Галоўным папулярызатарам сучаснай беларускай драматургіі і «хросным бацькам» шмат якіх маладых драматургаў з’яўляецца Цэнтр беларускай драматургіі. На выязных лабараторыях, што ладзяцца чатыры гады запар (у сёлетнім траўні адбудзецца пятая), выштукоўваюцца тэксты, якія адзначаюцца на адмысловых конкурсах, а калі пашчасціць, трапляюць і на айчынную сцэну.
У якасці эксперымента вынікі леташняй, узору 2015 года, лабараторыі прадстаўленыя зацікаўленай грамадскасці: за створаныя ў тандэме драматург-рэжысёр тэксты прапанавалі галасаваць патэнцыяльным гледачам. Планавалася, што гэтыя галасы ўлічацца, калі для пастаноўкі ў Рэспубліканскім тэатры беларускай драматургіі будуць выбіраць чарговую п’есу; спектакль меркавалася ўключыць і ў беларускі шоукейс форуму «TЭАРТ». Такім чынам у пэўнай ступені будучыя гледачы маглі самі вырашаць, што яны хочуць бачыць. Па выніках галасавання і абмеркавання прафесійнага журы вылучылася п’еса «Опіум» Віталя Каралёва, якая паўстала ў супрацоўніцтве з куратарам лабараторыі, кіраўніком Тэатра.doc Міхаілам Угаравым. Але планы выбару і ўліку не ажыццявіліся...
Доўгі час лёс «Опіума» заставаўся няпэўным, пакуль сёлета 25 лютага на краўдфандынгавай платформе «Вулей» не абвясцілі збор сродкаў для заключнага этапа пастаноўкі. Шанец на сцэнічнае жыццё п’еса атрымала дзякуючы Цэнтру візуальных і выканаўчых мастацтваў «Art Corpоration» і рэжысёру Аляксандру Марчанку, да іх далучылася каманда ў складзе мастака Андрэя Жыгура і акцёраў Максіма Брагінца, Андрэя Курэня, Юліяны Міхневіч, Антона Жукава, Ганны Семянякі. Грошай, паводле стваральнікаў спектакля, вымагала матэрыяльная частка пастаноўкі — дэкарацыі і касцюмы.
Нельга сцвярджаць пэўна, але вызначаная дата прэм’еры і той факт, што збор сродкаў скончыўся літаральна за тыдзень да яе, прымушаюць думаць — спектакль мусіў адбыцца нават тады, калі б не сабраў патрэбных грошай і яны б вярнуліся да спонсараў. Мяркую, кампанія па зборы сродкаў на пастаноўку «Опіума» стала ў большай ступені актам грамадскім, чым фінансавым, бо выявіла зацікаўленасць глядацкай аўдыторыі ў новай драматургіі — той, якая закранае шырокі спектр не самых прыемных пытанняў, нярэдка выводзіць на сцэну маргіналаў і ствараецца на сучаснай мове, часам насычанай ненарматыўнай лексікай.
Досвед «Опіума» засведчыў, што такая зацікаўленасць і нават патрэба існуе: праект паспяхова завяршыўся, атрымаўшы фінансавую і маральную падтрымку ста трыццаці шасці спонсараў, паводле лічбаў з «Вулля». 13 і 15 красавіка адбыліся перадпаказ і прэм’ера пастаноўкі. Трапілі туды толькі тыя, хто ахвяраваў грошы, а таксама прадстаўнікі прэсы і вузкіх тэатральных колаў. Кожны змог ацаніць асабіста, ці напраўду «Опіум» — «самы сумленны спектакль года», як было абвешчана яшчэ да выхаду ў пракат. Адзінкі вымярэння ступені сумленнасці пастановак пакуль не існуе, таму варта пакінуць гэты эпітэт: ад яго моцна патыхае рэкламай. А вось шчырым «Опіум» назваць можна. У пазнавальных сітуацыях, вобразах, дыялогах з п’есы паўстае рэальнае жыццё — з праблемамі, непаразуменнямі і чалавечай адчужанасцю. Сям’я нашых сучаснікаў з «маленькага горада на Дняпры, Рагачова» — хворая маці (Юліяна Міхневіч) і два сыны — жыве ва ўмовах беспрацоўя, інфляцыі, блізкіх ваенных канфліктаў. Малодшы сын Андрэй (Андрэй Курэнь) рыхтуецца да паступлення ва ўніверсітэт і ад’езду ў Мінск. Для яго гэта адзіная магчымасць не паўтарыць лёс брата Міколы (Максім Брагінец). Старэйшага звольнілі з працы, ён мусова ўладкаваўся ў бюро рытуальных паслуг, а потым вырашыў ехаць ва Украіну — «абслугоўваць ваенную тэхніку».
