Праграма транспамежнага супрацоўніцтва “Польшча — Беларусь — Украіна” разлічана на 2014 — 2020 гады і рэалізуецца ў рамках дзейнасці праекта “Еўрапейскі інструмент суседства” для пашырэння супрацоўніцтва трох краін.
Агульнай мэтай з’яўляецца падтрымка самых розных ідэй, якія накіраваны на развіццё супрацоўніцтва ў памежных рэгіёнах Беларусі, Польшчы і Украіны. Удзел у праграме прадугледжвае падтрымку як буйных нацыянальных праектаў, так і, што асабліва радуе, невялічкіх рэгіянальных і ўключае наступныя стратэгічныя мэты: садзейнічанне сацыяльна-эканамічнаму развіццю ў рэгіёнах незалежна ад межаў, вырашэнне агульных праблем навакольнага асяродку і грамадскага здароўя, а таксама — паляпшэнне ўмоў для чалавечай мабільнасці.
Сярод 17 пераможцаў першага конкурсу прапаноў — сем праектаў, якія датычацца Беларусі. Толькі па Брэсцкай вобласці іх чатыры. І гэта пры тым, што было пададзена 146 заявак!
Так, праект “Аднаўленне
агульнай культурнай спадчыны ў якасці асновы для трансгранічнага супрацоўніцтва моладзі і творчых калектываў з Польшчы і Беларусі” ўключае ў сябе стварэнне двух культурна-гістарычных цэнтраў. У Польшчы гэта будзе сядзіба роду Ляхертаў у вёсцы Цяханкі ў Ленчынскім павеце Люблінскага ваяводства, а ў Беларусі — сядзіба роду Рэйтанаў у вёсцы Грушаўка Ляхавіцкага раёна Брэсцкай вобласці. Агульны бюджэт мае скласці 2 375 000 еўра, з якіх палову атрымае беларускі бок.
Як адзначыла карэспандэнту “К” намесніца старшыні Ляхавіцкага райвыканкама Дзіяна Трысцень, падрыхтоўка да рэалізацыі праекта ўжо пачалася, і неўзабаве будзе распрацаваны дэталёвы план работ. Таму можна спадзявацца, што ўжо ў даволі хуткім часе перліна сядзібнага мастацтва, якая не адно дзесяцігоддзе прастаяла занядбанай, пераўтворыцца ў прывабны для турыстаў аб’ект.