Альтэрнатыва
Вызначана акрэсліць, што ў сучасным мастацтве — альтэрнатыва, а што — не, даволі складана, бо ўсё змяняецца імкліва і ўсё мае права на жыццё. Аналагавая фатаграфія сыходзіць? Збольшага так, але з прыходам файла на месца адбітка сыходзіць аўтарства мастака і арыгінальнасць фатаграфіі для калекцыянера. Ды гэта, на думку Барыса Гройса, таксама не зусім адназначна, паколькі кожны перанос файла ў новы фармат, на новы носьбіт ужо робіць яго абноўленым, то-бок — арыгінальным. Аналагавая фатаграфія — рарытэт? Таксама збольшага: для творцаў, якія працуюць з лічбавымі медыя, гэта вяртанне ў дадзігiтальную эпоху, і яно, вядома, рэвалюцыйнае. Яно патрабуе зусім іншай матывацыі, засяроджанасці, навыкаў і абсталявання, у рэшце рэшт. Але разам з тым ёсць цэлыя супольнасці фатографаў, што ад аналагавай тэхнікі і не сыходзілі нікуды! У іх усё працягваецца без рэвалюцый. У Беларусі мы ведаем такіх аўтараў пайменна (Уладзімір Суцягін, Альберт Цэхановіч, Марыя Бане, Андрэй Васкрасенскі), яны мэтанакіравана працуюць і паспяхова выстаўляюцца.
Таму ў прынятым вызначэнні «альтэрнатывы» я не бачу сэнсу, хоць аналагавы фотаздымак ні ў нашай краіне, ні ў суседзяў дакладна не адносіцца да масавай культуры.
У поўнай адпаведнасці са статусам, віленская выстава традыцыйная: працы вісяць на сцяне, няма відэа і аб’ектаў, паказ абыходзіцца без перфарматыўнасцi, абмеркаванняў дыскурсу і г.д.
«Iнтравертныя людзі»
Сітуацыя ў літоўскай фатаграфіі, дзе мастацкая школа не проста моцная, але і ўпісана ў шырокую культурную традыцыю, склалася такім чынам, што шуканы напрамак аформіўся ў Асацыяцыю. LAFA (Літоўская асацыяцыя аналагавай фатаграфіі) утварылася ў 2013 годзе і ў пачатку 2014 года правяла першую выставу.
«З таго часу ладзім ужо трэцюю, і асноўная задача LAFA — прамоцыя аналагавай фатаграфіі, — распавядае Андрэй Антонаў. — У Асацыяцыі прыкладна 50—60 сяброў, існуе яна за кошт сяброўскіх складак. Нам вельмі дапамагае тое, што любы падаткаплацельшчык Літвы са сваіх падаткаў можа пералічыць 0,5—2% на наш рахунак. Гэта можна зрабіць, напрыклад, пры афармленні штогадовай падатковай дэкларацыі.
Сябры Асацыяцыі і аўтары снежаньскай выставы — у асноўным аматары. Несістэмныя людзі... Гэта відаць нават па памерах адбіткаў. І зразумела, што мы займаемся і паказваем працэсы, якія адбываюцца за межамі мэйстрымных плыняў.
Ва ўсіх аўтараў розныя прафесіі. Напрыклад, Кястуціс Плейта Кавалюнас — музыка, але i выкладчык фатаграфіі. Мы мала сустракаемся, і я сказаў бы, што ў нас спячая арганізацыя, мы маглі б ісці больш актыўна. Першапачаткова нават ставілася задача паказаць аўкцыяністам аналагавую фатаграфію, растлумачыць, чым займаецца Асацыяцыя, але пакуль гэтага не адбываецца.
Хоць ёсць моцныя асобы, вось класік літоўскай фатаграфіі Гінтаўтас Трымакас, які падтрымлівае нас, дапамагае — парадай, тэхнікай».
Несістэмныя і iнтравертныя людзі ў працы не схільныя да тэматызацыi: «Часта тыя, хто добра займаецца канцэптуалізацыяй, паказваюць карткі не вельмі... І ўжо тым больш ніхто не хоча быць актыўнай медыяперсонай: тут, у масавай культуры, спецыфіка складаецца ў тым, што гэта люстэрка, у якое не ўсе любяць глядзецца».
Па-свойму гэта постканцэптуальная фатаграфія. Яна, не адмаўляючы працы з тэкставымi інтэрпрэтацыямі, прад’яўляе дакументальную, незваротную ў дзігітальным сэнсе «карцінку».
Фатограф «жыве з архіва»
Ёсць прыклады мэтраў — Антанас Суткус, які сышоў з фазы актыўнага фатаграфавання, але шмат працуе з архівам. Яго выставы праходзяць у розных краінах свету. З таго ж пакалення Альгімантас Кунчус. У параўнанні з іх традыцыйным памерам 18 х 24 см, цяперашнія 1 х 1,5 м — гэта проста вар’яцтва!
«Фотаздымак наогул патрабуе часу для ацэнкі, — працягвае Андрэй Антонаў. — Як літаратура дае разуменне адыходзячага часу, так і фатаграфія набірае вагу толькі з часам. Яна валодае дзіўнай і непрыемнай уласцівасцю: нават няякасны, не вельмі зразумелы кадр пакрысе атрымлівае большы сэнс — як дакумент».
Гэтае адчуванне прамінулага, таго, што з’яўляецца незваротным, давёў да фатаграфічнай канцэпцыі Саўлюс Славінскас у серыі «Age»: ягоныя «Грані» ў прамым і пераносным сэнсе знікаюць, бо кадры на плёнцы фіксуюцца мінімальны час і выявы бачныя толькі на працягу выставы. Праз 10 дзён іх ужо няма.
Рафінаваная i вытанчаная
Снежаньская выстава невялікая і не галерэйная, але гэта цікавае месца для Вільнi — кінатэатр «Skalvija», дзе паказваюць артхауснае кіно. Адзін з апошніх такіх кінатэатраў.
Удзел у ёй узялі сем аўтараў: Эгле Раткелiтэ, Лявас Жыракавас, Анастасія Салаўёва, Вальдэмар Давейка і Дынга Дрансутавiчэне, Мантас Пуйда і Андрэй Антонаў.
Адбіткі выкананы ў розных тэхніках: бром-сярэбраны друк, бром-сярэбраны друк з размалёўваннямi і аплікацыяй, альбумiнавы друк, паляроiд і паляроiд з трансферам, дырэкт-пазітыў, «дзённы друк», друк без праяўкі з наступнай фіксацыяй.
Працы сабраны практычна без куратарскага вока, па сутнасці гэта крафтавая фатаграфія, для якой важны выніковы адбітак. А калі б гэта быў «толькі файл, то ад фатографа ён быў бы адрэзаны кучай тэхналогій».
Работы самога Андрэя Антонава — абсалютна рукатворная, атмасферная фатаграфія, мінімалістычная ў сюжэце, але акварэльная па тонкасці тэхналогіі друку. Гэта калекцыйныя фотаздымкі менавіта па сваёй эксклюзіўнасці і захапляльным абаянні мастацкай традыцыі. Яе і сапраўды не абясцэньваюць час і падыходы сучаснага арту.
Любоў ГАЎРЫЛЮК