Імпрэза зрабілася вяртаннем ва ўлонне айчыннай музычнай культуры імя Гурава (1956—2002), беларуска-ізраільскага кампазітара, які сышоў заўчасна. Ягоныя сачыненні не гучалі ў горадзе дзяцінства і маладосці амаль чвэрць стагоддзя. Канцэрт-рэтраспекцыя стаўся для слухачоў вечарам адкрыццяў: у ім прагучалі творы, пераважна невядомыя беларускай публіцы. Яны напісаны сорак год таму, але І сёння гэтыя опусы не страцілі сваёй мастацкай вартасці ды нават здольныя даць фору сучасным кампазітарскім пошукам.
Канцэрт распачаў нечаканы драматургічны ход, дзякуючы якому слухачы літаральна перанесліся на чатыры дзесяцігоддзі назад: акустычным парталам у мінуўшчыну сталася архіўная фанаграма 1976 года — фрагмент кампазіцыі Віктара Капыцько «З “Бальнічнага сшытка” Сямёна Кірсанава». Ён прагучаў у запісе ў выкананні самога аўтара (голас) і Аркадзя Гурава (партыя фартэпіяна). Прысутныя нават пачулі голас маладога Аркадзя, паколькі ў гэтай нетрадыцыйнай кампазіцыі піяніст павінен, па задуме творцы, не толькі акампанаваць, але і, напрыклад, шыпець скрозь зубы і прагаворваць тэкст у дуэце са спеваком.
...У далёкія 1970-я юныя Аркадзь і Віктар былі не толькі выканаўцамі сачыненняў адзін аднаго. Канцэрт «З музыкі Мінска 1975—1977...» стаўся дакументальным сведчаннем рэдкага ў кампазітарскім асяроддзі чалавечага і творчага сяброўства, надзвычай плённага ў сэнсе мастацкіх вынікаў. Нездарма Капыцько, вядучы і аўтар праграмы канцэрта, назваў свой творчы тандэм з Гуравым чымсьці накшталт «маленькай мінскай школы тых гадоў». Кампазіцыі, з якіх склалася праграма вечара, былі напісаны аўтарамі ў 18—20-гадовым узросце і з’яўляюцца яскравым сведчаннем неверагоднай адоранасці і сталасці маладых творцаў.
Спалучэнне ў адной праграме імёнаў Гурава і Капыцько падаецца не толькі заканамерным, але і сімвалічным. Абодва будучыя кампазітары нарадзіліся ў Мінску ў 1956 годзе, жылі на суседніх вуліцах, пазнаёміліся падчас навучання ў Музычным ліцэі (цяпер Рэспубліканская гімназія-каледж пры Беларускай дзяржаўнай акадэміі музыкі) і адразу сталі блізкімі сябрамі і творчымі аднадумцамі. Тады ім было па 15 гадоў. Распавядаючы пра залатую пару іх юнацтва, Капыцько з удзячнасцю згадвае тыя шматлікія гадзіны, што яны праводзілі разам — слухалі музыку, абмяркоўвалі прачытаныя кнігі, наведвалі тэатральныя пастаноўкі, пільна сачылі за навінкамі ў кінамастацтве. У 1970—1980-я творчыя стасункі кампазітараў былі даволі блізкімі, нават нягледзячы на тое, што на пэўны час іх жыццёвыя шляхі разышліся. Аркадзь у 1974 годзе стаў студэнтам Беларускай кансерваторыі. Віктар паступіў у Ленінградскую кансерваторыю ў 1975-м, але неаднаразова наведваў Мінск: усе творы, што прагучалі сёлета ў канцэрце, былі ім скончаны і ўпершыню выкананы менавіта тут.
Ва ўступным слове да канцэрта Віктар Капыцько адзначыў пэўны мастацкі ўзаемаўплыў адзін на аднаго прадстаўнікоў «маленькай мінскай школы». Але сачыненні сведчылі і пра непадобнасць маладых аўтараў, самастойнасць іх мастацкага мыслення. Так, ужо згаданая кампазіцыя Капыцько «З “Бальнічнага сшытка” Сямёна Кірсанава» ўразіла амаль дакументальнай фіксацыяй псіхафізічнага стану паміраючага чалавека і акустычным аскетызмам, з якім 18-гадовы аўтар перадаў экспрэсіянісцкую вобразнасць вершаў. У «Полінастальгіі» на тэксты з Байрана, Багдановіча, Лермантава, Шклоўскага лірычны «маналог героя» быў вырашаны метадам кінематаграфічнага мантажу, які ўвасобіў архетыпічны вобраз юнага Паэта з розных сэнсавых ракурсаў.
