Таццяна, вы неверагодна танцавалі характарныя ролі — Мерсэдэс у «Дон Кіхоце», Зарэму ў «Бахчысарайскім фантане», партыі ў спектаклях сучаснай харэаграфіі — Блудніцу з «Карміна Бурана», Дзяўчыну з «Балеро», Ганну з «Жарсцей». Самі адчувалі, што гэтыя вобразы — вашы?
— Я сапраўды добра танцавала характарныя партыі, бо ў мяне былі бліскучыя педагогі. Нельга скідваць з рахунку і знешнасць. Акрамя таго, адчувала сутнасць кожнага вобраза, а ўнутраны тэмперамент заўсёды падказваў моманты, у якіх роля прагучала б асабліва ярка. Усё разам і дапамагала быць пераканаўчай на сцэне. Але мяне часта называлі «сінтэтычнай балерынай», бо я так жа добра адчувала сябе і ў класіцы. Проста ў мой час у балеце існавала такое паняцце, як «адпаведнасць амплуа». І гэтае амплуа «характарнай артысткі» да мяне, шчыра казаць, «прыклеілася». Хоць я хацела чагосьці большага. Затое пашанцавала дакрануцца да творчасці, да дзівоснай харэаграфіі Валянціна Мікалаевіча Елізар’ева, дзякуючы якому я і адбылася як артыстка. Яго спектаклі станавіліся падзеяй у свеце танца, пасля ўдзелу ў пастаноўках Елізар’ева загаварылі і пра мяне.
А сярод партый якія вы лічыце найбольш удалымі і значнымі?
— Такімі ролі становяцца тады, калі пачынаеш іх дакладна разумець. Ты іх аналізуеш, ацэньваеш і паступова ставішся да іх інакш. Бо ты сам развіваешся, рухаешся наперад і напаўняеш вобраз новай глыбінёй. Гэта неверагодна цікавы творчы момант, таму што спыніцца тут немагчыма! Можна дзесяць гадоў танцаваць адну і тую ж партыю — і кожны раз аказвацца на сцэне іншым. Неабыякавасць і любоў да прафесіі прымушаюць ісці наперад.
Я любіла іграць усе свае ролі — і ў «Жызэлі», і ў «Балеро», і ў «Вясне свяшчэннай», і ў «Карміна Бурана», і ў «Кармэн-сюіце»! А пазней закахалася ў вобразы, дзе ставіліся новыя задачы — адкрыць у сабе драматычнага акцёра. Капулеці ў «Рамэа і Джульеце», фея Карабос у «Спячай прыгажуні», нават Каралева ў «Лебядзіным возеры». Паверце: каралева ад каралевы адрозніваецца. Можна знаходзіцца на сцэне — і ніхто цябе не заўважыць, а можна крочыць, нібы багіня, і ўсе ахнуць у захапленні! Безумоўна, да балета мяне выдатна падрыхтавалі педагогі, я ведаю шмат прафесійных сакрэтаў. Аднак ёсць моманты, якім навучыць немагчыма — яны закладзены ў цябе Богам. Хвіліну таму ты не ведаў, як выйсці на сцэну ў пэўнай ролі, але толькі пачуў музыку — і імгненна разумееш, што і як неабходна зрабіць. Гэта дадзенасць, якой распараджаешся выключна ты, падзяліцца ёю з іншымі немагчыма.
Калі казаць пра прафесію, ці шкадуеце вы пра што-небудзь?
— Пасля гастролей нашай трупы, якія праходзілі ў Англіі ў 1990 годзе, мне і Інэсе Душкевіч прапанавалі працу чатыры лепшыя брытанскія тэатры, сярод якіх былі «Ковент-Гардэн» і Англійскі нацыянальны балет. У мяне не было яшчэ сям’і, дзіцяці, і я, у прынцыпе, магла з’ехаць. Але мы былі патрыётамі: у нас у галаве не ўкладвалася, што можна пакінуць любімы тэатр. Для нас усё гэта было роўнае здрадзе. Тым больш з’язджаць трэба было ў невядомасць. І мы засталіся. Напэўна, трохі шкадую пра гэта. Але нездарма кажуць: добра там, дзе нас няма.
