Па-першае таму, што атрымаў сцэнічнае ўвасабленне ў Фінляндыі (Хельсінкі) і ў Расіі (Масква, Самара, Ніжні Ноўгарад). Па-другое, праз канцэртнае выкананне — аркестравае, ансамблевае, сольнае — асобных нумароў, пералажэнняў і створаных кампазітарам сюіт, праз музыку сімфанічнай паэмы «Казка», музыку да кінафільма Валерыя Рубінчыка «Дзікае паляванне караля Стаха». Нарэшце, была выдадзена партытура балета і выпушчана вінілавая пласцінка. Таму можна казаць, што «Маленькі прынц» набыў найперш міжнароднае прызнанне, а потым як ганаровы госць завітаў на беларускую сцэну.
Дзякуючы балетмайстру Аляксандры Ціхаміравай, якая сумесна з Ларысай Глебавай распрацавала новую рэдакцыю лібрэта, Дзмітрыю Даўгалёву — вядомаму беларускаму кампазітару, які зрабіў музычную рэдакцыю балета і камп’ютарны набор партытуры, сцэнографу Вячаславу Окуневу, мастаку па святлу Ірыне Уторавай, а таксама камп’ютарнай графіцы Вікторыі Злотнікавай, «Маленькі прынц» прызямліўся на сцэне Нацыянальнага тэатра оперы і балета Беларусі.
Апошні балет Глебава незвычайны. З імем кампазітара звязаны шматлікія навацыі ў айчынным музычна-тэатральным мастацтве. Пачынаючы з «Мары», кожны крок таленавітай асобы рабіўся нібы па шляху адкрыццяў. Першы харэаграфічны спектакль на сучасную тэму — «Мара», першы сімфанічны балет — «Альпійская балада», першы зварот у балеце да купалаўскіх вобразаў — «Выбранніца», першы філасофскі балет раманнага тыпу — «Тыль Уленшпігель». «Маленькі прынц» таксама адметны.
Кампазіцыйна-драматургічная будова партытуры «Прынца» дасканалая і прадуманая. Стварэнне балета пачалося з распрацоўкі кампазітарам сцэнарнага плана, які потым быў «апрануты» ў літаратурную форму — лібрэта, напісанае Ларысай Глебавай. Згадаем: амаль так працаваў Чайкоўскі, для якога звышдэталёвыя распрацоўкі рабіў Пеціпа. Па сцэнарным плане Піатроўскага і Радлава пісаў «Рамэа і Джульету» Пракоф’еў, які сачыняў балет нават з секундамерам і пад метраном.
Пасля «Тыля Уленшпігеля» Глебаў стварыў зусім іншы, шмат у чым унікальны ўзор балетнага твора, ва ўсялякім разе ў нацыянальным мастацтве. Яго сімфанізм, скразное музычна-харэаграфічнае развіццё выяўляецца не праз традыцыйны драматычны канфлікт-супрацьстаянне, а дзякуючы суіснаванню паралельных светаў, іх кантрасту. Так кампазітар знаходзіць адэкватную музычную форму для перадачы прытчава-парабалічнага дуалізму літаратурнай крыніцы, дзе паралельна суіснуюць павольна-эпічная апавядальнасць і філасофскае асэнсаванне, рэалістычны вобразны свет і сімвалічна-ўмоўны. Дынаміка пераключэнняў з аднаго ракурсу на другі, іх узаемадзеянне ўспрымаюцца як індывідуальна-аўтарскае разуменне падзейнасці і робіць прысутнасць кампазітара апасродкаванай.
Знакамітая казка-прыпавесць Сэнт-Экзюперы ўтрымлівае шмат аўтабіяграфічных матываў. Твор мае і красамоўнае прысвячэнне: «Леону Верту, калі ён быў маленькім». Тут аўтар — ён жа і апавядальнік, які размаўляе адначасова з Маленькім прынцам і з чытачом. Акрамя вербальных сродкаў, скарыстоўвае яшчэ і графічны — цікавыя, па-дзіцячаму наіўныя і па-даросламу іранічныя малюнкі. Музыка Глебава выяўляе ўвесь гэты спектр праз адметныя жанрава-стылявыя і аркестравыя фарбы.
Казачнае ў «Маленькім прынцы» знітоўвае ўсе тыповыя матывы — сацыяльна-пабытовыя, фальклорныя, ірэальна-фантастычныя і прыгодніцкія. Таму балет цікавы як дзецям, так і дарослым. Але насамрэч у музыцы немагчыма перадаць усе змястоўна-сэнсавыя высновы літаратурнага твора. Гэта добра разумеў кампазітар, які любіў балетны жанр за тое, што ён дазваляе выяўляць агульначалавечае і дае неабмежаваную свабоду музычнай фантазіі якраз незалежнасцю ад слова.
Музычнае ўвасабленне «Прынца» цесна звязана з літаратурнай першакрыніцай у вобразна-тэматычным плане, але не дублюе яе. З біяграфічных матываў Экзюперы ў балеце прысутнічае толькі сцэна «Гібель Лётчыка» ў фінале, з чаго робіцца зразумелым, што Лётчык — гэта сам Экзюперы, пісьменнік, пілот, які загінуў праз некаторы час пасля стварэння «Маленькага прынца», над якім ён разважаў, пра якога марыў амаль шэсць гадоў, якога маляваў і нават быццам бы бачыў.
У сучасным тэатры панаванне рэжысуры, імкненне зрабіць пастаноўку дзеля таго, каб выявіць уласны погляд і асэнсаванне мастацкага аб’екта, стала нормай. А балет — асаблівая спакуса. Адсюль шматлікія перастварэнні «Жызэлі», «Дон Кіхота», «Лебядзінага возера», «Шчаўкунка», «Рамэа і Джульеты», «Папялушкі» і іншай класікі. Адсутнасць слова правакуе мноства сюжэтных мадыфікацый — ад рэстаўрацыі з нязначнымі абнаўленнямі да кардынальнага пераасэнсавання і актуалізацыі тэмы.
