Гэтую артыстку можна смела назваць улюбёнкай фартуны. Людміла нарадзілася ў Казахстане, вырасла ў Ніжнім Ноўгарадзе, там пачала займацца харэаграфіяй, першыя выпрабаванні прафесіяй прайшла ў Краснаярскім тэатры. У Мінск прыехала ў 2008-м годзе, і за шэсць сезонаў паспела заваяваць беларускую сцэну. У рэпертуары салісткі — вядучыя партыі ў балетных хітах тэатра: «Рамэа і Джульета», «Лебядзінае возера», «Карміна-Бурана», «Стварэнне свету», «Анюта», «Вітаўт», «Папялушка», «Спячая красуня», «Лаўрэнсія», «Шчаўкунок, або Яшчэ адна калядная гісторыя». Крытыкі адзначаюць яе тэхнічнасць, «віртуозную тэхніку ног, лёгкі скачок, царскі верх і паварот галавы», гледачы — прамяністую ўсмешку, энергію, далікатнасць і чароўнасць.
Летась на IV Міжнародным конкурсе артыстаў балета ў Стамбуле, адным з самых прэстыжных конкурсаў харэаграфічнага мастацтва ў свеце, Людміла Хітрова заваявала Гран-пры. Восенню 2014 года, падчас правядзення Нацыянальнай тэатральнай прэміі, была адзначана як «Лепшая выканаўца жаночай ролі» ў харэаграфічным спектаклі — за партыю Ганны ў балеце «Вітаўт».
Ці ёсць сакрэты поспеху, вядомыя толькі вам?
— Па-першае — падтрымка. Мае бацькі цяпер знаходзяцца далёка, але мы штодня кантактуем, і яны заўсёды знаходзяць для мяне нейкія натхняльныя словы, а я атрымліваю велізарны зарад энергіі. Вельмі дапамагаюць блізкія сябры; яны часам вераць у мяне больш, чым я сама. Па-другое — поспех патрабуе штодзённай працы над сабой ды наўпрост залежыць ад асабістых якасцей, перадусім ад упартасці: нельга спыняцца ў самаўдасканаленні. Напрыклад, ёсць спектаклі, якія ты танцаваў з дзясятак разоў, і кожны рух, здавалася б, адточаны, але ўсё роўна трэба ісці ў залу, на рэпетыцыю. Дома імкнуся глядзець запісы пастановак, вучыцца ў іншых артыстаў.
Сцэна — мара дзяцінства? Вы свядома абралі прафесію балерыны?
— У мяне ніколі не было думак, маўляў, я хачу быць артысткай балета і больш нікім. Мама займалася маім развіццём, з чатырох гадоў пачала вадзіць у розныя гурткі: школа мастацтваў, маляванне, англійская мова, спевы і, вядома, танцы. Мы шмат пераязджалі: з Казахстана перабраліся ў Расію, жылі ў многіх гарадах, але аселі ў Ніжнім Ноўгарадзе, там мелася магчымасць прафесійна засвойваць харэаграфію. У вучылішчы займалася танцамі эстрадным і бальным. Апошні аказаўся зусім не маім напрамкам, а потым я развіталася і з эстрадным — спынілася на балеце. Вельмі ўдзячная маме за тое, што яна скіроўвала мяне, падтрымлівала пры паступленні. Было складана, бо ў Ніжнім Ноўгарадзе вучэльня не такая вялікая, як у Мінску, і прымаюць туды раз на два гады. Я прыйшла, калі набор скончыўся, давялося чакаць год, пасля чаго мяне ўзялі адразу ў другі балетны клас. На заняткі дабіралася ў іншы канец горада, кожны дзень па паўтары гадзіны на дарогу, а мне споўнілася толькі дзесяць. Сказала маме, маўляў, не хачу так далёка ездзіць, яна, вядома, пачала нервавацца. Тады я вырашыла: пахаджу які тыдзень. І тыдзень доўжыцца да гэтага часу (смяецца).
З чаго пачыналася ваша кар’ера ў беларускім тэатры?
— У Мінск я прыехала з Краснаярска, дзе была салісткай у тэатры оперы і балета, выконвала вядучыя партыі. Каб патрапіць у трупу, трэба прайсці прагляд. Спачатку танцавала ў кардэбалеце, але з перспектывай выканання сольных нумароў. Паступова назапашваўся рэпертуар, мяне перавялі ў салісткі. Зноў-такі — набірала рэпертуар для «вядучай». І вось дарасла...
Ці давялося ў Мінску вучыцца нечаму новаму? Хто стаў вашым настаўнікам у беларускім Вялікім?
— Істотных адрозненняў паміж краснаярскім тэатрам і беларускім няма. Адзінае, да чаго давялося прызвычайвацца, — гэта сцэна. Заўсёды танцавала на роўных пляцоўках, толькі некалькі разоў падчас гастроляў працавала на сцэне з нахілам. Тут, у тэатры, досыць вялікі нахіл сцэны і, вядома, пэўны час цела прывыкала да гэтага.
З рэпетытараў са мной шмат працуе Людміла Бржазоўская, з якой я пазнаёмілася ў першы дзень прыезду ў Мінск. Менавіта яна дапамагала мне з праглядам, а пазней рэпеціравала са мной вядучыя партыі. Сваім педагогам я лічу і Таццяну Яршову, яна падтрымлівае мяне, не дазваляе спыняцца ў развіцці. Вельмі ўдзячная Аляксандру Мартынаву, ён рыхтаваў нас з Канстанцінам Геронікам да конкурсу ў Стамбуле.
