«Старых майстроў» вылучала прафесійная дыхтоўнасць, сур’ёзнасць у дачыненні да справы, мастакоўская шчырасць, выяўленне і болю, і прыгажосці быцця. У выпадку беларускага мастацтва савецкага і постсавецкага перыядаў гэта найперш аўтары, народжаныя ў першыя дзесяцігоддзі ХХ стагоддзя, вучыліся ў 1920—1930-я, увайшлі ў мастацтва недзе ў 1940—1950-я, асноўная творчасць — 1960—1970-я. Канешне, гэта людзі вельмі драматычных лёсаў, выключнага жыццёвага досведу, здольныя глыбока і тонка адчуваць. Спалучэнне ўсіх гэтых «зыходных» прыводзіць да таго, што іх творы ўражваюць прафесійнай дакладнасцю, сэнсавай шматслойнасцю — за вонкавым адкрываецца шматмерны свет. Пры ўсёй татальнай заідэалагізаванасці савецкага мастацтва, пры стварэнні «неабходных» карцін яны знаходзілі шчырасць найперш праз мастацкі бок: святло, колер, кампазіцыю. Ды і падзялялі яны, у той ці іншай ступені, савецкую ідэалогію — шчыра ці добраахвотна-прымусова. Не будзем забывацца: у савецкія часы часткова захоўваюцца рамантычныя адносіны да мастака як да ідэйна і эстэтычна вельмі ўплывовай асобы, толькі ідэі і формы яму прапанаваліся-навязваліся звонку. Але важкасць яго працы ў сферы агульнага духоўнага выхавання дэкларавалася ўсюды і заўжды, што не магло не паўплываць на стаўленне мастака самога да сябе і сваёй адказнасці, пры ўсёй невырашальнай дваістасці вобраза творцы-слугі, рамантычнага летуценніка і цэхавага майстра.
Асноўнымі складнікамі выхавання Антона Стэфанавіча Бархаткова былі маскоўская школа жывапісу — у вучылішчы (1936—1940), мастацкім інстытуце (1945—1948) — і нечаканае вучнёўства, злучанае з сяброўствам, у Бялыніцкага-Бірулі, мастака таксама маскоўскай адукацыі, але яскравага выразніка беларускай ментальнасці.
Як бачыцца, на працягу ўсёй сваёй дзейнасці Бархаткоў звяртаўся да той ці іншай сістэмы — шчыльнай, колерава вызначанай, «матэрыяльнай маскоўскай» і трапяткой, высветленай «далікатнай бялыніцкай», з перавагай той ці іншай у розныя перыяды творчасці. Ён змяняў «рэгістры» ў залежнасці ад матыву, стану прыроды і ўласнага. Гэта нагадвае карыстанне архітэктарам рознымі ордарнымі сістэмамі. Такім чынам, «маскоўскія» ўплывы можна параўнаць з дарычным ордарам, абагуленым і мужным («Вечар на Бярэзіне», 1969; «Сцюдзёны ліставей», 1973), «бялыніцкія» — з іянічным, лагодным і лёгкім («Лірычны пейзаж», 1967; «Дарога ў Вязынку», 1972). Часам у працах Бархаткова з’яўляўся «карынфскі ордар» — калі прыгажосць ці эфектнасць уражваюць перш за ўсё («Шэрань», 1968; «Апошні прамень», 1970; «Люты», 1970). І, здаецца, у апошні перыяд, у 1990-я, гэтыя манеры аб’ядналіся ў новай якасці твораў Бархаткова, пейзажах-станах, адначасова матэрыяльных і трапяткіх.