Практычна да кожнай пастаноўкі «Маленькага прынца» Ларыса Глебава перапрацоўвала лібрэта. Гэтым разам задума харэографа Аляксандры Ціхаміравай патрабавала новай рэдакцыі, дзеля якой, у сваю чаргу, неабходна было зрабіць і новую музычную рэдакцыю. Як прызналася Глебава, адразу згадала Дзмітрыя Даўгалёва і была ўпэўненая, што толькі ён зможа зрабіць гэта. І не памылілася.
Якраз сінтэтызм сучаснага музычна-тэатральнага мыслення, арганічнае спалучэнне традыцыі і наватарства яднаюць Даўгалёва і яго настаўніка Глебава. У новай рэдакцыі з’явілася музыка з балета «Выбранніца», адажыа Ружы і Прынца загучала ў розных варыянтах, змянілася паслядоўнасць нумароў, некаторыя павялічыліся, толькі адзін быў выключаны, а ў аркестр уведзены контр-фагот. Нумарная канструкцыя «Маленькага прынца» ўмоўная. Да прыкладу, «Аварыя» — гэта ўсяго сем тактаў, а «Палёт Маленькага прынца» — разгорнутая танцавальная сюіта з асобнымі эпізодамі — своеасаблівы «парад планет»: Караля, Славалюбца, П’яніцы, Фінансіста. Адчуваецца далікатнае і прафесійнае стаўленне да глебаўскай музыкі, бо асноўны матэрыял балета і паслядоўнасць яго кампазіцыйна-драматургічнага разгортвання, лірыка-эпічнае жанравае гучанне засталіся. І толькі ў аптымістычным Эпілогу, дзе гучыць дзіцячы хор, Даўгалёў выяўляе сябе як суаўтар Глебава.
Затое ў апошняй рэдакцыі лібрэта распрацаваны новы сюжэт, у ім можна знайсці некаторыя матывы і вобразы папярэдніх сцэнічных увасабленняў балета і тое, чаго няма ні ў Экзюперы, ні ў Глебава. Харэограф у сваёй версіі імкнулася да выяўлення сэнсаў, схаваных у літаратурнай першакрыніцы. Таму ў балеце ўзмацніўся аўтабіяграфічны бок — уведзены вобраз Каханай (Вольга Гайко), якой у жыцці Экзюперы была Кансуэла Карыльё, яна ж і прататып Ружы з планеты Прынца. Між іншым Лётчык (Ігар Аношка) не церпіць аварыю і не аказваецца ў пустыні, а засынае і быццам трапляе ў краіну дзяцінства, дзе і знаёміцца з Маленькім прынцам (Канстанцін Геронік), яго планетай, Ружай (Людмілай Хітровай), агрэсіўнымі баабабамі і іншымі героямі аповеду свайго сябра. Скразным вобразам спектакля становіцца Ліхтаршчык (Антон Краўчанка), ён нібыта чараўнік і апавядальнік, які вядзе Лётчыка ў прасторы незвычайнай казкі-мроі.
Балетмайстар, ствараючы пластычную тканіну спектакля, імкнулася адпавядаць музычнай мове балета, рытмічным інтанацыям, матывам, тэматычным зменам. Відавочныя намаганні выявіць найперш сюжэтную паслядоўнасць. Таму ў харэаграфіі багата пластычнай дэталізацыі, якая адпавядае слову. Яе можна пазначыць як своеасаблівы і выразны пантамімны складнік. Уласна мова танца падалася не такой выразнай. Асобныя рухі, позы, жэсты, міміка насамрэч больш красамоўныя, таму і запамінальныя. У пастаноўцы Ціхаміравай такіх знаходак нямала. Харэограф знайшла выразныя штрыхі для розных вобразаў — робатападобныя рухі ў танцы нелюдзяў, механістычныя лічбавыя шэрагі, іх пераўтварэнні, што характарызуюць Фінансіста. Красамоўнае з’яўленне Ружы і яе поза — вытанчаная і разам з тым капрызлівая. Хапае ў пастаноўцы і сцэнічных дэталяў, разлічаных, напэўна, на дзіцячае ўспрыманне — люстэрка ў руцэ Ліхтаршчыка і сонечныя зайчыкі, папяровыя самалёцікі, дудачка, гітара, зоркі ў паветры.
Выкарыстанне відэапраекцыі зрабілася сцэнаграфічнай «фішкай», яна досыць паспяхова замяняе традыцыйную сцэнаграфію. Змена «карцінак» ідзе ўслед за падзеямі сюжэта. Рухомая канструкцыя, размешчаная ў цэнтры сцэны, — быццам партал, пераход з рэальнага, зямнога быцця ў ірэальнае, казачна-фантастычнае, але і ў касмічную прастору чалавечай фантазіі. Прыём выяўляе два светы існавання галоўных герояў балета — зямнога Лётчыка і казачнага Маленькага прынца. Менавіта гэтая дэталь падкрэслівае галоўную ідэю балета, як яе разумеў кампазітар, — суіснаванне мары і рэальнасці. Хоць рэальнасць, на жаль, робіць мару недасягальнай. І ўсё ж, калі нават Глебаў і засмучаўся на гэты конт, яго балет завяршаўся ў до мажоры. Такую інтанацыю падхоплівае ў Эпілогу і доўжыць новая пастаноўка «Маленькага прынца», пакідаючы гледачу надзею.
Вера ГУДЗЕЙ-КАШТАЛЬЯН