Монаспектакль Бірутэ Мар «Анёлы Дастаеўскага» прызначаны толькі для камернай аўдыторыі і не выпускае з-пад увагі недавер, з якім ставяцца да класічнай літаратуры сучаснікі, таму пра «слязу дзіцяці» не будзе нават згадкі. І калі эпоха ўсеагульнай іроніі скончыцца, прыгадаюць, што ў сваёй пастаноўцы Бірутэ Мар — як аўтарка сцэнара, рэжысёрка і выканаўца — карыстаецца з яе адзіны раз, эпізадычна ўвасабляючы славутую бабу, намаляваную пісьменнікам у «Злачынстве і пакаранні» (тая баба як выскачыць!), і падмацоўвае тэкст пераканаўчым, проста гімнастычным скокам праз рампу.
Спектакль, прадстаўлены эскізна ў лістападзе 2015 года і праз год паказаны мінскай публіцы, даводзіць, што артыстка развітваецца з іроніяй, прымушаючы гледачоў усведамляць, як гадуецца пачуццё: запамінаць адчуванні і адказваць перад сабой за сорам, спачуванне, цікаўнасць, перамяшаную з прадчуваннем жаху, прыгадваць з пісьменніка, што «ўзгадаванае жыве і жывое толькі пачуццём судакранання свайго таямнічым іншасветам...» Што ўзгадаванае? Ды іншасветнае насенне. Якое на зямлі пасеяў Бог.
«Пяшчотную абыякавасць свету» мастачка Крысціна Нарвілайтэ атаясамлівае з прыглушанай чырванню падлогі, строямі на манекенах, з мноствам дыхтоўных мужчынскіх чаравікаў і дзявочых туфлікаў — абутак атуляе ўмоўную рампу, наструньвае асацыятыўную памяць залы (музей? вайна? рэчы закатаваных?), а фасоны ўбораў старой добрай часіны не супакойваюць, а сведчаць хіба пра тое, што яна так і не надышла. Так, з Бірутэ кожную хвіліну трэба быць напагатове: празрыстую Настачку з «Белых начэй» падтрымае князь Мышкін, якога з незаўважнай лёгкасцю перастрэне Стаўрогін, а з «Братоў Карамазавых» вынікне Грушанька: іхнія цвялівыя маналогі (вызначэнне пісьменніка), адметна скампанаваныя і драматургічна паслядоўныя, усё адно як дададуць чырвані падлозе, ператруцца, пераціснуцца, перамяшаюцца ў прасторы пастаноўкі, уцягнуцца ў музыку Антанаса Кучынскага, распусцяцца ў ёй і ўзнікнуць нанова... Пра «Хлопчыка ў Хрыста на яліне», гнанага сірату са згубленай святочнай капейчынай, пра нетутэйшую журбу Бірутэ апавядзе пад фінал. Узважана. Нават спакойна (пафасам тэатр здаволены): пэўна, насенне іншасвету добра гадуецца ў мастацкай упарадкаванасці.