Паходжаннем — са шкалярскага тэатра 1787 года праз дбанне Каятана Марашэўскага, выкладчыка Забельскага дамініканскага калегіума. Францішак Аляхновіч не прамінуў выкарыстаць ягоныя ўдалыя маналогі для сваіх п’ес на пачатку 1920-х, калі «асэнсавана далучаў нацыянальную літаратуру да плыняў сусветнага тэатральнага мастацтва». У 1991 годзе рэжысёр-пе-
дагог Андрэй Андросік з калегам Уладзімірам Рудавым падрыхтавалі спектакль «Камедыя...» як дыпломны — для выпускнога курсу сваіх вучняў з Акадэміі мастацтваў. Драматургам выступіў Уладзімір Рудаў, звярнуўшы ўвагу сучаснікаў на раскошу барочнае назвы — «Камедыя пра злашчаснага селяніна Дзёмку, ягоную жонку Маланку, арандара жыда Давіда і Чорта, які страціў сэнс існавання».
Выбіраючыся на смешную гісторыю з тутэйшай мінуўшчыны, пра гэткія карані-вытокі глядач зазвычай і не падазрае — ну заснуў селянін Дзёмка, ну прысніў такую чартаўню! За дваццаць пяць гадоў пракату наструніўся хіба што калектыўны досвед залы, бо ўсё-ткі тэатр — ён жа не проста так... А для аматараў і знаўцаў спектакль — своеасаблівае пасланне з мінулага, дзе творцы зломных эпох сустрэліся, паразумеліся ды ўзгаднілі «такія складаныя філасофскія паняткі, як узнікненне светабудовы, крыніцу канфлікту дабра і зла, мэту асобнага чалавечага жыцця і ўсяго чалавецтва», выказваючы «ўпэўненасць у канчатковай перамозе дабра, пераўтварэнні свету і чалавека...».
Абгрунтаванне чвэрцьстагоддзевага поспеху «Камедыі...» вынікае з кнігі Галіны Алісейчык «Містэрыі старажытных славян і генезіс тэатра»: «Тэатр з’яўляецца наймацнейшым сродкам уздзеяння на масавую свядомасць, таму ва ўсе часы і ў кожным грамадскім утварэнні была надзвычай важная матывацыя стварэння спектакля». Інакш кажучы, нашто я разяўлю рот, што я скажу свету? Марашэўскі задумаў «Камедыю...» дыдактычнай, Аляхновіч аддаў належнае філасофіі, Рудаў выкшталціў рарытэт да актуальнай неабыякавасці, выканаўцы надалі сюжэтным павароткам адметнай гульнёвай вытанчанасці, агульныя намаганні рэплікай «Я смяюся, бо слёз ужо няма» падсумоўвае персанаж Давід, чыю ролю выконвае Аляксандр Палазкоў. Чорта іграе Генадзь Фамін, Дзёмку — Анатоль Голуб, Маланку — Святлана Нікіфарава. Без пафасу і ківання пальцам пастаноўка спалучае гісторыю і гульню, мяняе націскі і разнастайвае сэнсы так, што на класічнае пытанне «Пра што спектакль?» проста і каротка не адкажаш — як і на адвечныя чалавечыя пытанні да самога сябе.