У Жыля Дэлёза мы знаходзім катэгарычнае выказванне пра крэатыўнасць мастацтва: «Мастацтва не камунікатыўнае, мастацтва не рэфлексіўнае. Мастацтва, навука, філасофія не сузіральныя, не рэфлексіўныя, не камунікатыўныя. Яны крэатыўныя, і кропка». Тут ён выводзіць мастацтва са сферы практык, ініцыяваных пытаннем «Што гэта значыць?». Дэлёз сцвярджае перавагу акта тварэння над актамі значнага функцыянавання ў канкрэтных сацыяльна-гістарычных кантэкстах. Магчыма, выраз Дэлёза ўжо часткова гістарызаваўся ў стаўленні да таго, што адбываецца з вобразамі ў сучаснай медыяльнай сферы. Але, тым не менш, ён захоўвае такую энергію пытання да намеру мастацтва «быць у гэтым свеце», якую нельга ігнараваць.
Рэальнасць
З гэтай пазіцыі мы прыходзім да наступнага разумення: візуальныя вобразы «Уцёкаў» Залознай павінны і могуць разглядацца не толькі з пункту гледжання таго, што яны нам паведамляюць, але і з пункту гледжання таго, што праз гэтае паведамленне ствараюць. Ёсць адна сувязь, пра якую нас інфармуе аўтар: частка работ выканана на аснове дакументальных фатаграфій. Гэта важны момант карэляцыі праекта з рэальнасцю (як мы яе вызначаем) з аднаго боку, а з іншага — гэта і выклік ёй самой у пытаннях «Што здарылася? Што адбываецца?», рэальнасці, якую сцвярджае дакументальная фатаграфія ў высілку на лімітавае выказванне пра яе ў візуальным вобразе. Мы ведаем, што ёсць шмат прэтэндэнтаў на рэпрэзентацыю ў нашым сімвалічным свеце. Але ў свеце мастацтва кожны прэтэндэнт унікальны і адзінокі ў сваёй спробе ўсталяваць сувязь з рэальнасцю з дапамогай яе стварэння. (Мастак не столькі шукае саюзнікаў, колькі захоплены запалам будовы новых сувязяў.)
Тыя, хто спяць
Калі мы глядзім на спячага чалавека, мы, напэўна, павінны адчуваць некаторае замяшанне і хваляванне ад таго, што апынуліся ў сітуацыі, калі дакладна не ведаем, дзе той чалавек знаходзіцца. Ён прысутнічае для нас у сваёй візуальнай матэрыяльнасці і адначасова адсутнічае — бо для яго нас няма ў ягоным свеце. Пытанне ў тым, як здольнасць быць бачным падчас уласнага сну мяняе саму структуру таго, што адбываецца. Спячы ўключаны ў свет праз неўсвядомленую ізаляцыю ад яго. Тады сам па сабе ён сімвалізуе фатальную пакінутасць свету і трывожнае ператварэнне ў мрою, якая нікому не належыць. Бо метафара сну — гэта і метаформа тагасветнага.
Тут, напэўна, дарэчы будзе паглядзець на спячага як на чалавека, які страціў свядомасць, раптам выпаў з прымусовай цыркуляцыі свайго сацыяльна-гістарычнага месца. У работах Наталлі Залознай перажываеш адчуванне, нібы сон заспеў яе персанажаў знянацку. У момант гэтага перажывання мы выяўляем, наколькі яны бездапаможныя перад яго раптоўным уздзеяннем. Гэта можа быць падказкай таго, што ў рэальнасці адбылася нейкая радыкальная падзея, якая саму тую рэальнасць і адмяніла ў форме яе ўсведамлення. Пра протападзею мы можам меркаваць толькі вось па гэтых «неўсвядомленых» візуальных скульптурах, што выпрабавалі на сабе загадкавы падзейны зрух, які размясціў іх на мяжы «жывога і мёртвага».
Уцёкі
У гэтай рэальнасці любыя рэальныя ўцёкі, каб ажыццявіцца, павінны перасекчы мяжу «жывога і мёртвага», таго пункту, дзе распадаецца сувязь ілюзорнага і рэальнага, якая ляжыць у аснове «сну» нашага паўусвядомленага існавання. Рух вобразаў праекта адбываецца ў кірунку гэтай мяжы, але сам рух мы візуальна ўспрымаем як нерухомае. Нерухомы рух. Як гэта магчыма? І чаму магчыма?
