Да юбілею тэатр пачаў рыхтавацца задоўга да даты, таму святкаванні не абмяжуюцца адно канцэртнай праграмай. Юбілей будзе адлюстраваны на памятных манетах, марках, канвертах, якія папоўняць калекцыі нумізматаў, філатэлістаў і ўсіх, хто цікавіцца мастацтвам, у нас і ў замежжы. Не засталося ўбаку і ўласна выяўленчае мастацтва. Беларуская мастачка Аксана Аракчэева ўжо некалькі гадоў працуе над серыяй партрэтаў нашых салістаў балета, і выстаўка ейных работ у фае тэатра нагадае, што гісторыя не толькі даўніна, але і тое, што адбываецца сёння і зараз.
Пра мінулыя ж дзесяцігоддзі распавядае выстаўка «Шлях да Вялікага тэатра», што адкрылася днямі ў Дзяржаўным музеі гісторыі тэатральнай і музычнай культуры Беларусі і была падрыхтавана сумесна з тэатрам, які прадаставіў шмат архіўных матэрыялаў, фотаздымкаў са спектакляў ды сцэнічныя строі.
З нецярплівасцю чакаюць выхад «Вялікай энцыклапедыі Вялікага тэатра Беларусі», якую разам з тэатрам рыхтуе калектыў выдавецтва «Беларуская Энцыклапедыя імя Петруся Броўкі». Але тут спяшацца «акурат да даты», дзень у дзень, не трэба: падобны фаліянт патрабуе ўважлівага стаўлення, карпатлівага ўнясення карэктыў, бо ствараецца, як кажуць, «на стагоддзі».
А што ж будзе менавіта ў Дзень нараджэння? Вядома, святочны канцэрт — з удзелам лепшых творчых сіл тэатра ды з запрошанымі сусветнымі знакамітасцямі. Не забыўся тэатр і на сваіх ветэранаў: атрымаўшы запрашальнікі, яны ўбачаць гэтую праграму напярэдадні.
Нацыянальны Банк Рэспублікі Беларусь уводзіць у абарачэнне памятныя манеты "Беларускі балет. 2013": тры залатыя, наміналам 1 000, 50 і 5 рублёў, дзве сярэбраныя — 100 і 20 рублёў, медна-нікелевую — 1 рубель.
На аверсе манет змешчаны рэльефны відарыс Дзяржаўнага герба Рэспублікі Беларусь і франтальная выява будынка Нацыянальнага акадэмічнага Вялікага тэатра оперы і балета Рэспублікі Беларусь пасля рэканструкцыі.
На рэверсе залатой манеты наміналам 50 рублёў і медна-нікелевай наміналам 1 рубель, сярод іншых элементаў, — выява балерыны, якая сядзіць у паўшпагаце, і дэкаратыўны арнамент з пер’я. На астатніх — таксама выявы фрагментаў з балета П.Чайкоўскага "Лебядзінае возера": балерына ў поўны рост у танцы і два лунаючыя пёры.
Манеты адчаканены ў Літве.