«У МЯНЕ АЛЕРГІЯ НА КАНВЕНЦЫЙНАСЦЬ»
Прызнаюся, я знаходжуся пад уражаннем ад вашых фільмаў. Тое, што вы любіце небанальныя сюжэты, — зразумела. У стужцы «Барыс без Беатрыс» злучылі life style з чымсьці псіхадэлічным. У «Вік і Фло ўбачылі мядзведзя» любоўную гісторыю аб’ядналі з хорарам. Але ж абсурднасць, момант хаосу ў карціне — гэта толькі метад. Навошта, дзеля чаго ён вам?
— У мяне алергія на канвенцыйнасць. Тое, што мне цікава, — сутыкненне розных жанраў. «Вік і Фло» быў створаны тры гады таму, і я думаў, ці змагу фільм пра каханне ператварыць у хорар. Гэта мой почырк і мая мэта: уразіць публіку. Таму я змешваю драму і камедыю. Па-іншаму мне не цікава. І я — вольны рэжысёр, якому ніхто не можа сказаць, што яму рабіць. Напэўна, я мог бы жыць, як Вік, — аўтаномна, у лесе, займаючыся сваімі справамі.
То-бок тое, што называецца «ідэяй», «зместам», вы пакідаеце гледачу?
— Вядома. Не выношу простыя «адказы» для ўсіх, агульныя «рашэнні». Маё кіно — гэта іншае бачанне свету, гэта эксперымент. Вы сыходзіце дамоў і працягваеце пра яго думаць. «Змест» — гэта толькі вашае — вопыт, асацыяцыі, уяўленне.
Для мяне нібыта рэальныя «высновы» — насамрэч забаўка. Не сапраўднае кіно. Мае фільмы — адкрытыя рэчы, няма ніякіх адказаў для ўсіх, вы адказваеце заўсёды самі і для сябе.
Тады я павінна прызнаць, што па якасці кінамовы, па яе свежасці вы і самі маглі б удзельнічаць у «Маладосці на маршы»...
— Дзякуй, гэта добры камплімент. «Вік і Фло» — мой шосты фільм, я раблюся старэйшым, але ўвесь час шукаю нешта новае. Па-ранейшаму не люблю клiшэ, гатовыя рашэнні, па-ранейшаму люблю гуляць з жанрамі, люблю гібрыды розных рэчаў, розных моў. Шукаю арыгінальнасць, як быццам я зноў тынэйджар і мне пятнаццаць.
Пра якія інавацыi вы кажаце, вызначаючы іх як самае цікавае ў кіно?
— Пра тое, каб не дубляваць жыццё, але і не рабіць навуковую фантастыку. Пра бясстрашнасць і пастаянную навізну. Не проста распавядаць свой сцэнар, гэта лёгка, але мець што сказаць гледачу. Так здымаць значна больш складана.
«УВЕСЬ СТРЭС ГЭТАГА СВЕТУ»
Ваша гераіня Беатрыс захворвае незразумелай меланхоліяй — праз «стрэс гэтага свету», як лічыць лекар. У жыцці яе мужа Барыса мусіў адбыцца зусім абсурдны збой, каб вывесці мужчыну з раўнавагі: толькі тады ён вырашаецца на пераасэнсаванне, на ўчынак. Але вы некалькі разоў вымавілі слова «фан» на прэзентацыі фільма. Убачылі тут камедыю?
— Чаму не? Ён мае зносіны са сваёй свядомасцю, або з сумленнем — называйце, як хочаце. «Гэта» прыходзіць да яго ў выглядзе тэатральнага персанажа, з ніадкуль. Па-мойму, пацешна.
А мядзведзь да «Вік і Фло» адкуль прыйшоў?
— Закаханыя жанчыны гінуць у смяротных пастках — для мядзведзя. Гэта іх апошнія думкі, апошнія адчуванні. Хоць потым яны ідуць па дарозе жывыя-здаровыя, памятаеце? Пасля «сустрэчы» з мядзведзем, пасля пастак. Гэта ваш хорар, ён у вашай галаве, а ў іх усё ў парадку. Праўда, ніхто не ведае, як гэта разумець. (Смяецца.)
Вы часта здымаеце непрафесійных акцёраў. Што вы шукаеце ў іх, чаго чакаеце?
