Ці не першыя вядомыя эксперыменты віцебскіх мастакоў з дрэварытам і лінарытам — творы часопіснай графікі, сярод якіх можна прыгадаць аркушы, выкананыя калектывам графічнай майстэрні сусветна вядомага УНОВІСа на станках ВіцСвоМаса. Чорна-белыя і каляровыя лінагравюры зроблены Іванам Чарвінкам, Верай Ермалаевай, Львом Юдзіным і інш. Прыкметна, што ў 1910-я ў Заходняй Еўропе лінарыт выцясняў абразную гравюру. У той жа час многія даследчыкі адзначаюць і шматграннасць ксілаграфіі ў еўрапейскім мастацтве першай паловы XX стагоддзя. Стылістычныя пошукі ў мастацтве дрэварыту ў гэты перыяд ідуць у самых розных кірунках. Вялікія ксілаграфічныя серыі стварае вядомы бельгійскі і французскі мастак Франс Мазерэль. Мэтанакіравана займаецца гравюрай на дрэве Уладзімір Фаворскі.
Сапраўдны ўздым дрэварыту ў Віцебску пачынаецца ў сярэдзіне і другой палове 1920-х. Нягледзячы на тое, што вялікая колькасць твораў першай паловы ХХ стагоддзя загінула ў перыяд Вялікай Айчыннай вайны, захаванае дае магчымасць упэўнена казаць аб фармаванні ў гэты час своеасаблівай віцебскай школы гравюры.
Адраджэнню і развіццю ксілаграфіі ў Віцебску шмат у чым садзейнічаў Саламон Юдовін. Ён вучыўся ў прыватнай мастацкай школе Юдэля Пэна, школе Таварыства заахвочвання мастацтваў у Пецярбургу, скончыў Віцебскі мастацка-практычны інстытут (ВМПІ), а з 1922 па верасень 1923-га выкладаў спецыяльныя дысцыпліны ў графічнай майстэрні мастацка-практычнага інстытута. Бліскучы гравёр па дрэве, ён працаваў у галіне станковай графікі і кніжнай ілюстрацыі. Яго творы адметныя высокім прафесійным майстэрствам і рэалістычнай вобразнасцю. Працам Юдовіна ўласцівы апавядальнасць і ўвага да дэталяў. Яшчэ ў 1921 годзе ён пачаў гравіраваць серыі «Стары Віцебск» і «Мястэчка», пазней аб’яднаных у вялікі цыкл «Мінуўшчына». Многія лічаць гэтага мастака родапачынальнікам Віцебскай школы гравюры, росквіт якой злучыў як уласныя дасягненні віцебскіх графікаў, так і творчы вопыт ленінградскай і маскоўскай школ ксілаграфіі.
Адметную ролю ў развіцці дрэварыту ў Віцебску адыгралі Яфім Мінін і Зіновій Гарбавец. Мінін спецыяльнай мастацкай адукацыі не атрымаў. Вучыўся ў школе Юдэля Пэна, а з 1922 года пачаў працаваць у Віцебскім мастацка-практычным інстытуце (пазней Віцебскім мастацкім тэхнікуме), дзе чытаў лекцыі па гісторыі мастацтва, вёў малюнак і гравюру, а ў 1932-м стаў кіраўніком графічнага аддзялення. Яго студэнты працавалі на лінолеуме, сам ён аддаваў перавагу гравюры на дрэве. Гэтай тэхнікай Яфім Мінін авалодаў самастойна і дасягнуў вяршынь дасканаласці. На ягоных гравюрах можна ўбачыць вялікую колькасць архітэктурных помнікаў Віцебска, якія да нашых дзён не захаваліся.
У 1924 годзе ў Віцебску пачаў сваю педагагічную і мастацкую дзейнасць гравёр Зіновій Гарбавец. У адрозненне ад іншых віцебскіх гравёраў, Гарбавец працаваў не ў тарцовай, а ў абразной гравюры, быў болей партрэтыстам, чым пейзажыстам, пра што сведчылі творы, прадстаўленыя ім на Усебеларускіх выставах (1925, 1927, 1929). Тым не менш шэраг сваіх кампазіцый прысвяціў архітэктурным помнікам Віцебска.
У графічнай майстэрні Юдовіна ў Віцебску паспяхова засвоіў тэхніку лінарыту і Аляксандр Ахола-Вало. Мастак шмат эксперыментаваў у галіне гравёрнага мастацтва, спрабуючы ў першую чаргу павялічыць наклад друку з адной дошкі. Лінарытам ён працягваў займацца як у другой палове 1920-х, пераехаўшы ў Мінск, так і ў 1950—80-я, калі жыў у Швецыі. У сваіх творах Ахола-Вало звяртаўся да камерных бытавых сюжэтаў, пейзажных матываў, а таксама імкнуўся адлюстраваць рысы новага грамадскага ладу. Аддаў даніну ідэям беларускага Адраджэння, якое вызначала мастацкае жыццё 1920—1930-х.
