Дызайн-студыя СЭНС уяўляе з сябе моцнае праектнае прадпрыемства з вытворчай базай. Фірма працуе па двух накірунках. Першы — распрацоўка і вытворчасць знакаў адзнакі, ордэнаў і медалёў. Менавіта тут былі зроблены многія дзяржаўныя ўзнагароды, якія атрымалі лепшыя людзі нашай краіны. За час працы студыі выраблена больш за 500 000 штук урадавых, ведамасных і юбілейных медалёў, знакі можна лічыць мільёнамі. Другі накірунак дзейнасці студыі — стварэнне рэнтгенаўскіх камп’ютарных сістэм рознага прызначэння. Сярод дасягненняў у гэтым накірунку можна назваць створаныя па замове Міністэрства аховы здароўя сумесна з заводам “Дыяпраектар” і НВП “Адан” камп’ютарныя рэнтгенаўскія апараты “Пульмаскан-760”. Былі распрацаваны таксама гэтак званыя паліклінікі на колах на базе шасі МАЗа — “Пульмаэкспрэсы” для абслугоўвання экалагічна неспрыяльных раёнаў краіны. Вяла дызайн-студыя і распрацоўку кантрольных сістэм на падставе новага прынцыпу выкарыстання рэнтгенаўскіх промняў. Гэтыя прыборы могуць ужывацца для кантролю пасажыраў у аэрапортах, на мытнях, на блоксетках, для кантролю наведвальнікаў у банкаўскіх сховішчах і рэзідэнцыях з мэтай знаходжання забароненых рэчаў. Яшчэ аднойцікавай распрацоўкай дызайн-студыі СЭНС стала кантрольная сістэма Consis, прызначаная для выкарыстання ў аэрапортах. Асаблівасць гэтай сістэмы ў тым, што яна дазваляе абследаваць пасажыра ў поўны рост. У дызайн-праекце была ўлічана арганізацыя пасажырпатока і палепшана эрганоміка працоўнага месца аператара.
Кіраўнік дызайн-студыі СЭНС Уладзімір Трафіменка атрымаў дыплом у 1975 годзе. Тэма яго дыпломнай работы была “Мабільная жылая ячэйка для адпачынку ў зімовых умовах”. Пасля заканчэння інстытута Уладзімір працаваў на розных прамысловых прадпрыемствах Мінска. Шмат намаганняў ён аддаў працы на Мінскім гадзіннікавым заводзе “Прамень”. Яму належаць распрацоўкі рознага тыпу гадзіннікаў: наручных, дзіцячых, пластыкавых і ювелірных, мінібудзільнікаў. Таксама менавіта Уладзімір з’яўляецца аўтарам дызайн-праекта гарадскога гадзінніка на вежы Мінскага завода “Прамень”. Акрамя гадзіннікаў, Трафіменка стварыў таксама такія распрацоўкі, як схема развіцця нацыянальнага парка “Нарач”, інтэр’еры гасцініцы “Арбіта”, распрацоўка канцэпцыі Экацэнтра спорта, актыўнага адпачынку і ўсвядомленага даўгалецця “Сілічы”, прадстаўнічы сувенір да Чэмпіянату свету па хакеі 2014 года для ўручэння кіраўніком дзяржаў-удзельнікаў спаборніцтваў і іншыя. Ёсць у багажы Уладзіміра і сапраўдныя вынаходніцтвы. Так, ён прапанаваў дызайн-канцэпцыю мабільнага комплексу прамянёвай перадпасяўной апрацоўкі зерня. Пры гэтым выключаецца хімічная апрацоўка, паляпшаецца экалогія, ураджайнасць павышаецца на 10 — 15 працэнтаў
“Творы дызайну, якія фарміруюць асяроддзе прабывання, — гаворыць УладзімірТрафіменка, — безумоўна, з’яўляюцца твормі мастацтва. Па маім меркаванні, дызайн сярод іншых відаў мастацтваў займае галоўнае месца, бо ў сваім жыцці чалавек часцей мае стасункі з аб’ектамі дызайну”. Уладзімір з’яўляецца кіраўніком вялікага дызайнерскага прадпрыемства і канечне ж ён працуе не адзін, а ў калектыве таленавітых калег-аднадумцаў. Сярод іх можна назваць такіх выдатных дызайнераў, як Міхаіл Бялоў, Мікалай Бушын, Дзмітрый Ігнатовіч. Верным адзінадумцам у рэалізацыі ідэй і канцэпцый студыі з’яўляецца таксама намеснік дырэктара прадпрыемства Уладзімір Трэгуб. Безумоўна, Уладзімір працуе ў калектыве, але, як ён лічыць, для рэалізацыі творчых задум і праектаў трэба мець асабістую справу, каб самому прымаць рашэнні і самому адказваць за іх ажыццяўленне.
Акрамя дызайнерскай творчасці, герой аповеда сур’ёзна захапляецца спортам: плаванне, крос,альпінізм і турызм. Асобую ролю ў яго жыцці адыгрываюць лыжы, якімі Трафіменка займаецца больш за 50 гадоў: і ўвосень, і ўзімку, і ўвесну. Зараз ён марыць пабудаваць летнюю гарналыжную трасу і катацца на лыжах нават летам. Ёсць ужо праект такога комплексу, які, па меркавнні Уладзіміра, павінен паўстаць пад Мінскам, у Сілічах. Пабудова будзе мець арыгінальную архітэктурную форму на ўзроўні апошніх дасягненняў у галіне архітэктурнага дызайну і павінна прыцягнуть да Беларусі ўвагу шматлікіх замежных турыстаў. Трэба сказаць, што Уладзіміра ў яго занятках спортам падтрымлівае ўся сям’я — жонка, дачка, і дзве ўнучкі. Дарэчы, менавіта дачку Уладзімір Трафіменка лічыць сваёй спадкаемкай, ёй ён перадаў значкова-медальную фірму “СЭНС-геральдыка”, яна з’яўляецца афіцыйным дырэктарам гэтага прадпрыемства.
Ён не збіраецца на адпачынак, не хоча падводзіць вынікі, ставіць кропку ў сваёй дзейнасці. Ён яшчэ поўны сіл, і наперадзе шмат цікавай, плённай работы на ніве айчыннага дызайну.
У сувязі з 75-гадовым юбілеем Уладзімір Трафіменка быў адзначаны медалём Францыска Скарыны.
Якаў ЛЕНСУ, Анатоль ЦЕХАНОВІЧ, сябры Беларускага саюза дызайнераў
На фота: Будынак, дзе месціцца дызайн-студыя СЭНС, Рэнтгенаграфічны комплекс кантролю якасці зверхбуйных габарытных шын,
Інтраскоп для праверкі ручной паклажы, Знак-сімвал для Ватыкана, Праект летняй гарналыжнай трасы ў Сілічах.