Аднак рэжысёрка-пастаноўшчыца Наталля Слашчова адрасавала казку менавіта дзецям, бо, верагодна, дарослае жыццё мусібыць багатым на шматлікія засмучэнні да расчараванні. Як у галоўнай гераіні Светы, якую ўвасабляе Кацярына Карчэўская: тая працуе ледзь не па дваццаць чатыры гадзіны на суткі і яшчэ паспявае марыць... зрабіцца дырэктарам. І толькі для таго, каб... працаваць яшчэ больш! А тым часам мары Свецінага дзяцінства застаюцца недагледжанымі ды занядбанымі, выпетрываюцца, курчацца, сыходзяць на нішто. І вось-вось пераўвасобіцца Света ў сапраўдную бізнэс-лэдзі канчаткова і незваротна (хоць каго цяпер здзівіш паспяховымі топ-менеджарамі ў спадніцах ды на абцасах?), але з левага чаравіка з’яўляецца Ша-Ша (Алег Савянок) — гэткі сучасны варыянт традыцыйнага дамавіка, хай сабе і часовага. З’яўляецца, каб нагадаць жанчыне, што кар’ерны рост — не адзіная вартая мэта ў жыцці.
Як жа бракуе часу чалавеку ХХІ стагоддзя! Як ён не ўмее своечасова спыніцца і адкінуць справы, якія здаюцца такімі важнымі, — хоць бы на гадзіну, на дзень, на тыдзень! І каштуе гэтая «гонка за лідарам» задорага — здароўя, раўнавагі, шчасця.
Артысты працуюць з планшэтнымі (вываднымі) лялькамі, але не застаюцца ў цені сваіх падапечных. Наадварот — іх пластыка, міміка, эмоцыі шчыльна ўплецены ў палатно пастаноўкі. Важным складнікам сучаснай казкі зрабілася і музычнае афармленне кампазітаркі Алены Зуй-Вайцяхоўскай.
Вонкавыя адметнасці спектакля вырашыла мастачка Вольга Шчарбінская: гартаюцца велізарныя шырмы ў выглядзе аркушаў са сшытка — і з кватэры героі трапляюць на вуліцы мегаполіса. Яшчэ адна старонка — і ў офісе (на працы) Света адначасова трыумфуе і развітваецца з надзеямі, калі гіганцкая дырэктарава галава за кабінетнымі дзвярыма робіць супрацоўнікам вымову і прызначае сабе пераемніка — Святлану. Галава нагадвае партрэты правадыроў, якія за савецкім часам перад высокімі трыбунамі цягалі ўдзельнікі святочных дэманстрацый...
Хутчэй за ўсё, найлепшую глядзельню сучаснай казцы складуць сямейнікі. Спанатранай публіцы будзе карысна параўнаць свой «асабісты курс» з тым, што адбываецца на сцэне, а для меншых прадугледжана карысная прышчэпка ад глабальнага прагматызму, які ваяўніча сунецца ва ўсе сферы існавання сучаснага грамадства — без выключэння.
Уладзімір СТУПІНСКІ