башкірскай операй за спектакль «Геракл», — бо гэта не асноўная намінацыя. Прытым айчынны спектакль паводле Гендэля як мінімум не горшы за «Радэлінду», а калі ўлічыць яго цалкам мясцовае — да таго ж не сталічнае! — паходжанне... Кожнаму разважнаму чалавеку відавочна, што трэба заахвочваць у гэтых умовах. За бортам фестывальных прызоў засталіся шматлікія выдатныя работы. Шчыра шкада. Як можна было не заўважыць грандыёзнай рэжысуры выдатнага Рымаса Тумінаса ў «Кацярыне Ізмайлавай» Вялікага тэатра? Або гераічнае выкананне партыі Іааны Надзеяй Бабінцавай у «Арлеанскай панне» з Уфы? У параўнанні з апошняй салісткай пярмячка Паўлава глядзіцца дзіўна: яна пражывае прапанаваны Уілсанам малюнак ролі пераканаўча і здатная быць выразнай ва ўмовах фармальнага тэатра, але яе каларатурная тэхніка далёкая ад дасканаласці. Надзея Бабінцава пакідае ўзрушальнае ўражанне і нараджае ў душы сапраўднае захапленне: прыгажосць, моц яе голасу і выдатная вакальная культура гарманічна спалучаюцца з прадуманай (выканаўцай і рэжысёрам Філіпам Разянковым) акцёрскай ігрой, што стварае вобраз складанай, супярэчлівай натуры.
А як можна было прайсці міма «Асуджэння Фаўста» з Астрахані — спектакля дзіўнага, тонкага і адначасова яркага, візуальна багатага, з феерычнай сцэнаграфіяй, зробленага з велізарнай фантазіяй і філасофскім разуменнем задум Берліёза і Гётэ (рэжысёр Канстанцін Балакін, мастачка Алена Вяршыніна)? У гастрольным пракаце ў Маскве пастаноўка прайшла максімальна якасна, без страт.
Вядома, хтосьці скажа, што дагадзіць усім немагчыма і конкурс — гэта заўжды барацьба: усе адразу не могуць быць пераможцамі. Але відавочна прыгнятае адкрытая вузкасць поглядаў і сляпая прыхільнасць да эстэтычных клішэ, якія так выразна прадэманстравала гэтым разам журы фестывалю.
Аляксандр Матусевіч