Работы Бархаткова належаць да рэалізму, які ўвабраў рысы іншых стылістычных сістэм, што не суадносяць з паняццем традыцыйнага, пераважна апавядальнага рэалізму. Перш за ўсё гэта імпрэсіянізм у яго маскоўскай транскрыпцыі, характэрнай для «Саюза рускіх мастакоў», з падвышанай шчыльнасцю фарбы і пэўнасцю колеру — «Зімовая раніца» (1960), «Зіма. Хлеўчукі» (1967), «Сінія цені» (1968), «Апошні снег. Повязнь» (1969), «Захаладала» (1978). Таксама прысутнічае постімпрэсіяністычная абагуленасць і ўзмоцненая фармальная выразнасць — «Прыбранае поле» (1975), «Дарога ў Радашковічы» (варыянты 1969 і 1987 гадоў). Сустракаецца фавісцкая фарсіраванасць колеру — «Першыя ўсходы» (1963), «Травеньскі дзень. Вёска Повязнь» (1972), «Восеньскі вечар» (1977). Пры ўсім мастакоўскім і чалавечым тэмпераменце, нярэдкай экспрэсіўнасці ў творах, якая ўвогуле з’яўляецца адной з лейтматыўных якасцей арту ХХ стагоддзя, так званы «пейзаж настрою» не характэрны для Бархаткова. Адчуваецца захапленне майстра ўбачаным, а не транскрыпцыя краявіду адпаведна ўласнаму перажыванню. Прырода мела для яго перш за ўсё самадастатковую каштоўнасць, незалежную ад душэўнага стану жывапісца. І ў яго работах пачаткова ўспрымаецца матыў як такі і тое, як гэта зроблена, эмацыйнае ж адчуванне ўзнікае потым — як і пры сузіранні прыроды самой па сабе. Такім чынам, на іншым вітку адбываецца аб’ектывацыя пейзажу — не праз дэталёвасць, а праз эмацыйную дыстанцыяванасць і кампазіцыйную разамкнёнасць. У звязку з гэтым можна дадаць: шмат у якіх працах Антона Бархаткова застаецца характэрная эцюднасць, што надае ім нязмушанасць і свежасць, але часам пазбаўляе канцэнтраванай вобразнасці й выразнасці, якія мы прызвычаіліся бачыць у пейзажах-карцінах, часам надае ім нейкую недавыказанасць. У яго звычайна адсутнічае закрытасць карціны на сабе самой, гэта разамкнёная выява толькі часткі прыроды, аднаго з кавалачкаў яе мазаікі, аднаго са шкельцаў яе калейдаскопа. Так праяўляецца здольнасць захаваць у закончанай рабоце непасрэдную эмацыйную сілу, энергію, свабодную жывапіснасць эцюда. Гэта стварае ўражанне патоку жыцця, перадае адчуванне бясконцасці свету, яго подыху, пастаяннага руху. «Заўсёды думаў пра тое, каб перадаць жывую прыроду і сваё да яе стаўленне». Мастак нібыта збірае прыгажосць свету і робіць яе заўважнай для іншых. Прырода як ачышчэнне. У ёй бясконцая прыўкраснасць Стварэння. Прырода гоіць, чалавек пачынае адчуваць сябе ў ёй на сваім, належным месцы, сыходзяць трывогі і мітусня.
Юбілейная выстава прац Антона Бархаткова, якая адбылася ў Нацыянальным мастацкім музеі ў лютым-сакавіку, засведчыла рэдкую разнастайнасць твораў мастака, абумоўленую як вялікай колькасцю матываў, іх фармальных інтэрпрэтацый, гэтак і часавымі зменамі, прыкметамі розных фаз асабістага жыцця і гістарычных эпох. Ён проста ўвасабляў краявіды, а атрымалася падарожжа не толькі ў прасторы, але і ў часе. Свежы подых 1960-х («Вясна», 1962), спелыя, выніковыя 1970-я («Бруснічная паляна», 1977), раздарожжа 1980-х, калі карціны Антона Бархаткова нечакана робяцца, магчыма, у звязку з пачуццямі, пераважна традыцыйна-рэалістычнымі і астылымі («Зімовае змярканне», 1981; «Залатая восень», 1985; «Чэрвень у квецені», 1987). І апошні перыяд, што акрэсліўся да сярэдзіны 1990-х, калі выяўленчасць застаецца быццам пастолькі-паколькі, саступаючы ўвасабленню таго ці іншага стану прыроды і душы, праз пластыку і колер, праз своеасаблівае растварэнне ў прыродзе, у яе безупынным унутраным руху: «На рацэ Мста», 1993; «Выпаў снег», 1994; «Над ракой», 1995; «Зіма. Сонечны дзень», 1999. У гэтым бачыцца максімальная свабода «мастакоўскага дыхання». Прычым у кожным перыядзе былі створаныя паўнавартасныя работы, не кажучы ўжо пра тое, што на кожную карціну ёсць свой глядач.