Другім адметным этапам развіцця гравюры ў Віцебску сталі 1960—1980-я. Прыкметна, што, пачынаючы ўжо з канца 1950-х, у шэрагу рэспублік былога СССР назіраецца ажыўленне цікавасці да мастацтва лінарыту і фармуюцца свае нацыянальныя школы. Да лінагравюры ў той час звярнуліся не толькі графікі, але і жывапісцы — у спробе пашырыць магчымасці гэтай тэхнікі. Папулярнасці лінарыту паспрыялі і яго спецыфічныя характарыстыкі — лаканічнасць мовы, эфектная выразнасць рытмічнага ладу, даступнасць і адносная хуткасць выканання, таннасць матэрыялу і магчымасць павелічэння тыражу.
У творчасці віцебскіх мастакоў у 1960—1980-я лінарыт набыў падкрэслена станковы характар. Іх графічныя аркушы звычайна вылучаюцца эмацыйнай выразнасцю, вытанчаным лірычным і паэтычным ладам. Маляўнічы штрых, мяккасць абрысаў у спалучэнні з дынамічна распрацаванымі шырокімі плоскасцямі складаюць характэрныя рысы лінарытаў віцебскай школы.
Адным з першых звярнуўся да лінагравюры Рыгор Клікушын. Выкладчык мастацка-графічнага факультэта Віцебскага дзяржаўнага педагагічнага інстытута, выпускнік Маскоўскага паліграфічнага інстытута, ён аддаў лінарыту дзесяцігоддзе сваёй творчай працы (1960—1970). Клікушын з захапленнем засвойваў магчымасці чорна-белага і каляровага лінарыту і дасягнуў на гэтым шляху даволі высокага ўзроўню валодання матэрыялам. Рыгор Клікушын шмат гадоў загадваў кафедрай малюнка і жывапісу, а таксама гуртком графікі. Віцебску, яго гісторыі і сучаснасці прысвечаны некалькі асобных цыклаў майстра, якія ярка і выразна ўвасобілі свой час.
На пачатку 1970-х да тэхнікі лінарыту звярнулася цэлая група маладых віцебскіх выпускнікоў мастацка-графічнага факультэту. У іх гравюрах, звычайна вялікага памеру, актуальнай становіцца манументальнасць, прасторавая шматпланавасць. Іх цікавілі матывы паўсядзённага жыцця, краявіды з лірычнымі і рамантычнымі рысамі. Так, з гуртка графікі, кіраўніком якога быў Рыгор Клікушын, свой шлях у свет лінагравюры пачаў Мікалай Гугнін. Яго дыпломная праца — серыя лінарытаў, прысвечаных Полацку, — атрымала высокую адзнаку камісіі і з поспехам экспанавалася на рэспубліканскай выставе графікі (1972). Пад кіраўніцтвам Клікушына была выканана дыпломная работа і Віктарам Данілавым. І хоць у будучым мастак аддаў перавагу жывапісу, яго лінарыты не пакідаюць гледача абыякавым. Сярэдзіна 1970-х — час асаблівага захаплення графічным мастацтвам для Мікалая Таранды. Ці не першым графічным цыклам твораў у лінарыце стала яго родная «Аршаншчына». Манументальныя па стылістыцы, шматпланавыя краявіды творцы вылучаюцца дэталёвай распрацаванасцю, складаным кампазіцыйным і рытмічным ладам.
Пік актыўнасці Вячаслава Шамшура ў галіне лінагравюры прыйшоўся на 1980-я. У лінарытах мастак паказаў свае лепшыя якасці графіка і майстра кампазіцыі. Ён часта звяртаецца да пейзажнага жанру, да этнаграфічнай, падкрэслена беларускай тэматыкі, выкарыстоўвае нечаканыя ракурсы, элементы стафажу, якія ажыўляюць прастору.
Шэраг віцебскіх мастакоў, выпускнікоў розных навучальных устаноў былога СССР, у 1960—1970-я таксама захапляліся тэхнікай лінагравюры. Сярод вядомых беларускіх графікаў, што працавалі ў лінарыце, варта назваць Барыса Кузьмічова і Георгія Кісялёва.
Барыс Кузьмічоў прыехаў на працу ў Віцебск пасля заканчэння Мінскай мастацкай вучэльні (1960). У яго творчасці гарманічна спалучыліся лірычныя і філасофскія матывы. Лінагравюры Кузьмічова вылучаюцца асацыятыўнасцю, лаканізмам і дэталёвасцю. Шырока вядомы яго графічны цыкл «Люд беларускі», навеяны працай фалькларыста і этнографа Міхала Федароўскага.