А якой вы былі ў дзяцінстве?
— Я вельмі хатняе дзіця, у садок не хадзіла, таму да кантактаў з іншымі людзьмі не была звыклая. Зрэшты, і асаблівай патрэбы ў калектыве не адчувала. Але дома пастаянна скакала ля тэлевізара. Дзядуля глядзеў-глядзеў на мае «выкрунасы» і вырашыў: калі ўнучка без перапынку «скача», трэба яе аддаць у Палац піянераў. Так у пяць гадоў я апынулася ў танцавальным калектыве «Зорачка», з якім мы нават ездзілі... на гастролі! Дзецьмі адправіліся паказваць сваё мастацтва свету — у Калінінград і Балтыйск. У мяне заўсёды былі доўгія валасы, праўда, заплятаць ніколі іх не ўмела, затое мае сяброўкі з танцавальнага класа ўкладвалі мае косы самым розным чынам: то «рожкі» накруцяць, то «вавілоны» нейкія ўзвядуць.
І ўжо былі думкі пра балет?
— На той момант — не. Калі споўнілася 10 гадоў, кіраўнік ансамбля параіла адвесці мяне ў харэаграфічнае вучылішча. Толькі хатнія разумелі: гэта не гурток, куды па сваім жаданні ходзіш ці не, а сур’ёзны крок да будучай прафесіі. Я ж пра тое і не думала — проста хацела танцаваць. Дарэчы, мой лёс вырашыла ўсё тая ж кіраўніца: яна, а не родныя, павяла мяне ў Вялікі тэатр, дзе ў той час размяшчалася вучылішча. Праўда, мы спазніліся, два туры ўступных экзаменаў прайшлі, класы практычна былі набраныя, заставалася апошняе выпрабаванне. На мяне паглядзелі, пакруцілі і... узялі! Не ўяўляеце, якая я была шчаслівая! Ляцела па белых прыступках тэатра: «Мяне прынялі!» Мама, вядома, была ў шоку, яна не думала пра такое развіццё падзей. Але са словамі: «Таня, падумай як след!» пайшла ў школу, забрала дакументы і аднесла іх у вучылішча.
Пачалося зусім іншае жыццё. Дзіцем глядзела па тэлевізары на танцораў і думала: яны выдатныя, бо іх навучылі быць такімі. Аднак усведамленне, што прыгожа — яшчэ і складана, цяжка, балюча і нават крыўдна, прыйшло ў класе вучылішча, калі мяне пачалі ставіць у класічныя балетныя пазіцыі і выварочваць ступні. Так, было няпроста, але кінуць зусім не хацелася!
Што асабліва запомнілі ў тыя гады?
— Пасля трох гадоў навучання нас узяла іншы педагог. І чамусьці я, дзяўчынка, якая атрымлівала па спецыяльных дысцыплінах адны пяцёркі, абсалютна ёй не спадабалася. Яна запрасіла маму ў клас і заявіла: «Ваша дачка прафнепрыдатная, можаце яе забіраць з вучылішча». Мая матуля ў той час сама працавала з таленавітымі дзеткамі — выкладала ў гімназіі-каледжы мастацтваў імя Ахрэмчыка, таму перайшла да справы: пачала забіраць дакументы. Але тут трэба асабліва сказаць пра нашага дырэктара, Клаўдзію Фёдараўну Калітоўскую. Гэтую фантастычную жанчыну, што хадзіла на шпільках і паліла «Беламорканал», усе баяліся як агню. Але менавіта яна мяне і выратавала. Пасля размовы з маці яна сваім легендарным баском вынесла вердыкт: «Нават і не думайце!»