Можа быць, таму, што гэта адзіны рэальны сцэнар уцёкаў ва ўмовах, «прадыктаваных рэчаіснасцю, калі чалавек, незалежна ад яго асабістых перакананняў, вымушаны дзейнічаць паводле законаў гэтай рэчаіснасці»? (Цытата з Наталлі Залознай.) Гэта значыць, нерухомы рух — адзіна магчымы ва ўмовах немагчымасці ўцёкаў. Тут трэба звярнуць увагу на адну важную інтэнцыю, з якой, відаць, працуе аўтар: уцёкі магчымыя, уцёкі немагчымыя. Наогул аповед пра ўцёкі — адзін з самых папулярных культурных сюжэтаў, паколькі ў ім фармулюецца пытанне пра рэальнасць таго, што адбываецца (што гэта значыць?), адначасова з пытаннем да гэтай рэальнасці (што насамрэч адбываецца?).
Ігральныя карты
Мы ведаем, што, акрамя ўсяго іншага, ігральныя карты — гэта пераўтвораная форма безасабовых сіл. Яны адсылаюць да такога ўзроўню рэальнасці, на якім наша асобаснае «Я» аказваецца на скрыжаванні фатальнага і выпадковага. Візуальная структура карт ужо сама па сабе ёсць паведамленнем пра расшчапленне «Я», ці нават дакладней — аб неабходнасці гэтага расшчаплення для таго, каб фатальнае і выпадковае стварылі эфект безасабовага. Безасабовае ўжо існуе ў партрэтаванні спячых: яны адчувальна дэіндывідуалізаваны жывапіснай тэхнікай, што стварае эфект светлай асобы-плямы. Закон безасабовага — гэта дзеянне без узгаднення, дзеянне, удзел у якім нельга ігнараваць, яно акружае цябе і адлюстроўвае ў сабе. Як ні паварочвай «карту» свайго «Я», ты заўсёды будзеш выяўляць амбівалентнасць расшчаплення сябе ўнутры гэтага безасабовага дзеяння.
Што гэта за дзеянне? Напрыклад, вайна.
Дзеянне мастацтва
Гэтыя трывожныя сцэны як такія няяўна ўтрымліваюць нейкае пытанне, што канструюе, намацвае аўтарка праекта. Але каб яго пачуць, трэба сфармуляваць сваё: як дзейнічае мастачка ва ўласным даследаванні «ўцёкаў»? Адказ можа быць і такім: мастачка вяртае гэтыя сцэны, каб яны паўтарыліся. Калісьці яны былі створаны канкрэтнай сацыяльна-гістарычнай рэальнасцю вайны і фатаграфічна зафіксаваныя. Цяпер яны рэінкарнаваны ў сучаснасці з дапамогай мастацка-сімвалічнай трансфармацыі, якая вызваляе іх ад гістарычна-дакументальнага часу і месца. Але дзеля чаго?
Магчыма, каб праз сімвалічнае падваенне сцэны сну ў акопах, на пероне метро, што выкарыстоўваецца як бамбасховішча і г.д. Трансфармавацца з фрагментаў рэальнасці ў візуальна-матэрыяльную эмблему, якая кансалідуе ў сабе логіку паходжання і распаду гэтай рэальнасці. А паўтарэнне тут канструюе пастку для магчымасці нашага ўспрымання падзеі, што знікае, задача ўсведамлення якой павінна пастаянна ўзнаўляцца ў форме пытання пра яе і да яе.
Іншымі словамі, дзеянні аўтаркі праекта звязаныя хутчэй не з пошукам дакладнага адказу, а з клопатам пра аднаўленне пытання, пра яго нястомны паўтор. Пытання пра магчымасць асэнсавання таго, што адбываецца ў фатальнай сітуацыі, і адначасова пра магчымасць свабоднага валявога дзеяння ў сітуацыі фатальнасці. Уласна, сама актыўнасць мастачкі Наталлі Залознай у гэтым праекце і ёсць спробай рэалізацыі магчымасці такога дзеяння.
Дзмитрый КАРОЛЬ