Для герояў п’есы Віталя Каралёва атрутай робіцца само жыццё, хоць дастаткова выразна ў дыялогах гучыць і тэма інфармацыйных войнаў, якія таксама атручваюць і даводзяць да рэальных ахвяр. Аднак у поўнай ступені гэтае разуменне прыходзіць менавіта на спектаклі, бо рэжысёрскае прачытанне твора Аляксандрам Марчанкам паглыбляе тэкст і запаўняе сэнсамі ўвесь аб’ём недагаворанасцяў.
Пастаноўка Марчанкі — не агітплакат, не хваравітае смакаванне актуальных праблем, а шчырая і, самае галоўнае, мастацкая спроба іх асэнсаваць. Нягледзячы на псеўдадакументальнасць п’есы і вялікую колькасць пабытовых дэталей, яе сцэнічнае ўвасабленне максімальна пазбаўлена натуралізму, хоць пастаноўшчыкаў можна ўпікнуць празмернасцю відэашэрагу (той часам выглядае навязлівым візуальным каментатарствам). У белай прасторы сталічнага Палаца мастацтва, дзе паказваўся «Опіум», размяшчаліся такія ж белыя, нейтральныя дэкарацыі: дзве пясочніцы з зямлёй, невялікі столік і стаўкі-экраны. Нейтральнасць сцэнаграфіі адносна прасторава-часавай лакалізацыі выводзіла гісторыю герояў «Опіума» на вышэйшы ўзровень абагульнення. Месцам дзеяння мог зрабіцца любы правінцыйны горад, з якога ў лепшае жыццё, «у Мінск», імкнуцца збегчы героі. Але самым цікавым у сцэнаграфічным рашэнні стала выкарыстанне зямлі: яна быццам фізічна ўвасабляе тыя праблемы, якія атручваюць жыцці герояў. Яна — само жыццё, непрыемная паўсядзённасць, з якой і ў якой вымушаны існаваць персанажы. З зямлі героі дастаюць пабытовыя рэчы, яна літаральна корміць, робіцца баршчом, кавай, пірожным, вадой — ёю мыюць рукі. Бесперапыннае корпанне, спробы прыбраць зямлю, што ўпарта высыпаецца з пясочніц на бялюткі планшэт, пэцкае беражкі — адчайныя спробы загнаць праблемы ў нейкія прымальныя межы, дасягнуць хоць бы ілюзіі парадку. Аднак для сям’і галоўных герояў гэтыя намаганні перакідаюцца бессэнсоўнымі: абставіны мацнейшыя за іх. Зямля-жыццё пакідае на кожным брудныя плямы і ў выніку паглынае Андрэя. Выпадкова.
Праз актыўнае выкарыстанне зямлі рэжысёр тактоўна ўдакладняе для гледача асобныя моманты (магчыма, яны недастаткова выразна гучаць у тэксце). Так, імкненне дзяўчыны Андрэя Тані (Ганна Семяняка) пакінуць правінцыю, яе адасобленасць падкрэслены не толькі наўмысна «чысцюткім» выглядам, зменай абутку, прычоскі, але і старанным пазбяганнем кантакту з зямлёй. Дзяўчына штораз выцірае рукі вільготнымі сурвэткамі, імкнучыся адмыцца ад «бруднага жыцця». Паказальная і сцэна на могілках, дзе перадвызначаецца фінал гісторыі: Андрэй і Мікола капаюць яму, утвараючы з бакоў магільныя ўзгорачкі. Рыдлёўкі робяцца крыжамі. П’еса не ўдакладняе лёс старэйшага брата, але рэжысёрскі знак амаль не пакідае сумневу, што і яго паглыне зямля-жыццё.
Гісторыя жыццяў, зруйнаваных і перапыненых акалічнасцямі, трагічная і жорсткая, але страшнейшаю выглядае перспектыва, пададзеная Марчанкам у фінале. Менавіта яна падымае «Опіум» над развагамі пра надзённыя праблемы. Таня і Стас (Антон Жукаў) рыхтуюцца пакінуць горад на Дняпры. Дыванкамі з прыгожай штучнай травы яны засцілаюць пясочніцы з зямлёй — таксама і тую, дзе ляжыць забіты Андрэй. Складанасці, непрыемнасці разам з усім жыццёвым брудам старанна прыкрываюцца штучнай прыгажосцю, утвараючы ілюзію ўпарадкаванасці, раўнавагі, нормы. Каб хутчэй забыць, не бачыць, не адчуваць. Але на белай падлозе застаюцца чорныя плямы, якія з механічнай упартасцю працягвае церці маці Міколы і Андрэя... Зямля.
Рэжысёр, мастак і акцёры не спекулююць злабадзённасцю ды падабенствам. «Опіум» паўстае існай спробай асэнсавання сучаснасці і чалавека, які жыве тут і цяпер, яго гатоўнасці ўбачыць сябе і сваё жыццё ў тэатральным люстэрку. І лепш трываць і ўзірацца, чым паспешліва накідаць на люстэрка дыванок прыгожай, але штучнай травы.
Кацярына ЯРОМІНА