— Не вельмі часта. Часам. Прафесіяналам складана працаваць з непадрыхтаванымі людзьмі, яны лепш знаходзяць мову ў сваіх «групах». Але калі для ролі мне патрэбен звычайны чалавек, вядома, гэта яго індывідуальнасць, аўтэнтыка. Ён прыходзіць з прыватным вопытам і перажывае маю гісторыю па-свойму. Ён не ўмее гуляць, але ў яго ёсць фантазія і ён данясе да гледача тое, што мне трэба. Калі ўсё складваецца, атрымліваецца мікс.
З ПАВАГАЙ ДА МАРГІНАЛЬНАСЦІ
Што можна сказаць па конкурсе «Маладосць на маршы»? Вам спадабалася «Заалогія»?
— Прыемна быць у маладзёжнай праграме, мне не вельмі цікавыя сталыя аўтары. Вы ўжо зразумелі, што я гляджу ў першую чаргу на эксперыменты з формай, на мову кіно. Наогул падабаецца фестываль — праграма, арганізацыя, умовы для працы. Мне цікава. У журы «Маладосцi» ёсць актрыса (Аiстэ Дзержутэ; Літва) і адборшчык (Раберта Куэта; МКФ у Сан-Себасцьяне, Іспанія) — гэта значыць, усе пункты гледжання будуць розныя. Але бос — я! І вырашаць буду я! Пакуль мы паглядзелі толькі палову фільмаў, і, думаю, вылучаюцца «Дэманы», «Святы» і «Заалогія». «Дэманы» — канадская карціна, ужо бачыў яе і з задавальненнем паглядзеў яшчэ раз. А «Заалогія» — вельмі моцны фільм і вельмі незвычайны. Шмат ідэй, але шмат і эксперыменту. Не ведаю, як ён спадабаўся гледачу, але думаю, што гэта не «жудасцік», гэта проста арыгінальнае кіно.
Як вашы фільмы ўспрымаюць у Канадзе?
— Пачынаў я, дарэчы, як крытык. Сёння маю рэпутацыю вялікага арыгінала. Мяне ведаюць як рэжысёра, што кожны раз робіць нешта новае. Заўсёды здзіўляе, ніколі не паўтараецца. Паважаюць за фестывальныя поспехі. Але ў мяне невялікая аўдыторыя. Гэта нібыта дзіўна: з аднаго боку, павага, з другога — маргінальнасць. Але маё кіно не прыемнае, не кампліментарнае. Масавы глядач часта крывіцца, не разумее маіх твораў або застаецца ў здзіўленні. Людзі наогул кажуць: «На фільмы Дэні Катэ хадзіць небяспечна». Для мяне гэта камплімент. Але калі тлумачыш, «што хацеў сказаць аўтар», — тады так, з’яўляецца разуменне, маўляў, гэта мой почырк. Вядома, я б вельмі хацеў, каб мая аўдыторыя была большай.
І пры гэтым не хочаце быць канвенцыйным! Мне здаецца, вам блізкае паняцце «пераапісаць», «перасабраць» сітуацыю.
— Ёсць адна рэч, якую я не выношу, — рэалізм. Я ніколі не буду гэтага рабіць. Навошта капіяваць рэальнасць, калі ў вас ёсць уяўленне і можна ствараць нешта новае? Так, я будую сітуацыю, а потым руйную яе. І павінен сказаць, што мае раннія фільмы менш зразумелыя і больш радыкальныя. Напрыклад, «Зменлівы стан» (2005), «Бестыярыум» (2012).
А далей? Што яшчэ вы прыдумалі?
— Цяпер я здымаю дакументальнае кіно пра шасцёх бодыбілдараў, іх прыватнае жыццё. Яны ўвесь час трэніруюцца, адзін з іх рэстлер, яшчэ адзін — трэнер. Вясной наступнага года трэба скончыць, да Канаў, думаю, паспею. Але не да Берлiнале.
І што гэта ў вашым разуменні такое — «дакументальнае кіно»?
— Наогул я лічу, што ўсё кіно — гэта арт. Не разумею, навошта здымаць «праўдзівыя», пазнавальныя сюжэты — гэта заўсёды паўтор аднаго і таго ж. Так што з дакументам будзе таксама эксперымент.
«Распавесці гісторыю» — для мяне не галоўнае, я працую з тым, як распавесці. Заўсёды пачынаю са знаёмага, а потым раблю добры крок у бок. Усяго на адзін метр...
Любоў ГАЎРЫЛЮК