Зрэдку мастак звяртаўся да іншых жанраў — партрэта, нацюрморта. І ў іх дасягаў заўважных поспехаў, але яны не захапілі яго гэтак, як пейзаж. Нават у групавой жанравай карціне «Паўдня на сенажаці» (1960), нягледзячы на захапленне майстра персанажамі, іх партрэтнасць, яны быццам раствараюцца ў пейзажы, зліваюцца з ім, робяцца ці не яго часткай. Найбольшы поспех напаткаў працу «Першая песенька» (1957), якая сталася ў лепшым сэнсе хрэстаматыйнай у беларускім мастацтве. Складана асэнсаваць, што гэты твор, увасабленне чысціні і пяшчоты, намаляваў 42-гадовы мастак, які прайшоў праз цяжкія выпрабаванні; іх можна не ўспамінаць, але немагчыма забыць. Канешне, на тагачаснае светабачанне жывапісца ўплывала і атмасфера «адлігі». У пейзажах майстра чалавек, людзі прысутнічаюць рэдка і часцей як стафаж. Галоўнымі робяцца, нібыта персаніфікуюцца, іншыя героі — дрэвы, дамкі, стажкі, шляхі і рэкі.
Не перабольшу, калі скажу, што для Антона Бархаткова мастацтва было формай і сэнсам жыцця. І сялянскае працалюбства, працаздольнасць, стрыманасць пачуццяў неабходныя: чалавек паўнавартасна існуе, пакуль ён «робіць», так ці іначай. Каларытная і моцная асоба — у процівагу прозвішчу. Ягоны лёс — гэта як ланцуг, дзе ўдача ішла за бядой. Бархаткоў паходзіць з сялянскай сям’і на Магілёўшчыне. Яму было тры гады, калі памёр бацька, атручаны на імперыялістычнай вайне газамі. Неўзабаве ў сям’і з’явіўся айчым — добры, спакойны чалавек. Нарадзіліся браты, сёстры. У школку даводзілася ісці за некалькі кіламетраў, але настаўнікі былі такія, што Антон Стэфанавіч успамінаў іх з захапленнем усё жыццё. Уражаны расповедамі аднавяскоўца пра Маскву, адправіўся туды ў 14 гадоў. Стаў беспрытульным, але ўрэшце апынуўся на выхаванні ў воінскай частцы, дзе ім па-бацькоўску апекаваўся цудоўны чалавек Хасіс Валееў. І Бархаткову было наканавана стаць адным з савецкіх «ламаносавых». У маскоўскай мастацкай вучэльні вялікую ролю ў яго станаўленні адыграў Пётр Пятровічаў. Скончыўшы вучылішча, Антон Бархаткоў служыў у войску і там узяў удзел у сваёй першай выставе ў 1940-м у Харкаве. У пачатку наступнага года яго творы экспанаваліся ўжо на ўсесаюзнай выставе мастакоў РККА, у Маскве. Вайна застала яго на Украіне, трапіў у акружэнне, палон, але пашчасціла ўцячы, дабрацца да радзімы, стаў партызанам. У 1943 годзе быў адазваны ў штаб партызанскага руху ў Маскву, дзе неўзабаве атрымаў прызначэнне намеснікам дырэктара выстаўкі, прысвечанай 25-годдзю ўтварэння БССР, якая планавалася ў Траццякоўскай галерэі. Тады ён пазнаёміўся шмат з кім з беларускіх мастакоў, у тым ліку з