У вас ёсць куміры ў прафесіі?
— Апошнім часам надзвычай падабаюцца партыі Яўгеніі Абразцовай. Па-мойму, яна — ідэальная Аўрора. Перад сваёй прэм’ерай у «Спячай красуні» я глядзела запісы спектакляў з яе ўдзелам. Калі асвойвала ролю Джульеты, то цікавілася відэазапісамі пастановак з рознымі выканаўцамі. Ёсць мноства артыстаў, у якіх можна нешта пераняць, нечаму навучыцца, але не капіяваць, бо ў нашай прафесіі гэта немагчыма: вобраз, прыдатны аднаму, можа зусім не пасаваць іншаму.
Вы бачыце сябе адно ў вызначаным амплуа, толькі ў пэўных партыях?
— Па характары мне больш падыходзяць рамантычныя гераіні, але ў рэпертуары з’явіліся ролі, якія, здавалася, зусім «не маё» — Адылія, Лаўрэнсія. У многіх балерын мара — танцаваць Адэту-Адылію, а я заўсёды марыла станцаваць Джульету. Мне было цікава ўвасобіць на сцэне сапраўдную драму, велізарны дыяпазон пачуццяў: ад падлеткавай закаханасці, страсці — да няўцешнага гора і смерці.
Вельмі падабаецца Ева са «Стварэння свету», гэта мая другая прэм’ера ў мінскім тэатры. Памятаю, пасля выканання партыі анёла ў «Стварэнні…» чакала за кулісамі выхаду на паклон, зайграла музыка Евы, гляджу на сцэну — і ў мяне льюцца слёзы... У такой ступені моцная музыка, рух, столькі эмоцый у сцэне, проста «да мурашак». Падумала: вось бы мне гэтую ролю! І калі праз некалькі месяцаў мне прапанавалі яе танцаваць, не верыла свайму шчасцю. Сёння адной з любімых партый магу назваць Анюту, вельмі зжылася з гэтай гераіняй.
Лад жыцця танцоўшчыкаў — як лад жыцця вайскоўцаў, дзе галоўнае рэжым і штодзённы распарадак. Што самае складанае ў буднях балетнага артыста?
— Пераадоленне сябе і жалезная воля. Калі ты, нягледзячы на кепскае самаадчуванне, недасып, ляноту, павінен раніцай падняцца і ісці на ўрок. Пасля яго — на рэпетыцыю, а ўвечары ў цябе спектакль. Гэтая барацьба з сабой — самае складанае. Многім артыстам падабаецца толькі вынік — выхад на сцэну. Я нецярпліва чакаю кожную пастаноўку, але і ад рэпетыцый атрымліваю задавальненне, рэдка са мной здараюцца прыступы ляноты, калі трэба прымушаць сябе ісці ў балетны клас.
Дзе ўзяць сілы і энергію пры такіх вар’яцкіх нагрузках?
— Для мяне галоўная крыніца фізічнай энергіі — здаровы сон, перад спектаклем я абавязкова адпачываю некалькі гадзін. Пачуцці гэтаксама падсілкоўваюць: не люблю манатоннасць, кожны дзень павінен быць яркім і запамінальным, няхай нават эмоцыі не заўсёды станоўчыя, але якая заўгодна падзея — гэта вопыт.
У творчым свеце хапае зайздрасці, плётак, як вы абараняеце сябе ад падобнага негатыву?
— Імкнуся не марнаваць час на такія рэчы, не звяртаць увагі, бо гэта адымае занадта шмат сіл і энергіі, якія лепш выдаткаваць на спектакль і рэпетыцыю. Здавалася б, што заганнага ў тым, каб пагаварыць пра некага, абмеркаваць? Але гэта бруд, які застаецца з табой, і таму я стараюся абыходзіць тое дзясятай дарогай.
Ці можаце ўявіць сябе ў камічным вобразе, напрыклад, у балеце «Шэсць танцаў»?
— Лёгка! У мяне ўсё ў парадку з самаіроніяй і гумарам, таму было б цікава выступіць у такім спектаклі.
Як ставіцеся да крытыкі?
— Без яе — ніяк. У нас такая праца: трэба кожны дзень нешта ўдасканальваць і мяняць. Існуе выраз: «У балерын увесь розум сышоў у ногі». Гэта вельмі крыўдныя словы, наша прафесія — надзвычай інтэлектуальная, артысты павінны ўвесь час нечаму вучыцца, чытаць, спасцігаць новае. Практычна ўсе мае калегі атрымліваюць вышэйшую адукацыю, некаторыя — другую, мы не спыняемся на дасягнутым.
І апошняе пытанне. Ці бываеце вы нешчаслівая на сцэне?
— Калі гэта не з’яўляецца часткай маёй ролі, дык не, такога ніколі не было. Для мяне кожны выхад на сцэну — сапраўды свята. Ніколі не думаю: «Хутчэй бы станцаваць і сысці». Здаецца, гэта страшна, калі цябе наведваюць падобныя думкі. Так, здараюцца вельмі складаныя партыі, якія маральна і фізічна знясільваюць. Ведаю, што давядзецца змагацца з сабой, з уласным целам, але выходжу на сцэну і атрымліваю ад гэтага задавальненне...