Такім чынам, у два «прыёмы» было паказана дзесяць мюзіклаў, чатыры аперэты, па адной камедыі і канцэртнай праграме (некаторыя спектаклі паказваліся ў нашай сталіцы двойчы). Іх прагляд дазволіў скласці дастаткова поўнае ўяўленне пра рэпертуар калектыву.
Гонар Свярдлоўскага тэатра — мюзіклы. Сярод сусветных прэм’ер вылучаюцца пастаноўкі, створаныя адным і тым жа трыа: кампазітарам Сяргеем Дрэзніным, рэжысёрам Нінай Чусавай і дырыжорам Барысам Надэльманам. Гаворка пра «Кацярыну Вялікую» і «Яму». Іх мастацкі вынік падаўся мне шмат у чым супрацьлеглым. «Кацярына Вялікая», нягледзячы на «Залатыя маскі» (Паўлу Каплевічу за «Лепшую працу мастака па касцюмах у музычным тэатры» і Марыі Вінянковай за «Лепшую жаночую ролю ў аперэце / мюзікле»), яшчэ падчас першых гастролей трупы расчароўвала стракатасцю, імперскім духам і нават пашлаватасцю — якасці, зусім не ўласцівыя іншым спектаклям гэтага калектыву.
А вось «Яма» па матывах аднайменнай аповесці Аляксандра Купрына кранае: гісторыя жанчын, якія воляю абставін сталі паненкамі лёгкіх паводзін, пастаўлена далікатна і тактоўна. Не ў апошнюю чаргу дзякуючы лібрэта Міхаіла Барценева: фактычна дом распусты на Ямской нагадвае кабарэ. Атмасфера агульнай весялосці моцна кантрастуе з індывідуальнымі драмамі гераінь. Іх лёсы паказаны праз лаканічныя карціны. Адзначу стыльныя пераходы паміж сюжэтамі: на суперзаслоне ўзнікаюць застаўкі, нібы публіка глядзіць нямое кіно. Адна са сцэн увогуле вырашана праз кінаэпізод. Можна зразумець нават пэўную кліпавасць «Ямы»: шалман становіцца сімвалам грамадства, што імкліва ляціць у бездань. Нездарма фінальная сцэна мае на ўвазе пір падчас чумы. Памінкі па адной з гераінь ператвараюцца ў пажар. Але ніхто не кідаецца на дапамогу: жыхары дома застаюцца для грамадства людзьмі ніжэйшага гатунку.
Прыкладам ліцэнзійнай пастаноўкі з’яўляецца «Скрыпач на даху» Джэры Бока, пастаўлены з дазволу брадвейскіх праваўладальнікаў. Галоўны рэжысёр калектыву Кірыл Стрэжнеў удала перадае атмасферу тыповага яўрэйскага мястэчка. У «Скрыпачы...» хапае годных акцёрскіх работ (згадаць хоць бы Анатоля Бродскага, выканаўцу ролі Тэўе), але літаральна ўсе артысты ствараюць зладжаны і роўны ансамбль (што кантрастуе з мінскім спектаклем «Шалом Алейхем», у якім пануе неабгрунтаваны індывідуалізм). Музычны і драматычныя складнікі — у лібрэта дастаткова шмат дыялогаў — знаходзяцца ў мюзікле ў поўнай гармоніі. Фігура скрыпача на даху надае пастаноўцы элегічны, філасофскі настрой. Скрыпач нібы ўвасабляе анёла, які ведае будучыню і з журбой апявае лёс Анатаўкі. Неадназначныя мастацкія ўражанні пакінуў мюзікл «Пунсовыя ветразі». Шыкоўная музыка Максіма Дунаеўскага і трывалая драматургічная аснова (лібрэта Міхаіла Барценева і Андрэя Усачова) увайшлі ў супярэчнасць з рэжысурай Стрэжнева. Магчыма, ён усяляк імкнуўся кантраставаць Асоль і яе бацьку, сквапнага і бездухоўнага жыхара прыморскай вёскі. Але такі падыход адразу рашуча падзяліў герояў на «добрых» і «дрэнных». Апошнія былі вырашаны празмерна карыкатурна. Абсалютна не склаўся любоўны трохкутнік Асоль, Артура і Хіна Менерса, сына галоўнага нягодніка. Кудысьці знікла і грынаўская рамантыка. Таму з’яўленне Грэя атрымалася, на жаль, абсалютна прадказальным. Калі падсумаваць уражанні, дык відавочна, што Свярдлоўская музкамедыя — адзін з прыкладаў таго, як музычны тэатр мусіць развівацца і фармаваць рэпертуар. Блокі пастановак адрасаваны пэўнай аўдыторыі: увасабленні класічнай аперэты — аматарам традыцыяналізму; спектакль-канцэрт «Парк савецкага перыяду» — тым, хто настальгуюць па часах СССР; «www.сіліконавая дурніца.nеt» — моладзі, «Яма» — музычным эстэтам, а шэраг іншых мюзіклаў — усім адразу. Таксама важна, што ў тэатра ёсць свае візітоўкі — сусветныя прэм’еры. Яны робяць Свярдлоўскую музкамедыю пазнавальнай на ўсёй постсавецкай прасторы.
Дзяніс МАРЦІНОВІЧ