Калі мама вярнулася дадому, я зразумела: яна не ў лепшым настроі, але і падумаць не магла, што гэта праз мяне! Пасля майго пытання яна доўга глядзела, а потым сказала: «Таня! Ты старайся!» І я стала старацца яшчэ больш... Цяпер разумею, што наш педагог чэпкім позіркам прафесійнай артысткі ацаніла ўсіх дзяўчынак у класе і выбрала тых, у каго ад прыроды былі так званыя «балетныя ногі». Шчыра прызнацца, ногі ў мяне былі «сярэднія», таму і асаблівай увагі мне не надавалі. Але калі іншым вучаніцам рабілі заўвагі, гэтыя недакладнасці выпраўляла і я. І да выпуску аказалася, што ў мяне не менш добрых якасцей, чым у дзяўчынак, на якіх «рабілі стаўку»: лёгкі, высокі скачок, выразная спіна, прыродная артыстычнасць.
І на экзамене вас убачылі і заўважылі...
— Менавіта тады мяне адзначыў Елізар’еў, у той час — мастацкі кіраўнік балета Вялікага тэатра Беларусі. Калі па класічным танцы атрымала «пяць з мінусам», дык па характарным танцы Валянцін Мікалаевіч паставіў мне «пяць з плюсам». З гэтым плюсам мая ацэнка і была занесена ў табель. Дарэчы, на выпускным экзамене адбыўся беспрэцэдэнтны выпадак. Звычайна з курса Вялікі тэатр выбірае сабе некалькіх маладых артыстаў — лепшых. Дык вось, увесь (!) наш клас, усе шэсць дзяўчынак былі ў той год прыняты ў трупу беларускага тэатра! Шанец быў дадзены ўсім, праўда, не ўсе яго выкарысталі. Бо лёгкасць і вытанчанасць у балеце даецца толькі праз пякельную працу. Тут не атрымаецца аднойчы вызначыцца — і ўтрымацца на гэтым жа ўзроўні. Спынішся хоць на хвіліну — і адразу ж паляціш уніз. Неабходна ўвесь час развівацца, і не толькі фізічна, трэба шмат чытаць, глядзець, слухаць музыку, але галоўнае — любіць прафесію ды імкнуцца ёю займацца. Для здароўя і добрага апетыту можна хадзіць на ёгу, пілатэс, шэйпінг. Але балет — не хобі ці захапленне! Гэта сур’ёзная прафесія, у якой не павінна быць выпадковых людзей.
І вы былі ў прафесіі больш за 20 гадоў!
— Усім вядомая фраза: балет — мастацтва маладых. І гэта сапраўды так. Вельмі важна сысці ў патрэбны момант. Але для кожнага артыста тая рыса — свая. Я танцавала да 45 гадоў. Выдатна, калі ў артыста ёсць партыі, у якіх ён можа досыць доўга і, галоўнае, камфортна існаваць на сцэне. Бо там не важна, як добра ты скачаш і круцішся. Так званыя акцёрскія ролі, дзе ўзрост і неацэнны вопыт могуць быць выкарыстаны ў іншай якасці — дапамагаць спраўляцца з імі і рабіць гэта цудоўна. І мне пашанцавала: своечасова сышла ад складаных тэхнічных партый, што з узростам даюцца ўсё цяжэй. Але ў мяне з’явілася магчымасць выходзіць да гледача ў вобразах, якія нават без высокіх скачкоў былі напоўнены сэнсам, прыгажосцю, драматызмам дзякуючы багатаму прафесійнаму багажу. Не кожны танцор, нават вядучы майстар, з узростам можа стаць добрым акцёрам. Камусьці трэба сумленна развітацца з тэатрам, каб пакінуць пра сябе добрае ўражанне.
Калі сышлі са сцэны, вы ўсё роўна засталіся ў тэатры, але ўжо ў прынцыпова новай якасці — рэпетытара па балеце.