Адметны характар носяць гравюры, выкананыя Георгіем Кісялёвым. Пасля завяршэння вучобы ў Львоўскім дзяржаўным інстытуце прыкладнога і дэкаратыўнага мастацтва (1966), ён пачаў працаваць у Віцебску. Актыўна эксперыментаваў з рознымі тэхнікамі і тэхналогіямі друку. Тэматычны і жанравы дыяпазон яго твораў даволі шырокі — ад краявідаў, нацюрмортаў да складаных дэкаратыўных кампазіцый. Большасць гравюр мастака вылучае выразная рытмічная арганізацыя кампазіцыі і высокае тэхнічнае майстэрства.
Графічная спадчына Ісака Бароўскага невялікая, але важная для ўсведамлення шматграннасці і ўнікальнасці яго жывапіснага таленту. Да лінагравюры творца звяртаўся некалькі разоў — спачатку ў сярэдзіне і другой палове 1960-х, а пазней у 1980-м. З ранніх работ вылучаецца нізка з 14 гравюр, прысвечаная гісторыі Віцебска. У апошніх працах Бароўскі выкарыстоўвае розны тып штрыха, дэкаратыўную мадэліроўку формы, кантрасты асвятлення. У некалькіх захаваных лінарытах уражваюць не акадэмічная завершанасць і дасканаласць пластычнай распрацоўкі, а лёгкасць, графічная выразнасць і... жывапіснасць.
Жывапісныя эфекты, спробы пашырыць абмежаваныя выяўленчыя магчымасці тэхнікі лінарыту, кампенсаваць яе сухасць і ўмоўнасць пераважаюць у 1980-я ў творах віцебскіх мастакоў. Важная роля ў гравюрах належыць рытмічнай арганізацыі кампазіцый. Пры гэтым свабода і знешняя экспрэсіўнасць музычнай па сваім характары выяўленчай мовы, увага да дэталяў зусім не перашкаджаюць цэласнасці і гарманізацыі кампазіцыйнага ладу.
Лірычная танальнасць, нярэдка набліжаная да ўзнёслай элегічнасці, уласціва большасці гравюр выпускніка Маскоўскага паліграфічнага інстытута Анатоля Ільінава. Яго лінарыты вылучаюцца не толькі своеасаблівай манерай выканання, складанай архітэктонікай лінейных рытмаў, але і адметнай паэтыкай. Творы мастака — гэта своеасабліва візуалізаваная лірыка, у якой яскрава і метафарычна гучаць вобразы роднага краю. Нізкі яго лінарытаў прысвечаны Лепельшчыне, Браслаўшчыне і Віцебшчыне. Рэалістычныя традыцыі тут удала спалучаюцца з інтэнцыямі сентыменталізму і сімвалізму, непасрэднасць успрымання суседнічае з глыбока асэнсаванымі выяўленчымі прыёмамі.
Вучоба ў Маскоўскім паліграфічным інстытуце не магла не паўплываць і на творчасць вядомага акварэліста Генадзя Шутава, што не толькі выканаў у лінарыце некалькі выдатных кампазіцый, але і прывіў любоў да гэтай тэхнікі ў студыі Дома піянераў аднаму са сваіх вучняў — Юрыю Баранаву, які першыя крокі ў лінарыце зрабіў яшчэ ў канцы 1960-х. Адным з дамінуючых вобразаў у яго гравюрах заўжды быў паэтычна ўзнёслы Віцебск.
Цікавасць да тэхнікі лінарыту ўжо ў 1980—1990-я і на пачатку новага стагоддзя падтрымлівалася ў студэнтаў Віцебскага дзяржаўнага ўніверсітэта кіраўнікамі эстампнай майстэрні мастацка-графічнага факультэта Леанідам Анцімонавым, а пазней яго вучнем — Алегам Кастагрызам.
Сёння, на пэўнай аддаленасці, добра бачна, што дзве стылістычна блізкія тэхнікі гравюры — дрэварыт і лінарыт — у віцебскім мастацтве мелі свой уласны шлях і, разам з тым, паспрыялі фармаванню даволі цэласнай графічнай школы, дзе выразна праявілі сябе некалькі пакаленняў віцебскіх творцаў. А ўзрослая цікавасць да лінарыту, якую на працягу амаль двух апошніх дзесяцігоддзяў мы можам назіраць у сучасным сусветным мастацтве, натхняе айчынных аматараў гравюры на новыя эксперыменты з ужо добра знаёмым матэрыялам. Але мы памятаем і сваю гісторыю. Маем традыцыі, пра што, на жаль, не заўжды кажам у голас.
Міхась ЦЫБУЛЬСКІ