Два творы Гурава для барытона і фартэпіяна прапанавалі іншую трактоўку камерна-вакальнага жанру. Напэўна, менавіта эзатэрычныя вершы Рыльке падштурхнулі маладога кампазітара да насычэння музычнай тканіны яго сачынення «Тры вершы Р.М. Рыльке» інтанацыйнымі шыфрамі, што наблізіла канцэпцыю вакальнага цыкла да сімфанічнай. «Пяць зонгаў з лірыкі Б. Брэхта» выявілі процілеглы напрамак кампазітарскай дзейнасці Аркадзя — яго захапленне эстэтыкай брэхтаўскага эпічнага тэатру. Хочацца прыгадаць нечаканы і эмацыянальна пранізлівы эфект зняцця маскі вакаліста ў фінале, калі спявак застаецца ў адзіноце і, нібыта задумаўшыся, блукае па сцэне і спявае апошнія фразы зонга. Першымі і адзінымі да сёлета выканаўцамі твора сталіся ў 1976 годзе Капыцько (голас) і Гураў (фартэпіяна). Гонар вяртання з нябыту «Пяці зонгаў...» і прадстаўлення мінскім слухачам усіх згаданых вышэй вакальных сачыненняў Гурава і Капыцько належыць Уладзіміру Громаву (барытон) і Дзмітрыю Зубаву (фартэпіяна, Санкт-Пецярбург).
Разважаючы пра падобнасць і адметнасць творчага свету кожнага з сяброў-кампазітараў, цікава супаставіць інструментальныя сачыненні, напісаныя імі ў 1976 годзе. У Гурава — Варыяцыі для фартэпіяна на тэму Бартака, у Капыцько — Саната для фартэпіяна «Missa Brevis». Калі першы абраў шлях дыялектычнай трансфармацыі пастаральнай тэмы Бартака і яе інтанацыйнага абвастрэння, другі прапанаваў шэраг стылістычных прыгод, якія ў канчатковым выніку прывялі яго да спрадвечнай чысціні дыятонікі і прыгажосці мажорнага трохгучча. Абодва творы ўвасобіла ў канцэрце Кацярына Марэцкая-Яскельчык, якая, дарэчы, стала першай выканаўцай фартэпіяннай музыкі Гурава ў новым тысячагоддзі.
Сапраўды, камерныя сачыненні аўтараў, прадстаўленыя мінскім слухачам, не толькі выявілі надзвычай шырокую панараму іх памкненняў, але і прэзентавалі разнастайны эстэтыка-стылёвы зрэз тагачаснага мастацтва. Рознае аблічча ў творчасці абодвух сярэдзіны 1970-х набыў актуальны цяпер жанр музычнага перформансу, стваральнікамі якога ў беларускім мастацтве сталі менавіта яны. Напрыклад, мінчане атрымалі рэдкую магчымасць пачуць Дывертысмент для цымбалаў і падрыхтаванага раяля ў выкананні аўтара, Віктара Капыцько (падрыхтаваны раяль) і Ангеліны Ткачовай (цымбалы, Афіны), для якой гэты твор калісьці быў напісаны. Дывертысмент увасобіў парадаксальны «дыялог» салістаў-інструменталістаў, дасціпна абыграную ідэю музычнага спаборніцтва: так, у прыватнасці, падчас выканання салісты не толькі памяняліся інструментамі, але і паказалі складаны трук па перадачы цымбальнай палачкі — накшталт спрынтарскай эстафеты.
Галоўным падарункам для слухачоў з’явілася сусветная прэм’ера твора, што да нядаўняга часу ўвогуле лічыўся страчаным. Маленькая кантата «Апраўданне Афеліі» для нізкага жаночага голасу, скрыпкі і фартэпіяна па матывах трагедыі Шэкспіра «Гамлет» (у перакладзе Барыса Пастарнака) прадставіла натуральнае спалучэнне прынцыпаў эпічнага і псіхалагічнага тэатраў, якога дасягнуў у гэтым перфарматыўным творы Гураў як кампазітар і рэжысёр. Вобраз Афеліі цудоўна і надзвычай стылёва ўвасобіла Наталля Акініна (кантральта). Сцэнічныя партнёры Афеліі — Скрыпач (Аляксей Загорскі) і Піяніст (Дзмітрый Зубаў) — распавялі яе сумную гісторыю інструментальнымі сродкамі. Падаецца слушным, што прэм’ера «Апраўдання Афеліі» Гурава адбылася менавіта ў Мінску і стала своеасаблівым падарункам да 60-годдзя кампазітара.
Аркадзь рэпатрыяваўся ў Ізраіль вясной 1991-га. 25 лютага 2002 года ён трагічна загінуў пад Іерусалімам ад куль тэрарыстаў. Яго імя і творы сёння больш вядомыя па-за межамі Беларусі — дзякуючы мемарыяльнаму фонду «Шырат Аарон» («Песнь Аарона»), які штогод арганізуе вечары памяці кампазітара ў розных краінах свету.
Асабліва прыемна, што згаданы праект з’яднаў у Малой зале Белдзяржфілармоніі выканаўцаў з розных краін, якія спецыяльна дзеля гэтай значнай падзеі наведалі Мінск. Канцэрт стаўся цудоўнай нагодай спаткацца ў Мінску родным Аарона Гурава, ганаровым гасцям вечара: з Іерусаліма прыляцела ўдава кампазітара Мірыям Гурава, з Осла — яго старэйшая дачка Хана-Бэла, з Нью-Ёрка — сястра кампазітара Галіна.
Далучымся да словаў Віктара Капыцько, якія раскрываюць галоўную мэту аўтарскага вечара: «Спадзяюся, што гэты канцэрт будзе адным з зыходных пунктаў духоўнага вяртання Аркадзя Гурава ў горад, дзе ён вырас і ў якім была напісана яго выдатная музыка».
Аляксандра ШЭМБЕРАВА