— Валянцін Мікалаевіч Елізар’еў і прапанаваў мне паспрабаваць свае сілы на іншай ніве. Гэта было сапраўды цікава, і ў душы разумела: змагу! Мне хацелася дапамагчы артыстам стаць іншымі, таму што быць танцоўшчыкам — гэта значыць увесь час нешта ў сабе мяняць. Якраз гэта самае складанае. Не ўсе гатовыя цябе выслухаць і, галоўнае, прыняць твае заўвагі. Цяпер магу прызнацца: праца рэпетытара — адна з самых няўдзячных. Ты, нібы з гліны, лепіш з зусім юных хлопчыкаў і дзяўчынак прафесійных артыстаў, дапамагаеш ім зрабіць над сабой намаганне — скокнуць мо і вышэй за галаву. Але тое, што ўкладаеш, і тое, што атрымліваеш наўзамен, — абсалютна розныя рэчы! Праца ідзе пастаянна і без перапынку: кагосьці выпусціў — і тут жа прымаешся за іншых. Вядома, ты таксама змяняешся і вучышся. Таму што да кожнага артыста неабходна знайсці свой падыход. Трэба быць і мудрым педагогам, і нядрэнным псіхолагам. Не заўсёды нават самыя выдатныя салісты могуць быць рэпетытарамі балета. Гэта ўнікальная, я б нават сказала — адзінкавая прафесія. Упэўнена: такая здольнасць даецца Богам. Неабходна не толькі фізічна дапамагчы: «паставіць» правільна цела, палепшыць вярчэнне, паказаць, як скокнуць вышэй, — але і «зрабіць» ролю. А для гэтага яго трэба навучыць быць розным: рамантычным, палкім, іранічным, смешным.
Што складаней: быць балерынай альбо рэпетытарам?
— Быць педагогам цяжэй. Міміка, артыкуляцыя і жэстыкуляцыя, танцы і размовы — я спрабую данесці інфармацыю да моладзі самымі рознымі спосабамі. Але ведаю дакладна: яны могуць узяць і счытаць яе да пэўнай рысы. І вось гэтую сцяну спрабую разбурыць — шукаю, чым можна дапамагчы. Часам знаходжу хутка, іншы раз пошукі займаюць доўгі час, а здараецца, наогул заходжу ў тупік. І зноў перада мной задача — зрабіць так, каб асобныя «мінусы» артыста не былі бачныя гледачам. Рэпетытар па балеце — велізарная праца, інтэлектуальная, фізічная, эмацыйная.
Атрымліваецца, рэпетытар дапамагае вывучыць не толькі малюнак танца, але і працуе над кожным вобразам...
— Безумоўна, ёсць тэхнічны бок, развіваючыся ў які салісты стануць лепш круціцца, вышэй скакаць, змогуць дасягнуць пэўных вынікаў у працы цела. Але існуюць жа і акцёрскія задачы! Напрыклад, музыкальнасць — адзін з найважнейшых момантаў у прафесіі. З музыкі выканаўца чэрпае выразнасць, мелодыя сама падказвае, якім ён павінен быць і ў якія моманты. І калі саліст, які «мае вушы», абавязкова патрапіць у патрэбны музычны акцэнт, дык іншы будзе адставаць або забягаць наперад. Але ты як настаўнік, педагог, рэпетытар абавязаны дамагчыся інакшага выніку. І ты змучваешся, шукаючы верны шлях, і перажываеш больш, чым студэнт. Так, хтосьці можа сказаць: матэрыял вывучылі — што яшчэ? Але далей заўсёды ёсць нешта большае.
Звычайна вы задаволеная вучнямі?
