І ў мяне не знайшлося ніводнай прычыны разбураць гэтую гармонію ўхвалення, але захацелася вызначыць, па якіх паказніках «Канал Культура» на ўражлівую колькасць адсоткаў супаў з нашым сённяшнім чаканнем ад мастацтва.
Што робіць Руслана Вашкевіча актуальным для арт-поля Беларусі? Што вымушае каментатараў на скандальных сайтах пакідаць лагодныя выказванні? Якія механізмы праяўляюць нашае ўяўленне пра лаканічныя і здавальняючыя адказы на пытанні пра жыццёвасць, свядомасць, пачуццевасць? І якім чынам выявы, гукі і тэксты мастацкага праекта фармуюць унутры нас імкненне да рашучых змен і ўпэўненага выбару, які мы здзяйсняем за сценамі выставачнай пляцоўкі «Дома карцін»?
Прастора. Руслан Вашкевіч даўно вядомы сваімі прасторавымі ды сэнсавымі інтэрвенцыямі, правакацыямі, выкрываннямі. Яго палотны бачылі сцены завода «Гарызонт» і палаца Румянцавых-Паскевічаў у Гомелі, мноства галерэй і пляцовак. Ён выкарыстоўвае прастору па максімуме, ствараючы актуальнае для пэўнага месца выяўленне мастацкіх аспектаў у той паслядоўнасці і ў той якасці, у якіх яны ідэальна супадаюць з асаблівасцямі месца. Падаецца, што творца вельмі ўдачлівы: сцены дакладна той самай вышыні, што патрабуюць карціны, прасторы дастаткова, каб выставіць усё запланаванае, атмасфера менавіта такая, якая неабходна для ўспрымання твораў. Але давайце будзем шчырымі: ці не першасным тут ёсць феномен Вашкевіча, што выкарыстоўвае прастору так, каб яна стала ідэальнай для яго задумы, бо ў супрацы месца+твор перамагае толькі сяброўства.
Праект. «Канал Культура» — гэта не асобная выстава Вашкевіча, а серыя мерапрыемстваў, якая ўключае лекцыі культуролагаў Максіма Жбанкова і Альміры Усманавай, выступ пост-панкавага праекта «.К», дыскусіі, прагляды, насычаныя тэкстамі, ідэальна сканструяваныя ў экспазіцыйным, публічным і інфармацыйным плане. Хаця б якраз той фактар, што ні адна паважная рэдакцыя не прапусціла навіну пра «КК», — паказнік ідэальна сфармаванага праекта, над якім працавала цэлая каманда прафесіяналаў і ў які было ўкладзена дастаткова часу, сродкаў і таленту. Аўтар прадставіў больш за сотню работ: карціны, інсталяцыі, відэа. Прастора выбудавана накшталт лабірынта, глядач губляецца, як у супермаркеце, кіраваны выявамі і гукамі, без мэты рухаецца за маячкамі чарговага твора, складвае свой пазл асабістага досведу, актуальнасці выказанага мастаком і паўагучаных сэнсаў, што скразяць праз ўсю дзейнасць Вашкевіча.
Сучаснасць. «Цікава, якой будзе рэакцыя», — кажа пра кожны свой праект Руслан Вашкевіч. І публіка сапраўды не абмінае ўвагай творчасць майстра. Рэагуе, адказвае, абмяркоўвае, спрачаецца. Выкрыўшы праблему, на якую ніхто не звяртаў увагі, хаваючыся за будаваннем новых канцэртных пляцовак і гатэляў, мастак праявіў забароненае, справакаваў, адкрыўся для рэакцыі. Вашкевіч намаляваў парнаграфічныя карцінкі на карэньчыках кніг класічных аўтараў, дэманструючы плоскую пустату тыражнага глянцу сённяшняга дня, дзе на кантрасце з каляровымі вобразамі, зразумелымі, на жаль, нават дзецям, высакародна пацямнелыя ад часу вокладкі са сціплай пазалотай літар выглядаюць састарэлым смеццем ці, у лепшым выпадку, дэкаратыўнай аздобай чарговай кавярні. Мастак ставіць нас перад успрыманнем сучаснасці як неад’емнага рухавіка мастацтва ў рабоце «Не гледзячы ні на што». Карціна ніколі не страціць актуальнасці, бо выяўляе момант, які адбываецца менавіта зараз з новай і новай сілай пад уздзеяннем канкрэтнага кантэксту і гледача. А гэтых фактараў для прац Руслана Вашкевіча заўсёды будзе хапаць.
Мэсэдж. На ўваходзе ў «Канал Культуры» наведнікаў сустракаў зэдлік са звязкай выбухоўкі, з лічбамі, які павольна адлічвалі час. Выбух павінен здарыцца, лічбы аднойчы зробяцца нулямі, і імгненне, калі дэтанатар мастацтва спрацуе, будзе ў кожнага свой. Кульмінацыя настане, нарадзіўшы рэакцыю, што не пакіне былога, але народзіць новае ўспрыманне праекцый, якія мастак сфармаваў у адной з тых ідэальных і завершаных выяў, на што здольнае толькі мастацтва. У Руслана Вашкевіча быццам убудаваныя сістэмы ўздзеяння на чалавечыя пачуцці ад самага пачатку, ён няблага навучыўся імі карыстацца, пасланне заўсёды знаходзіць адрасата. Праца «Шкала Рыхтэра» як пошук устойлівай стратэгіі мастака ў хісткім свеце, выбудоўвае шлях станаўлення і самога майстра і натоўпу, які доўга чакаў зялёнага сігналу на тым баку, каб перайсці да разумення і ўспрымання, вынайсці ўпэўненае бачанне праблем пад новым ракурсам , з таго боку, дзе мы яшчэ не былі. «Канал Культура» стаў такім мастком, пераходам, паведамленне атрымана, прагледжана, успрынята.
«Канал Культура» стаў сапраўды каналам трансляцыі цэлага пласта ўзаемаадносінаў чалавек — грамадства, грамадства — краіна, краіна — культура, культура — чалавек.
Гэты канал праслухоўваецца.