Вітольдам Бялыніцкім-Бірулем, які адыграў, напэўна, выключную ролю ў фармаванні творцы. Біруля нарадзіўся на 43 гады раней за Бархаткова, але і для старэйшага майстры сустрэчы, размовы, сумесная праца, ліставанне з маладым, таленавітым, шчырым земляком былі немалой радасцю. «Больш за ўсё я вучыўся ў Бялыніцкага-Бірулі. Амаль кожны дзень прыходзіў да яго ў майстэрню. А ў летнія месяцы мы разам ездзілі па Беларусі маляваць эцюды». З той выставай, на якой экспанаваліся і яго творы, Бархаткоў прыехаў у Мінск. Удзельнічаў у адраджэнні Карціннай галерэі, потым загадваў мастацкім аддзелам у Музеі гісторыі Вялікай Айчыннай вайны, але ўжо ў 1945 годзе паступіў у Маскоўскі мастацкі інстытут, дзе вучыўся да 1948 года. Пабраўся шлюбам з Соф’яй Кавалёвай, актрысай, спявачкай, жанчынай рэдкай дабрыні і абаяння, — зноў «шчаслівы білет». Пасля — вяртанне ў Мінск, частыя паездкі на эцюды па Беларусі з сябрамі-мастакамі Іванам Карасёвым, Пятром Дурчыным, Пятром Крохалевым, Барысам Аракчэевым, Альгердам Малішэўскім, Міхаілам Даўгялам. Штогадовая, з 1954 па 1999, праца (потым і з сынамі) на так званай «Акадэмічнай дачы», Доме творчасці імя Іллі Рэпіна ў Цвярской губерні (Калінінскай вобласці), дзе збіраліся блізкія яму па памкненнях мастакі з усяго Саюза. І атрымалася: шчаслівы ў настаўніцтве, шчаслівы ў шлюбе, шчаслівы ў працы і сябрах, і гэта пры ўсіх жыццёвых нягодах і цяжкасцях. Ён не атрымаў вялікага прыбытку і мастакоўскіх рэгаліяў, акрамя звання заслужанага дзеяча мастацтваў у 1991 годзе, але і не марыў пра іх, рэчы неістотныя, ці толькі марыў, не прыкладаючы намаганняў, — «паціху працаваў, ды і ўсё, больш нічога». Шчаслівы ў сваіх трох дзецях і ва ўнуках. Ягоны малодшы сын Ігар — адзін з самых вядомых беларускіх мастакоў у сваім пакаленні, высока шанаваны бацькам. Пражыў больш за 86 гадоў, захаваўшы талент, розум, імпэт. Шчаслівы ў памяці — выдадзеныя кнігі, зладжаныя выставы. Прыжыццёвых выставак было амаль 80, а усяго да сёння — амаль 90. Антон Бархаткоў быў ганаровым удзельнікам, які адкрываў прысвечаныя памяці Вітольда Бялыніцкага-Бірулі I і II міжнародныя пленэры на Магілёўшчыне. І ўвогуле: Антон Бархаткоў — гэта імя, яго работы — радасць сустрэчы для тых, каму блізкі ягоны погляд на жыццё, прыроду, выяўлены праз творчасць, каму ён дапамагае ўбачыць бясконца разнастайную і складаную гармонію Сусвету. «Працую ад душы. Мне падабаецца мая прафесія. Я жыву ў душы з прыродай, сваёй, беларускай. Гэта як далучыцца да рэлігіі, да Бога. Мастак — самы шчаслівы чалавек. Калі піша — пра ўсё на свеце забывае».
Валянціна Вайцэхоўская