— Бываю, але не заўсёды. Крытыка — адзін з самых неабходных элементаў у рэпетыцыйным працэсе. Але многія ўспрымаюць заўвагі як асабістую крыўду, і працаваць з такімі людзьмі вельмі складана. І зноў ты як педагог, псіхолаг і псіхатэрапеўт шукаеш шляхі: як жа сказаць пра памылку і не пакрыўдзіць? Балет — вельмі жорсткая прафесія. І калі танцор хоча змяніцца, ён павінен зрабіць гэта хутка, таму што век артыста балета кароткі — усяго 20 гадоў. Калі ён не зменіцца сёння, то не зробіць гэтага і заўтра. Нават калі атрымаўся выдатны спектакль і ты станцаваў добра, неабходна імкнуцца да лепшага. Але калі ты паверыў, што гэта было геніяльна, — усё, далейшага развіцця не будзе!
Вы даяце майстар-класы нават у Японіі...
— Ужо шосты раз прыязджала як педагог у прыватную японскую школу па запрашэнні дырэктара — Кейсуке Косака, якая носіць назву «Сафія. Балет. Акадэмія» — у гонар Соф’і Галоўкінай, славутай рускай балерыны. Менавіта дырэктар імкнецца запрашаць да сябе сапраўдных зорак: Улляну Лапаткіну, Марыю Алаш, Марыю Аляксандраву. Я займалася з дзеткамі розных узростаў — ад малых, сямігадовых, да моладзі, каму болей за 20. Урок доўжыцца паўтары гадзіны, і, паверце, гэта нялёгка — пяць-шэсць гадзін запар пастаянна паказваць і расказваць. Прычым кожны дзень я павінна даць новы комплекс практыкаванняў і камбінацый. А на апошні семінар прыйшлі бацькі, каб і на сваіх дзяцей паглядзець, і параўнаць іх дасягненні з поспехамі іншых. Але заўважыла: мамы і таты наведваюць гэты ўрок не для таго, каб пусціць слязу замілавання. Не! Першае, што яны папрасілі мяне сказаць, — недахопы, якія неабходна выправіць у далейшым навучанні. Жыхары гэтай краіны маюць гіпертрафіраванае імкненне да прыгожага і, напэўна, менавіта ў мастацтве балета бачаць вышэйшую гармонію. Так, у Японіі дзіця можа займацца ў балетнай студыі з 7 гадоў, а ў 17 сысці ў зусім іншую прафесію. Але той вопыт неацэнны і дапаможа ім рухацца далей, да абсалюту, у той галіне, якую яны абралі.
Вы шмат кажаце пра талент, адоранасць. А што такое, на вашу думку, геніяльнасць?
— Геніяльны чалавек — у першую чаргу таленавіты. Бо талент даецца Богам не ўсім. І вядома, такая асоба павінна мець каласальную працаздольнасць — увесь час у пошуку, ніколі не спыняецца. Геніяльнасць — доля абраных. Так, ёсць шмат цудоўных артыстаў, якімі я захапляюся. Але геніяльных — адзінкі: Мая Плісецкая, Міхаіл Барышнікаў, Рудольф Нурыеў, Уладзімір Васільеў. Ты можаш скокнуць на дзіва высока, даставаць галавой да столі, але твае намаганні выклічуць толькі ўсмешку, і не больш. Геніяльнасць — гэта прадмет іншай уласцівасці. Гэта палётнасць, што жыве ў табе, унутры, у тваім целе, у тваёй душы.
Пра што марыць Таццяна Шаметавец?
— Хацелася б з’ехаць куды-небудзь у спакойнае, адасобленае месца, адпачыць — побач з прыродай, любімымі людзьмі і катом Ярафеем. (Усміхаецца.) А ў прафесійным плане — каб наша балетная трупа мела высокі ўзровень, каб артысты шанавалі справу, якой займаюцца, каб яна была для іх гонарам і годнасцю. Менавіта з такімі людзьмі я б хацела працаваць — у адзінай звязцы, у адной камандзе.
Алена Балабановіч